عارفين الاخلاق والمبادي و القيم والحاجات ديه كلها بالنسبة لي عاملة زي الشجرة الي فيها فروع كتير و ورق كتير كده  المشكلة ان انا شايف اان الشجرة ديه في خريف طويل كل الورق بتاعها عمال يقع

المشكلة ان كل ورقة تقع من الشجرة بتوقع قيمة او مبداء من نظري بعد كده بشيله من حساباتي خالص  وبانساه وده بيخلي حاجات تانيه في الحياة تسقط من نظري

زمان و انا  صغير كانت كل حاجة حلوة و ليها طعم احلي

كنا بنلعب كورة في الشارع بعد صلاة الجمعة

كنا في رمضان دايما بنتجمع اول يوم و نفطر ونقضي يوم لكن الموضوع مبقاش كده

كنت زمان و انا صغير باحب اخويا الكبير دلوقتي لا يمكن عشان احنا الاتنين بقينا كبار مثلا مش عارف

ناس كتير اوي اعرفها اتغيرت بشكل محزن و رهيب اتغيره لعكس الي هما فيه مبقوش هم

 المشكلة بالنسبة لي اني

حتي لو حاولت الم الورق الي بيقع فهيكون مات

و مش ممكن يرجع للحياة تاني و هيبقي ذكري لحاجات

كانت و خلصت

لسه عارف حكاية تغيظ حصلت من يجي اسبوعين وكان نفسي اكتب عليها من بدري...انا واخواتي الاتنين كنا في مدرسه ابتدائي واعدادي...فلما بنروح ثانوي بنتبهدل بين المدارس علشان نلاقي حته تتكرم وترضي تشربنا الجهل(مش احنا اللي بنتبهدل...طبعا ابويا)فالسنادي بقه اختي داخلة اولي ثانوي....ابويا اطخ في عقله وقال وماله تكمل علامها:)بس الظاهر ان العلام صعب في البلد ديه....المفروض بقه تنسيق المدرسه يبقي في الادارة....بس مدير المدرسة اللي جامبينا بياخد رشوي الف جنيه علشان يدخل اي حد(والله لو اول واحد في التقديم...هايقول الفصول مليانة)واحنا ناس مالناش في الفساد فقدمنا في الادارة..وكان رقمها 12 الاهمال بقه ان الست مديرة الادارة التعليمية اتاخرت اسبوعين في انها تودي الملفات اللي جاتلها المدرسة علشان يقفلوا التقديم...والراجل مش فارقة معاه...اهو بياكل وخلاص...اصل العيال في المدرسة ديه بتديلوه علي قفاه...فابياخد تعويض من دلوقتي الظاهر....ابويا جاب تأشيرة وزير...اهو احسن من الرشوة.....وسافر بره...امي راحت تودي التاشيرة علشان يقبلوها في التنسيق الجديد(اصلهم بدأوه من الاول مخصوص علشان حوار اختي ده)...طبعا كلكوا مخنوقين مني وعمالين تقولوا واحنا مال اهالينا...لما امي راحت تودي التأشيرة...نائب رئيسة الادارة قالها :"بصي الورقة ديه...صاحبها جاب لبنته خمس تاشيرات للوزير وماعملولوش حاجة....ولما زهق جاب تاشيرة جمال مبارك"انا بقه عاوز اعرف ايه هو وضع جمال مبارك الدستوري علشان يعمل واسطه(اللي هي اصلا غلط...بس والله ماعملنهاش غير لما غلبنا...المدرسة في نفس مربعنا السكني واختي جايبة مجموع عالي وبرضه عاوزين واسطه)قصدي يعني ايه هي سلطته علي الموظف علشان يقوله انقل ديه وحط ده؟!حد يفهمني يا جماعة...لاحسن يكون الفرعون ولا حاجة

ايه الفرق بين الموت والحياة وايه الفرق بين الشخص الميت واالشخص الحي . الموت طبعا قضاء الله وقدره ومحدش بيتحكم في وقت موته لكن ممكن ينتحر ببساطة كبيرة جدا بس حرام طبعا. لكن هل في علاقة بين الحياة و الموت ؟ اكيد طبعا و الي يبص للحياة والموت ممكن يلاقيهم ضد بعض او عكس بعض انما هما قريببين اوي من بعض و ممكن نعتبر ان الموت مرحلة انتقالية بتيجي بعد الحياة بيعبرها الانسان ولابد منها لكي تستمر الحياة علي وجه الارض يعني الموت هو عملية رجوع لجذور الانسان الروحية والارضية والموت ليس شيئا سيئا و ليس جيدا ولكنه طبيعي زيه زي الحياة. الموت بيثبت لي ان الانسان كل انسان فينا عنده استقلالية خاصه بيه هو فقط بمعني ان الاب هيموت و الابن هيموت والاخ هيموت كلنا هنموت يعني محدش فينا ماسك في التاني كل واحد فينا لوحده حتي لو اننا كنا مرتبطين بيلوجيا وعائليا بس احنا مستقلين برضه .و ال لاحظته والي اهم من كده ان الموت هو افضل حل لاي مشكلة اي حد قرفه اي شي لو فكر شويه هيلاقي ان الموت هيخلصة من المشكلة ديه بكل سهولة لانه مش هيحتاج اي حاجة من الدنيا. الموت برضه هو الحل لكل الغاز الموت والحياة والوجود ووجود الالة من عدمه يعني الي عايز يعرف اي شي و مش لاقي اجابته يستني لغايت لما يموت . الموت ده صعب اوي عامل زي الاختيار العشوائي كده مبيفرقش بين حد وحد و لا سن وسن و ولا لون وجنس والموت هو الشي الوحيد الي بيجمع اليشر وبيتساوي فيه البيض والاسود الغني والفقير اكله بيبقي زي بعض. الموت بيخليني مصر علي عدم وجود فروق بين البشر علي الرغم من الفروق العرضية (اللون-الجنس الخ)  والدليل علي كده اننا عمرنا مهنفتكر ميت عشان قوته و لا طوله ولا شعره و لا لونه انما بنفتكر الحاجات الحلوة الي عملها وكتير بننسي الوحش في حياته . فعلا الموت هوالحقيقة الوحيدة في حياة الانسان و كمانهو الحاجة الوحيده الي انسان عارف انها هتحصل في الغيب بس مش عارف امته...!؟

اول حاجة احب اقول ان عالم التدوين لسه صغير وصعب يأثر في الشعب كله من غير تفاعل مباشر مع الشارع...يعني ماحدش يقنعني ان مافيش حد في الشعب مش ماعندوش نت...ماعندوش تيليفون اصلا.....بس هاتكلم في الموضوع:

انا مختلف شوية مع العالم اللي بتهتف ديه في الحملة بتاعة كلنا ليلي....صحيح البنت بتتبهدل شغل في البيت....من اول مابتتولد لحد ماتموت وبالذات في المناطق الريفية مثلا(لان ابويا شاكمني انا واخويا عن اختي)...يعني البت من دول تقعد تخدم في اخواتها...ويضربوها علي قفاها...لحد ماتتنقل لحد بيت الزوجية...تبدأ تخدم في طحش اد العجل...ويعمل عليها راجل وهو لا مؤاخذة بره البيت(زي اغنية عنتر بتاعة فور كاتس)....بس برضه احنا بنعاني من تمييز عنصري....المجتمع مش سامحلكوا بمسؤليات وشغل كتير مش علشان بيكرهكوا...بيخاف عليكوا وبتصعبوا عليه......يعني من وانا صغير قاعد اضرب لما اتكلم في الفصل ...والمدرس يشيلني شنط المدرسة وافضل رافعها طول الحصة.... ولو نزلت ايدي يديني علي قفايا(لا يا روج خالتك مش انا بس...كلنا كده)...شوفي بقه البنت لو ضربت المدرس نفسه علي قفاه هايعمل ايه.....هايوقفها نص دقيقة ويقعدها...وناقص يقولها قماااان.....وبعدين فعلا انتوا بتدلعوا...يعني شغل البنت عمره ماكان زي شغل الولد...داحنا حتي بنشتغل مهنة غير مهنتنا...يعني شوفي المدرس في المدارس...بيعملوه سيكيورتي للمدرسه...يفض ويحوش في الخناقات....وينظم دخول الزيارات وخروج العيال اللي جايلها اذن....ده انا كده باتكلم عن المهن المشتركة...بس مثلا عمرك شوفتي بنت شايلة قصعة اسمنت وبتبني عمارة في بلدك؟.


ده مش معناه ان انا متحيز وحنفي...لا والله دا انا اليف....ومش شايف انه عيب ان الراجل يساعد مراته في البيت...يعني مايمنعش انه يعمل سلطه مثلا ...... يعمل مكرونة...بس فيه شغل هوه عمره ما هايعرف يعمله...وياريت ماتقوليليش ان الاب(حنفي برضه)هو اللي ماعلموش...الام(ليلي)هي اللي ماهنش عليها ابنها...وبعدين انتوا باصين للحكاية علي انها اخلاق وبس....حكاية تعامل الراجل مع الست قاسية وماقولتش حاجة بس ده خلاص بقه في الجينات...


وبعدين خميس ايه وبتاع ايه بس...الواحد مننا بيتخرب بيت اهله في هدايا في فترة الخطوبة...وبعدين يجيب شبكة باد كده....وده كله علشان شهر واحد بيبقي شكلها حلو وعاملة زي الموديل...بعد كده بتقلب علي موديل عربية...ماهو الراجل اكيد بعد كده لازم ياخد حبوب ومنشطات...ماتفقش علي الحجم ده كله...ولا هو تعجيز وخلاص.



ده كله كنت مختلف فيه شوية معاكي...بس ده مش معناه اني موافق علي الحاجات اللي مذكرتهاش(والله مانا فاكر هي ايه..اصلي كتبت كتير جدا)بس علي سبيل المثال...المسخرة اللي في الشوارع والجهل بتاع بادام مش محجبة يبقي هي عايزة كده...والتحرشات اللي من المدير في الشغل مثلا...بس مشكلة المجتمع المصري دلوقتي انه لسه في مرحلة انتقالية...يعني طالعين من مجتمع متشدد اوي...ورايحين للبواظان...يعني كمان خمس ست سنين هاتلاقي البوي فرند ده حاجة عاديه جدا(بوي فرند...ايوة قصدي علي اللي في دماغك)دايما بتبقي المرحة الانتقالية زبالة...يعني ايام التشدد كنتي تلاقي الواحد يتجوز في سن ال18....وفي المجتمع البايظ هاتلاقي الولد مصاحب(مش زي
المفهوم الموجود دلوقتي)من قبل كده...لكن دلوقتي البنات والولاد ماشيين في الشوارع لابسين من غير هدوم ومافيش ولا تشدد ولا بوظان...يا رب ول نروح لاي من النموزجين ونبقي معتدلين




الموضوع ده كان تعليق عند اوسه...نقلته مع شوية تعديلات...انا كنت عاوز اكتب في الموضوع ده من زمااان...وبالذات حكاية المجتمع والمرحلة اللي فيها...بس ماكنش عندي الشجاعة الكافية....قريت مواضيع كتير في مدونات بنات بس اوسه اكتر واحده سخنتني بصراحه

فراشه في الجنينه

و طير في السماء

و عيل صغير بيغني للحياة

وناس كتير مختاله بتدور عل الحقيقة
.........................
من فينا عايش من فينا مات

من فينا عايش بس ميت من فينا ميت لسه عايش

فين العدل؟ فين الحرية؟

فين التسامح و الحب ؟
فين النور ؟ فين الخير ؟
فين
فين
فين

مش عارف ....بجد مخنوق ... بقالي كتير ماشتمتش حد ياااه مخنوق اوي ومش راضي اغلط في حد عشان اخلاقي واحترامي و مبادئي هااااهااا حاجة تضحك وتخنق ان ناس تغلط فيك وتسميها حاجة تانية و ناستانية تعابين وسطنا ومش عايزين يغلطوا بس مش دلوقتي .... ليه الانسان موجود علي الارض وليه ناس معاها ملايين وناس معاها مليارات ليه البشر بيقتلوا في بعض عشاان ايه انا باضغط علي اعصابي بقالي فترة بس مش قادر ليه احترم حد وحد يحترمني ليه اعيش و اموت وليه اعيش ما دام هاموت في الاخر . وبعدين فين العدل فين الحرية فين كل حاجة فين ..مش عارف ليه ناس تعبد بوذا و الله و كرشينا و يسوع والبقرة والحمار ليه البشر كده ليه مش نوع واحد انا مش مستني اجابة حد علي اي سؤال من دول لان مفيش حد عنده اجابة عليها والي يقول غير كده يبقي حمار ... انا عايز ايه الي في حياتنا حقيقي وايه الي مش كدبه الحاجة الوحيدة والمفتاح الحقيقي لكل الحقائق هو الموت فعلا يعني الانسان لازم يموت عشان يعرف الحقيقة يااااااااااه علي الحياة كل البشر زي بعض مفيش فرق ليه كل التعقيدات ديه ليه كل واحد شاغل دماغه بمشاكل غيره ليه القرف ليه ايه الفايدة من ورا اي شي في الدنيا ما دام عايش و هتموت في الاخر يبقي ايه لازمتها التناكه و الاستهبال و الاستكبار و الكدب كل يوم علي ده وده ليه ليه بنكدب الحاجات الي احنا عارفينها ونحطلها اسباب تانية للاسف الاخلاق هي حجة الضعيف يعني انا ضعيف واي حد تاني عنده اخلاق ضعيف هاااا هي ايه الاخلاق اصلا القناعة و الاحترام والود و الايثار و الحاجات الهبلة ديه كلها الي مش موجوده اصلا دماغي انفجرت الله يرحمني مش عارف ايه مش عارف ليه قولت الكلام ده فجاءة وبدون مقدمات حاجه مش عارف اقول ايه مش فاهم ايه ليه .......الحمد لله

ازاي بنشوف الناس ازاي بنحكم عليهم و علي اي اساس احنا خدنا الحكم ده ؟ و ليه ؟ .... انا عن نفسي عمري ما باحكم علي حد علي اساس ديني او لون او طبقة او غيره وان كنت افضل ان اتعامل مع من هم في طبقتي و من هم مثلي ... لكن انا اكتر حاجة باستغرب لها لما اننا نحكم علي واحد علي اساس شكلي يعني واحد مطول دقنه يبقي متدين واحد لابس لبس مش مناسب لسنه بالضروري دحاح ... لكن ليه احنا حكمنا عليهم بكده حتي علي رغم من عدم تعاملنا معاهم ِ انا اكتر حاجه بحبها في حياتي هي الاختلاف في الفكر في كل شي مش معني كده اني بسعي اكون مختلف لكن بصراحه بحب اعرف ناس متناقضين ومختلفين في نفس الوقت ِ انا عن نفسي باشوف ان الانسان هو مجموعة من الافكار و الانسان بالنسبه لي تفكير مش لبس و دين او غيره يعني اكتر حاجه بتلفت نظري في الانسان هي طريقه تفكيره لدرجه ان في بعض الاوقات ببقي معجب جدا بطريقة التفكير الاسرائلية و تخطيطهم علي الرغم من اختلافي معاهم ... المهم نرجع لموضوعنا تاني انا لاحظت ان النظره لكل واحد مربي دقنه و مقصر هدومه يبقي متدين و جميل المشكله ان هي نظره مجتمعيه كمان و المشكلة ان في ناس بتحاول تفرض ان هو ده الشكل المناسب للشاب هو ده الشاب الملتزم المحترم حتي بدون النظر لاي شي ِ و بعدين اعتقد موضوع الشكل و اللبس ده ملوش لازمه لان الاخلاق و القيم والمبادي الي بيحكمها المجتمع و التربية مش اللبس و الشكل ... و الي اقصده من كلامي ان مش كل واحد مربي دقنه يبقي كويس فيه كده وفيه كده زيه زي اي واحد عادي والتعامل معاه عادي والنظر اليه لابد انه يكون عادي ..... لكن في فحياتنا ناس انشغلت بالمظهرعن كل شي في الانسان الجوهر الطيبة حاجات كتير كويسة التفكير وطريقته اهم جزء في الانسان من راي يعني

 

لعبة السياسة اقدم لعبة في التاريخ واصعبهم واطولهم من وجهة نظري . الغريب في السياسة ان كلها لعب من تحت الترابيزة مفيهاش لعب نظيف مينفعش و الغريب برضه  ان تخطيطها طويل يعني كل الي احنا شافينه ده تمهيد لشي يحصل  بعد عشرين او تلاتين سنة احنا بنبقي قاعدين زي الهبل بنفكر في حاجه وفي حاجه تانيه هي الي بتحصل واحنا مش عارفين . انا باشوف من وجهة نظري اننا كبلدوناس احسن ناس تتكلم في السياسة يااه تلاقي كام لراجل كبير قاعدين في بيت جدي والموضوع دخل في السياسة تلاقي 5 عمر موسي قاعدين و ساعات تسمع كلام يضحك واحد يقولك بن لادن عنده مستشفي جوا الجبل و هجص كده بس فعلا تحس ان عندنا الناس السياسة بتشغل جزء كبير جدا من حديثهم وتيجي بعد السياسة الكورة طبعا. الي بيزعجني لما يجوا يقولوا علي العالم الي زي مبارك والحكام العرب صناع قرار وهما مش كده هما منفذي قرار يعني نقدر نقول امريكا صانعة قرار و اسرائيل صانعة قرار والدول الي قادرة تحدد مصيرها بنفسها . في فكرة موجودة دايما وعبر العصور هي ان اي تغيير يجي بمساعدة خارجية بالنسبة لي مرفوض الغريب مثلا ان مفيش وجهة ثابتة او فكرة واحدة انما احنا عاملين زي دايرة وطالع منها خطوط كتيير  الخطوط ديه عمره مبتتقابل ابدا كل واحد شايف التغيير بشكل معين وبفكر مختلف اختلاف جزري وده كله في مصلحة العدو اي كان يعني انا معتقدتش ان موت مبارك او اغتياله هو الحل للمصريين ابدا انما اغتياله قد يحدث فوضي او يعملوا حركة حلوة ويقوموا يقبضوا علي كل واحد يتكلم ويعملوا مظاهرة مدفوعة الاجر مسبقا لجمال و هليلة والشهيد مبارك شهيد الامة وكلنا وراك يا جمال و جمال يطلع يقوله كلمتين ويعيط ويجبيلوه مناديل و يمسح دموعة و حبه عماد حمدي و كل تمام . حاجه كمان في السياسة الداخلية اي حاكم يجي من مصلحتة تشويه من قبله حتي ولو كان من قبله هو ابوه . اتمني اننا في يوم  من الايام ان انا ابقي واحد من الي بيلعبوا اللعبة ديه و ابقي من صناع قرار

البقاء لله لكل المصريين...البقاء لله في مصر...البقاء لله فيه حداثة جديدة لسه حاصله من حوالي ربع ساعة في شبين القناطر....قطر ركاب وقطر بضايع...قطر البضايع سادد المزلقان والاسعاف مش عارف يوصل للجثث...ولحد دلوقتي طلعوا خمس جثث بس والباقي مش عارفين يوصلولوا...مش عارف الناس هاتصحي امتي...لما ننقرض؟!حد يقولي

في يوم من الايام في سنه مش السنه دي .... كنت قاعد في نت كافيه و بعدين مندمج و قاعد بكتب عربي كالعاده بالحروف الانجليزي فجيه واحد كده قالي انه مش المفروض انك تكتب لغتك العربية بالحروف الانجليزي و قالي كده ممكن بعد كده الحروف تتغير بعد كده و اداني درس في السياسة و القوة الاستعمارية و الدين و اللغة العربية و ان هي لغة القران وكده و اننا لازم نحافظ عليها المهم في الموضوع اننا جيت افكر في الموضوع سالت نفسي هل لو الحروف اتغيرت هتاثر علي اللغة انا معتقدتش يعني
ya3ny ana dolkty momken akmel beat el modo3 keda
تخيلوا بقه لو الحروف اتبدلت و بقت بالحروف الانجليزية و بقت زي النت الدنيا هتبقي عامله ازاي ... انا عارف طبعا ان اغلبية المحلات مكتوب حاجتها بالانجليزي ... بس تخيلوا الاوراق الرسميه و البطاقه و كده
الحاجه الي عايز اقولها كمان اد ايه في ناس بتضحم الامور و تجعل منها كارثه منتظره و كبيره انا عايز الناس دي افكارها بتجيبها علي اي اساس مع الاحترام لكل

و انا ماشي في الشارع .... كان الشارع عادي و هادي مفيش صوت غير صوت الشجر فجاءة سمعت صوت ورا ظهري : يا رب يا رب ربنا معانا بصراحة اتخضيت خد جنب من الطريق وببص جنبي عشان اشوف الصوت ده مصدره لقيت انسان بسيط لابس قميص بسيط وعرقان اوي زي ما يكون ماشي من اول اليوم وبصلي وقالي : معلش يا ابني انا اسف اصل الناس كلها زهقانه صعب عليا اوي وفرديت وانا بهز راسي : مانا عارف
فقالي: اصل اخوك اسطي سيراميك و بقالي 21 شهر مش لاقي شغل
وبعدين سكت تاني وقالي : ربنا يوفقك يابني ونظر لي بعنيه المهموتين
عنيه كان فيها كلام كتير اوي
..................................
الراجل ده اختصر حاجات كتير اوي بالنسبه لي اختصر حاله بلدنا والعالم الي عايشه لعالم الي تحت اوي في اعماق اعماق المجتمع المصري اداني فكرة عن بكره وعن امبارح ...... يارب ربنا معانا

"لو كان الفقر رجلا لقتلته " قالها الامام علي بن ابي طالب كلمه كلها حكمه و تحليل جيد للامور ولما جيت افكر في الكلمه ديه حست ان لو كان الفقر رجلا لقتلته و بعد كده قطعت راسه و علقتها علي عامود نور. لما جيت افكر في الفقر وتاثيره علي الناس و تدميره لحاجات كتير يعني انا ممكن اتكلم عن الفقر بس عمري ماعشته اتكلم عن اظلم بس لسه ما حستش بيه اوي و ممكن اتكلم عن الحريه مع اني مش مقيد اوي او محبوس يعني الانسان بيتكلم عن الفقر بس عمره ما فكر في احساسه لو كان مكان الفقير ده يعني كتير بالاقي ناس نايمه في الشارع في عز البرد متغطيه بورق جرايد ونايمه علي ورق كرتون وانا ببص كده ممكن يصعب عليا بس عمري ما فكرت في صعوبه الشي ده في حد ذاته . و الفقر زي حاجات كتير عمره ما كان اختيار يعنيمفيش حد بيختار يبقي فقير او غني انما هو لظروف خارجة عن ارادته بيبقي كده و الي لفت نظري ان الفقر بياثر بشكل كبير في الانسان يعني الانسان الفقير مش ممكن يفكر في الحريه و التعليم و الظلم وهو مش لاقي ياكل و مش لاقي سكن و ده بياثر فيه فبيصبح غيرقادر علي اتخاذ موقف من حاجات كتيربتحصله وشوية شوية هيفقد احساسه وانسانيته و هيصبح زي الاله و هيفقد شعوره وانسانيته و هيحاول يتغيب غن الواقع الي هوعايشه بعد كده بيفقد ارادته و قدرته علي فعل اي شي و بيصبح بعدهازي الطور المربوط في ساقية زيه زي جاره زي الي بيقعدوا معاه علي القهوة و العلاقه بين الجهل و الفقر علاقه وثيقة كل ما يزيدالفقر يزيدالجهل مش ضروري يكون الجهل بالقراءة و الكتابة و الجهل بيغمي عين الناس ويخليهم ينخدعوا بسهوله و ينقادوا في نفس الساقيه .... انا لاحظت حاجة غريبة لاحظت ان حياتنا كلها سواقي و كل واحد بقي و ساقيته ..و لاحظت ان السواقي دي متظبطه كويس اوي علينا و ازاي ان الحكومه هي الي بتدخلنا الساقيه ديه لغايه لما بقي في سواقي كتير لكل واحد فينا واحده و د بيخلي الناس تلف تلف و ميبقاش عندها لحظه تبص في ظروفها وحياتها و تفكر........ تفكر بس