"احنا جيل الخلاص اناحاسس بكده احنا الي هنخلص الناس من الظلم" كلمة قولتها كتير لنفسي وكنت مؤمن بيها اوي وحاسس بيها وكلي حماس ..بس فجاءة في حقاءق كتير ظهرت قدامي ماكنتش ظاهرة . انا مؤمن باننا لازم نتخلص من الظلم... بس انا اتصدمت باكتر من حاجه موجودة في مجتمعنا لما جيت ابص لشي زي المدونة دي لقيت اني ممكن اكتب و اكتب واكتب وكل الناس عامة هتكتب بس مين الي بيسمع انا المشكلة ان احنا بنكتب و الي بيقراء ناس زينا مؤمنيين علي الاقل بافكار من افكارنا و بقينا كلنا قاعدين نكتب ونعلق و نشتم بعد بس بعد كدة هنعمل ايه سؤال من اسئلة سالتها ....حاجة تانية فكرت فيها وحسيت بحيرة و نوع من الصراع مع نفسي هل لو انا قررت اناضل الظلم هاكون باعمل كدة عشان ايه عشان الناس والبلد ولا جزء مني بيفكر في الشهرة و عايز يبقي بطل سؤال اعتقد كلنا لازم نساله لنفسنا ...حاجة تالتة بتحسسني بحزن ان اغلبية الشباب منفض للحوار ومش هماه البلد حتي الشباب الي بنعتبرهم ملتزميين اخلاقيا يبقي الموضوع مش موضوع اخلاق وقيم و من راي السبب في خوفنا من السياسة هو تاريخ طويل من الظلم حوالي خمسين سنه ياااه خمسين سنة واكتر كمان في تاريخنا الحديث الكل بيكره النظام تقريبا مهندسيين , محاميين , فنانيين , اطباء , تجار يعني تقريبا كل فئات المجتمع ده بالاضافة ل سواقين تاكسي , الشحاتين, العيال الي بتبيع عيش بلدي علي الارصفة, بتوع دقيقة المحمول بخمسة وسبعين قرش, الصنايعية الغلابة... المشكلةبنسبالي في التناقض الغريب الاب بيصدر الكره للابن يشتم الحكم والبلد قدام ابنه لكن يمنعه من انه يوقف ضدهم يعني الاب يشتم والابن عليه انه يحترم الي بيتشتموا بس يشتمهم في الحمام المكان الوحيد الي هوه حر فيه في مصر..والعالم العربي ....اخر حاجة اليعايز اقولة ان انا قدام خيارين اتصدي للظلم ولا اكبر دماغي واسكتووالخيارين اصعب من بعض لاني بحب البلد دي جداا جداا والمشكلة ان في حاجات الانسان مبيملكش فيها قراره مش عارف انا ... عشان اقفل الموضوع احب اقول اني مؤمن بنضالنا ضد الظلم بس الواقع يمكن صدمني شوية علي العموم ربنا معانا و احنا بنعسي ........
Subscribe to:
Post Comments (Atom)
العيب مش فينا ولا في قدرتنا ولا في مشاعرنا تجاه الفساد...لو ركبيتي ميكرو بص هاتلاقي الناس كلها كارهة مبارك وابنه جمال حبيب الملايين....العيب في عقلية الشعب وعقيدته التسامحية....من وانا صغير لو حد ضربني في المدرسة الميس تقوللي قولوا ربنا يسامحك...حتي في المناهج والاعلام.فيه تسامح مع الظالم لدرجة الهبل...ولو اتكلمتي مع اي واحد من الاف الغلابة اللي بيشيلوا الزبالة هايقولك وانا هاعمل ايه يعني ربنا يسامحوا او ربنا ينتقم منه....انا مرة ركبت مع سواق تاكسي بعد مظاهرة مع لبنان في ميدان التحرير بتاعة كفاية وجعلي دماغي ان الظلم في الشارع في اليوم العادي جائر وان المظاهرة مش بيحصل فيها حاجة...طيب مابتتظهرش ليه...دا انت اللي تعبان مش الصحافيين ولا القضاة ومع ذلك انت نايم وهم بيتظاهروا عشانك....يقوم يقولي حزبي الله ونعم الوكيل ويرجعني لنفس النقطة من البداية....الشعب ده محتاج سنيين علشان يغير عقليته المسالمة
انا كمان مكنتش عارفة اعمل اية عشان الحق البلد دية ولما فكرت في حكاية المدونة قلت اهي نواية تسند الزير ولو ان الزير كبير قوي وممكن يدغدغ علي دماغي ودماغ اللي جابوني ولكن تبقي خطوة اولي عشان اقول رأيي وافضح الظلم علي قد ما اقدر وعلي فكرة المدونات مش بس بيقراها ناس زينا لأ دة فية ضباط محترمين بيحبوا يطلعوا علي هذا النوع من الادب البراني حسب رأيهم وكمان في جواسيس لبلاد تانية عايزين يشوفوا درجة القرف وصلت لغاية فين عند الشعب المصري عشان يقرروا التدخل امتي ، شوفت بقي ان في ناس كتير بتقرا مدوناتنا
انا عارف ان فيه ناس كتير بتقرا مننا بس الي اقصده اني عايز صوتنا يوصل للبسطاء والغلابه الي هما الاغلبية لاننا بنتكلم وناقش قضايا بتاعت ناس مش حسا بالي هما فيه ... اهم شي ان صوتنا يوصل لدول وبقوة