ايه وضعه؟

لسه عارف حكاية تغيظ حصلت من يجي اسبوعين وكان نفسي اكتب عليها من بدري...انا واخواتي الاتنين كنا في مدرسه ابتدائي واعدادي...فلما بنروح ثانوي بنتبهدل بين المدارس علشان نلاقي حته تتكرم وترضي تشربنا الجهل(مش احنا اللي بنتبهدل...طبعا ابويا)فالسنادي بقه اختي داخلة اولي ثانوي....ابويا اطخ في عقله وقال وماله تكمل علامها:)بس الظاهر ان العلام صعب في البلد ديه....المفروض بقه تنسيق المدرسه يبقي في الادارة....بس مدير المدرسة اللي جامبينا بياخد رشوي الف جنيه علشان يدخل اي حد(والله لو اول واحد في التقديم...هايقول الفصول مليانة)واحنا ناس مالناش في الفساد فقدمنا في الادارة..وكان رقمها 12 الاهمال بقه ان الست مديرة الادارة التعليمية اتاخرت اسبوعين في انها تودي الملفات اللي جاتلها المدرسة علشان يقفلوا التقديم...والراجل مش فارقة معاه...اهو بياكل وخلاص...اصل العيال في المدرسة ديه بتديلوه علي قفاه...فابياخد تعويض من دلوقتي الظاهر....ابويا جاب تأشيرة وزير...اهو احسن من الرشوة.....وسافر بره...امي راحت تودي التاشيرة علشان يقبلوها في التنسيق الجديد(اصلهم بدأوه من الاول مخصوص علشان حوار اختي ده)...طبعا كلكوا مخنوقين مني وعمالين تقولوا واحنا مال اهالينا...لما امي راحت تودي التأشيرة...نائب رئيسة الادارة قالها :"بصي الورقة ديه...صاحبها جاب لبنته خمس تاشيرات للوزير وماعملولوش حاجة....ولما زهق جاب تاشيرة جمال مبارك"انا بقه عاوز اعرف ايه هو وضع جمال مبارك الدستوري علشان يعمل واسطه(اللي هي اصلا غلط...بس والله ماعملنهاش غير لما غلبنا...المدرسة في نفس مربعنا السكني واختي جايبة مجموع عالي وبرضه عاوزين واسطه)قصدي يعني ايه هي سلطته علي الموظف علشان يقوله انقل ديه وحط ده؟!حد يفهمني يا جماعة...لاحسن يكون الفرعون ولا حاجة

7 comments:

  1. Mongey said...

    وضعه ببساطة ابن الرئيس هاااهاا  

  2. 3rby said...

    هي هيئ....بص يا عم...بنت شيراك تبقي سكرتيرته...بس مش مستاشرته(علي درجة وزير)ولو كانت مستشارته ماكنتش هاتأشر علي حاجة ماتخصهاش في شغلها ولا هي من مسؤليتها ولا ينفع يبقي ليها نفوذ فيه....والله كان نفسي يخطب من بره...علشان لو كشر في وشها ياخد علي قفاه  

  3. MAKSOFA said...

    ايه الفزروة دي
    أقطع دراعي لو كنت فهمت حاجه  

  4. Lasto-adri *Blue* said...

    ههه ولا انا يا مكسوفة

    بس فى الاول او الىخر

    ولكم تو كايرو


    وبالانجليزى يا عربى
    :P  

  5. 3rby said...

    ولا انا فهمت...تقريبا كده ديه قصة شخصية...العبيط اللي كتبها عاوز يعرف ايه نفوذ جمال مبارك انه يعمل واسطة  

  6. *-* Egypti@no *-* said...

    على فكرة دى أول مرة أدخل فيها مدونتك وبصراحة مستوى تفكيرك ونقدك وكلامك عالى أوووى ودخل دماغى وبجد أستمر وهيكون ليك مستقبل يابنى
    بس أبعد عن السياسة فى البلد دى عشان حالها عمره ما هيتغير

    وبالنسبة لموضوع المدرسة أنا شايف أنك تروح للنيابة الأدارية وهما ياعم هيعلقوا حضرة المدير فى السقف ومن قفاه الحلو- وكمان لو الموضوع أتعقد أوى يبقى دخلوها مدرسة غيرها وخليها تستحمل شوية ده أحنا ياما شوفنا فى المحروسة دى ومن شعبها  

  7. 3rby said...

    عم اخناتون:)
    السياسة هاتتغير انشاء الله باصرارنا...احنا عايشين مرحلة ماعشتهاش مصر بقالها سييييييين
    لاول مره الناس مهتمه
    وبعدين ماحنا دخلناها مدرسة تانية خلاص