يوم من عمري

الاسبوع ده كان تقريبا كده ازبل اسبوع في عمري...ولونه لسه ماخلصش....بس ياللاه نكتب بقه..هاحكيلكم عن يومين بس من العذاب اللي شفته طول الاسبوع.......يوم السبت...صحيت الصبح,ذاكرت شوية وبعدين رحت درس العربي...كمية من التفاهة بقه في العيال اللي قاعدة...ماحدش يتخيلها...الدرس خلص وروحت,لقيت اختي بتتفرج علي برنامج "شبابيك"...ومع اني باكره البرنامج ده من ساعة لما تضامنوا مع "تامر حسني"...بس قلت ياللا اقعد اتفرج....جابوا "بلال فضل"...وقعد يحكي في قصص سقيلة ويقول عليها كومدي وهم يضحكوا زي الهبل بالظبط...اتخنقت...اللي خنقني بجد بقه لما اتصل "عمرو سليم"وكان اللي جرا ماكان...ولا قرب يكون اصلا..قعد ينافق في بلال فضل ويقوله يا عبقري يا رمز القصص الكوميدية......وبلال فضل يقوله يا عبقري الكراكتير يا عظيم زمانك يا مش عارف ايه....وكانه اخترع فن الكراكتير...كنت حاسس اني باسمع ناجي العلي واسماعيل ياس...وقعدوا يهزروا مع بعض...بعدين نزلت اروح درس الفيزكس...قعد المدرس يهزر مع واحد معايا فالدرس صاحب ولاده...رجعت مخنوق...وانا مروح بقه من شارع جنب شارعي لقيت الدنيا زحمااة...جامع بلال والله ازحم من الازهر فالمظاهرات..طب وماله البلد اتصلحت والناس بتصلي..حرية شخصية...الزبالة اللي فالموضوع انهم بيقيدوا حريات الاخرين...كل واحد جاي هو وولاده....وولاده عندهم عربيات...تلاقي كل فرد في عربية...واتحول الشارع بقدرة قادر لجراش...مش عارف هايروحوا ازاي اصلا..اللي راكن بجنب واللي راكن بالطول واللي راكن بزاوية...الحمد لله اني كنت جاي علي رجلي...روحت بصعوبة...الموقف ده فكرني بالسنة اللي فاتت...اخر تراويح...كنت خارج مع ابويا...قعدنا ساعة الا ربع علشان نعرف نتحرك في شارعنا اللي هو صغير نسبيا(بيوصل بين عباس العقاد ومكرم عبيد.....يعني زي اللي بين عبد المنعم رياض والتحرير)وفالاخر روحنا ركنا علي بعد تلت محطات ورجعنا مشي...طب يا شعب مادمتوا كتير كده تعالوا موصلات...لا لازم الانزحة...المهم...النهارده برضه حصل موضوع خلاني اكتب البوست بعد ماكنت نفضت زي ماقلي مونجي...انا نازل اصلي الجمعة في جامع كبير علي بعد تلات عمرات...الامام بينهي الخطبة ...جريت...لقيت واحد معايا فالشارع ماعرفش غير اسمه بيناديلي وبيقولي ياللا نصلي في جامع بلال علشان نلحق الخطبة...طب مانا سامع ديه من البيت ومش عارف اذاكر...يقولي لا لازم تبقي قاعد فالجامع...ماعرفتش ازوغ منه...وبرضه مالحقناش نصلي في جامع بلال ده من اصله...وفضلنا نجري فالشوارع...واصلا شكلي بيبقي مضحك وانا باجري علشان طويل يعني..وفالاخر صلينا في زاوية صغيرة تحت عمارة...صليت عالرصيف...وبرضه ماسمعتش الخطبة....الواد ده بقه مقضيها كده(جري فالشوارع) في ثانوية عامة وجاب ستين فالمية في تانية...طب انا ذنبي ايه...اجري واتشحطت ليه بس..بعد الحوار ده قلت بعد كده هاقعد فالجامع من قبل الصلاة بساعة


بي اس (علي راي بلو):اللي هايقولي مافهمتش مش هارد عليه..مش كل موضوع تقولولي مافهمناش.

18 comments:

  1. Mongey said...

    هااها
    حلو اللون ده
    و انا صليت في جامع بلال التروايح العام السابق
    و كان زحمة جدا جدا
    انت عارف ليه
    عشان عندهم امام صوتة قرانيا حلو فعلا صوتة حلو
    اسمه الشيخ رضا كان زمان امام في الزاوية الي جنب بيتنا
    و بعدين راح الارقم و مطولش بعد كده
    راح
    مسجد بلال
    و من ساعتها و الحال انقلب
    فعلا علربيات كتير جدا
    الشارع بيبقي غير قابل للمشي
    و موضوع بلال فضل ده حلو
    انا كمان مبستظرفوش ابدا
    دمه تقيل اوي اوي
    و بعدين حلوةوصلة المجاملات دي
    ايه يا عم كله مجاملات كده
    ايه نظااام ؟ ؟
    سلام  

  2. 3rby said...

    يعني صوته حلو...بس مش للدرجة...انا الاول كنت فاكر ان الشيخ اسمه بلال...وبعدين قلت في عقلي ايه الناس الهبلة ديه...هم فاكرينه سيدنا بلال بجد ولا ايه؟  

  3. أروى الطويل said...

    لا لالا هتغلط فى بلال فضل هازعل منك دا انا با موت فيه اى نعم بيكتب ساعات حاجات ما بتعجبنيش بس مش مشكله بحبه برضه وبعدين على فكرة ده مش نفاق لانهم انفصلوا ومش عادوا بيشتغلوا مع بعض يعنى مش عايزين منهم حاجة بس حلو الموضوع برضه باى احسن تاخرت على الكليه  

  4. 3rby said...

    ايه يا اروي انتي هاتزلينا بقه انك دخلتي الكلية ولا ايه؟:)
    احنا لسه ثانوية عامة
    هو بلال فضل بيكتب كومديا سودا في الجرايد بشكل سياسي...باحس انه بيفهم
    بس لما يكتب عودة الندلة وحاحا والهبل ده بيبقي مستفز...باحس انه واحد تاني  

  5. القادم من الريف said...

    انته منفسن شويه بس يا عم من المذاكره ازمه وحتعدى يا مان
    تحياتى
    مع تمنياتى با لتوفيق والمجموع العا لى  

  6. 3rby said...

    اه والله...مكتئب ومخنووق  

  7. Nouran said...

    صلي ع النبي يا بني-عليه الصلاة والسلام-
    دي حالة بتيجي مع المذاكرة والتركيز بساتلك الحالة دي بدري شوية انا كانت بتيجي ع اخر شهر 3 او 4
    انت بس متنشنش نفسك وكليك منفض صدقني وهتستريح :)  

  8. مصري said...

    ربنا يعينك، عموما كل اللي ظايتيين -أو ظايطيين مش عارف بالظبط-أو بالضبط مش عارف بالتأكيد-- في البلد دي دلوقتي اسمهم بلال، إظاهر موضه طلعت واحنا مش حاسين، عقبال موضة نصر مصر، قريب ان شاء الله، ادعيلي انت بس وقدم المشيئه.  

  9. 3rby said...

    لا اصلي اتظلمت السنة ديه في 3 في المية وحصلي حالتين وفاة في الصيف يا نوران ومصيفتش...فاكيد مش هابقي قادر اشوف الدنيا غير من خرم صغير...او يمكن ماشفهاش اصلا


    مصري...انت غيرت اسمك...انا عربي وانت اخويا مصري....دا انت عيل خنيق...ماتجيش هنا تاني...احسن اجبلك البت اوسه وشلتها ياكلوك  

  10. Mongey said...

    انت عارف انا عايز اضيف حاجة بس
    انت يا حبيبي
    مبتعرفش تجري
    انت بتجري بس بالتصويرالبطي

    هاها
    مش عشان انت طويل
    يعني هوا الطويل ميجريش ولا ايه  

  11. 3rby said...

    انت بتتريق علي جريي وتشيل تعليقي وتعليقك
    هي ديه الرجولة
    والله لاسيحلك في المدونات لو مارجعتش التعليقين
    وابقا اعرف شيلهم بقه  

  12. shady said...

    جميل سردك مثير ومش ممل أبداً
    مع أنى صايم وسردك طويل وفاضل على المغرب دقايق شديتنى أقرا الموضوع كامل

    جميلة الواقعية الصرف دى
    كل سنة وانت طيب  

  13. 3rby said...

    وانت طيب يا شادي..انا باكتبلك والناس بتفطر من حولي  

  14. المزاجنجي said...

    المهم يعني انت عاوز ايه مش فاهم والله ؟  

  15. 3rby said...

    يا عم عاوز افضفض  

  16. أُكتب بالرصاص said...

    انا قريت البوست مرتين

    يا ابني انا مش شايف اي عقدة او مشكلة او مصيبة تخليك متضايق كده
    وتقول عليه ازبل اسبوع في عمرك؟
    انت شفت ايه في الدنيا؟علشان تحكم على الاسبوع ده ان ازبل اسبوع
    ؟
    وبعدين فين المشكلة اصلاً؟
    مش لاقي باركينج؟
    مش عايز تسمع خطبة الجمعة؟
    اتنين بهزروا مع بعض على الهوا؟
    مش عارف تكتب ثانية بالثاء وبتكتبها بالسين ؟
    انا مش شايف بروبليم؟  

  17. أُكتب بالرصاص said...

    عايز اضيف !

    خد عندك شوية مشاكل علشان تعمل مقارنة
    شوف ايه اللي مستنيك

    عايز تدخل كليه
    عايز تتخرج
    عايز تلاقي شغل
    عايز تعمل مشروعك الخاص
    عايز تسافر
    عايز تتجوز
    مشاكل مع مراتك
    خلفت
    العيال
    مشاكل في شغلك

    غير هموم الامة كلها

    يا ابني

    ..

    انت شايف ان في مشكلة ؟  

  18. Anonymous said...

    حرام عليك بجد
    برنامج شبابيك ده تحفه حلو جدا انا من اشد المتابعين ليه من اول ما بدأ و هو بجد احلى برنامج فى الدنيا كلها و الشباب اللى فيه لذاذ جدا

    و بالنسبه لتامر حسنى انا مختلفه معاك لانه فنان بجد صوته و احساسه تحفه و اغانيه كلها حلوه و انسان طيب و جميل اوى و انا بحبه جدا