مش فاهمني

الصورة ليا(لابس اسود)وعلاء اللي هو المقحاوي




مش عارف نفسي
ده مش تهييس ولا اي كلام
او انا عارف نفسي في الاصل بس من كتر واختلاف شخصيتي قدام كل مجموعة اعرفها بقيت مش عارف نفسي
انا مين بجد مش عارف
قدام عيلتي انا شخصية بتقعد تقلش وتقول نكت سيريانية
بيتهايئلي اني من كتر مابهزر في البيت اختي فاكراني عبيط او حاجة واني باقعد اقلش وارخم عالبشر كده في الشارع او باعمل مع الناس الحركات الطفولية اللي برخم بيها عليها
اخويا علشان شباب زي بعض وكده عادي...وهو اصل اخنق من اني اخنق عليه...يهودي من الاخر
عيلتي الكبيرة برضو فاكراني شخصية هبلة بتضحك 24 ساعة وبتقول نفس النكتة علي مدار السنة
وفيه ناس منهم باسمعهم يقولوا عليا مجنون من ورايا...كلمة مجنون ديه ملازماني من وانا في الكيه جي
بعد مشاكل كتير عانيت منها وانا في اولي ثانوي مع مدرستي كلها ووصلت لاكتئاب رهيييييب وكذا مره فكرت انتحر
رحت مدرسة جديدة ماكلمتش فيها اي حد ومابقولش اكتر من 3 كلمات في اليوم
صحابي اللي كنت اعرفهم من زماان منهم جيران قدام ساكنين دلوقتي في نفس المنطقة بتاعتي لاني مانقلتش بعيد
واللي كانوا معايا في مدرستي بتاعة ابتدائي واعدادي
فاكرني شخصية تربة لسه مش فاهمة اي حاجة وخاام جدا ويدوب حافظلها كام كلمة صايعة فرحان بيهم وبيحاول يصيع ولما كتبت بوست عني قعدوا يتريقوا ويقولوا ايه الهبل ده
لانهم مش عارفني اصلا واول مره يسمعوا الكلام ده مع اننا صحاب من ايام ماكنا 7 سنين
وحسوا اني بألف واني اخترعت شخص في خيالي
العيال اللي في العمارات اللي حوليا شايفني واحد جامد وبيخافوا يتكلموا معايا لاني باقلب اي حاجة لمعني وسخ واضحكهم علي بعض
اللي معايا في الدروس يدوب مساء الخير وضحكة صفرا
وعلشان الناس مش فاهماني حسيت اني اتعودت علي الشكل اللي كل واحد فاهم ان ده احمد عزت
ولما ابقي قاعد مع اي مجموعة منهم مش عارف ليه باحاول احافظ علي نفس الشكل
ولما يجتمع حد من اي مجموعة مع حد تاني من مجموعة تانية باحس اني مرتبك ومش عارف اقول حاجة وغالبا باتخانق مع حد فيهم علشان افرق الاشكال
وسيبت صحاب كتير لما اتجمعوا صدفة كذا مره لاني حسيت اني ممكن اتكشف
مش فاهم اتكشف ليه هو انا عملت حاجة
يعني السنة ديه كان معايا ناس من مدرستي الجديدة وواحد من اولي ثانوي
اتخانقت معاه وخسرته بسبب انه كان بيعاملني بطريقة بينتني لبتوع مدرستي الجديدة اني مش احمد اللي يعرفوه
نفسي احس ان فيه حد فاهمني
بس بيتهايئلي مش هالاقي لاني انا نفسي مابقتش فاهمني

37 comments:

  1. مصرى said...

    يا عربي عادي إن الواحد ممكن يكون ليه أكتر من شخصية تتغير تبعا للظروف أو للناس اللي هو معاهم و كمان ممكن تتغير مع الوقت
    و الموضوع ده مش عندك بس ده عند أي حد

    بس تصدق أنا النهاردة أول مرة أعرف إنك
    تبع عمك القمحاوي مدير تحرير أخبار الأدب مش تقول يا راجل كنا عملنا معاك واجب
    :)  

  2. 3rby said...

    عمي؟
    ده ابويا
    بس انت عرفت منين؟  

  3. shady said...

    عادى يا عزيزى تايه فى كام شخصية عادى خالص مافيش مشاكل
    أنا أعرف واحد صحبى
    هليس وبتاع مساخر
    وحكيم وهمه على البلد
    بيطلع مظاهرات تقلش حيصلح الدنيا
    ويقعد على القهوة يشرب شيشة ويحكى عن جسم هيفا تقولش ضاربها صرمة
    وعقله صغير تضحك عليه بكلمه
    وفاهم بلاوى الدنيا وله فى البشر نظره
    وفى الدنيا حكمه
    حقولك كل سنة وانت طيب تانى؟! هههه  

  4. Rasha said...

    شوف يا احمد
    طبيعي انك متكونش نفسك مع ناس مش زيك او ميستحقوش يعرفوا احمد هو ايه مش شرط تكون الناس فاهماك قوي حلو ان الانسان تكون ليه شخصيته الي الكل عايز يفهمها او يقرب منها صدقني مش كل الناس تستاهل انها تفهمك المهم والحاجه الي انت لازم تكون فاهمها هي انت وانا متأكده انك عارف انت مين وعايز ايه..انا برضوه مع اصحابي الي زي بكون انا بشخصيتي وبطبعتي بكون زي ما انا مش بفكر كتير معاهم هما ازاي حيفسروا الحاجات الي بعملها وبقولها عشان هما يعرفوني كويس

    مع اهلي برضوه شخصية مش فاهمنها وعشان مش فاهمنها بيقولو عليا غريبة واوقات كتير مجنونة بس بالنسبة ليا انا بحب ان الناس مش فاهمين لاني بصراحة فاهمة انا مين والي عايزاه يعرف انا مين بس هو الي يعرفني والباقي مش مهم..

    مش تدايق يعني انت جميل كده
    اختار الناس الي بتحبهم وبتحب تكون معاهم واكيد هما عارفين انت مين باقي الناس حيعرفوك من مواقف من ظروف واهلك حيعرفوك مع الايام
    واكيدوانا متأكده انهم فخورين فيك
    دلوقتي وبعدين

    انا صلحت البلوج وكلوا تمام دلوقتي
    وكل سنة وانت احمد القمحاوي الامور  

  5. مصرى said...

    عمك أبوك كلهم إخوات

    بس إنت إسمك في بوست قديم أحمد عزت
    و لقيت إسم عيلتك القمحاوي

    يبقى أكيد عزت القمحاوي  

  6. ahmEd_H said...

    بص بقى يا برنس خليك مع الى بيفكر فيك

    اول حاجه لازم تظم حياتك يعنى كون فى وقت للتهييس فى وقت جد فى وقت مذاكره وقت الصلاه تروح تصلى قرايبك اللى بيتخنقوا من هزارك فكك منهم صاحبك اللي مش عجبه كلامك ماتنصحوش تانى لحد لما يحتجلك اعمل لنفسك كاركتر و خش جواه وصدقنى لو نظمت وقتك الحيا حتنتعش معاك  

  7. 3rby said...

    الجميع:
    يعني انا كده طبيعي مش عيان ولا حاجة؟

    شادي:
    عادي يا عم هو جسم هيفا فيه حد مابيتكلمش عنه:)
    وبعدين انا باروح مظاهرات وانشاء الله هاغير مصر وابقي الرئيس
    ابقي ادخل حزب المندسين هاتلاقيني حاطت ليها لنك بره

    the first lady:
    وانا اخترتك انتي
    :)
    ابويا فخور فيا:)
    بس امي خايفة عليا بتقولي انت اخرك المعتقل وعلقة وبعديها هاتقول البلد ديه مفيش احسن منها


    مصري:
    انا ابنه
    بس فيه عزت القمحاوي كتير
    احنا لينا فروع في الشام
    وعبد البديع القمحاوي الله يرحمه كان صاحب بابا بس ماكنوش متاكدين انهم قرايب مع ان ابويا من قرية تابعة لمركز عبد البديع
    احنا كتييييييييير
    تعرف جدي ليه كام حفيد
    حاجة واربعين

    اتش:
    عندك حق
    اللي انا مالزموش طز في امه  

  8. 3rby said...

    رشا
    لسه عاوزة ابنك يبقي شبهي
    لو مصرة يعني ممكن نتجوز في الصيف
    مش هايبقوا ولادي
    دول هايبقوا نسخ مني
    وكده هابقي باقرب لنفسي من 300 ناحية  

  9. Lasto-adri *Blue* said...

    لا لا عادى يا عم عربى يبقى عندك بدل الشخصية مية

    ولسا ياما ح تبدل فى شخصيات لحد ما ترسى على حاجة او اتنين

    ممكن تتخنق منهم.. عادى عادى
    ومكن تحبهم مووت.. عادى برضو

    بس تاكد انه لسا مش دلوقتى.. قدامك سكة سفر

    يلا يا زعيم التهييس
    كل سنة وانت طيب
    وفك التكشيرة... محدش واخد منها اى حاجة  

  10. ذو النون المصري said...

    اعتقد ان الانسان يعيش باكثر من شخصيه امر عادي هذا لا يعد تعدد شخصيه لكنه مجرد تعديل في الخطوط التفصيليه للشخصيه كي يحدث بين الانسان و مجتمعه توافق يهيء له فرصة اندماج افضل لان الانسان بالطبع لا يعيش منفردا و طالما هو في حاجه للاخرين فبالضروره لابد ان ينزل عن بعض خصائص نفسه لان البشر مختلفين و لا شبه بينهم
    هذا امر عادي جدا و لا مشكله فيه  

  11. ذو النون المصري said...

    كل سنه و انت بخير و جميع افراد اسرة التدوين بالف خير  

  12. 3rby said...

    بلو:
    منور يا زعيم:)
    كل سنة وانت بخير
    طمنتيني والله
    يعني انا مش عيان ولا حاجة
    طب كويس
    كل سنة وانتي طيبة

    ذو النون بتاع الفصحي:
    ازيك يا باشا
    شكرا علي مساعدتك
    وكل سنة وانت طيب
    والبلوجرز اليوم في عيد  

  13. Nouran said...

    ايه يا عم ده يعني انا قلت هخش الاقي صورة بلالين صورة اي حاجة تدل ع العيد ابقى مهد خاف ع زوار البلوج يا شيخ هههههههههه لا متزعلش انا بهزر شكلك معذب الناس بالهزار يالا حد ياخد بتارهم
    ع فكرة مش هينفع كده كل حاجة ابقى مخططه اني اكتب فيها الاقيك ماشاء الله سابقني ولا كانك ف ثانوية عامة-حته رخامة كده-بس ع فكرة طبيعي بس هتلاقي ف كل الشخصيات دي صفة اساسية فيك يعني انا الصفة الاساسية هي السخافة بعيد عنك المهم هتلاقي في شخصية من دي اقرب اوي من الحقيقي بتاعك برضه انا اكتر شخصية بحسها انا الشخصية الافتراضية شمعة يعني شمعة دي نوران بس اللي جوه اللي كتير مش عارفنها شفت بقى ع فكرة كل مرة اجي اكتب تعليق ليك يتقلب بوست حاجة صعبة فعلا
    حاجة تانية امتحان اميكانيكس جه صدمة وقلبت معايا تهييس وكنت ناسية المسالة بتتحل ازاي قعدت 5دقايق افتكر تخيل امتحان ساعة فيه مسالتين اكس لارج وواحد دبل اكس واقعد افكر ف 5دقايق ف اتفه مسالة بس الحمدلله ف الاخر حليت
    حاجة تانية هو فين منجي مختفي وانت استوليت ع البلوج
    اخر حاجة بقى كل سنو وانت طيب انت ومنجي  

  14. smraa alnil said...

    لالالالالالالالالالالالالالالالالا
    مش واخدة عليك في الجو الحزايني دة
    بص بقي يا ابو العراريب
    طالما زي مات بحكي كدة
    يبقي لازم وقفة مع النفس
    فكر جوة اعماق معاميقك عن عربي بجد
    شو انت غلط في ايه
    جايز كلامي يزعلك شوية
    بس انا بحس ان ردك دايما ناشف كدة واحنا بناخد ردك دة علي اساس حسن النية
    بس في اكيد غيرنا مش بيعمل كدة ودة الجانب اللي انت بتتكلم عليه وبيفهمك غلط

    يبقي لازم تشوف انت مين وفين وازاي عشان تعرف تعيش الحياة صح
    راجع نفسك في حاجات كتير
    مش عيب انه يكون ليك اكتر من شخصية بتعامل بيها بمليون وش مع عشرات البشر
    بس لازم كل فئة دي بقي اتعامل معاها باللي هي عايزاه
    انا مش بقول انك تلغي نفسك او كون زي مانت واضرب بدماغ الناس دي الجزمة
    لا بس انت لما تشتغل كدة هتلاقي نفسك مجبر انك تتعامل مع رئيسك مثللا بطريقة معينة ومع اصحابك في الشعل بطريقه
    والبيت بطريقة ومراتك بطريقة وولادك بطريقة يعني اختلفت طرق المعامله مع كل فئة
    طالما بتحب لناس يبقي اعرف ايه اللي يضايقهم منك ومش تعملوا وكفاية برضه انك تكون نفسك
    بس بتغير وتعديل في الشخصية
    تععدت الشخصيات والشخص واحد
    طولت عليك بس مش تزعل مني اوكي  

  15. emz said...

    يا عم احمد .. مالدنيا كلهاغ ماشية كده

    كل واحد تلاقيله بدل الوش مية
    واحد فى الشغل واحد مع الاصحاب و احد مع الاهل و و و

    بس الاهم انك تلاقى نفسك بجد .. شخصيتك الحقيقية
    طول مانتا عارف هى انهى واحده فيهم خلاص

    و على راى رشا
    بين شخصيتك الحقيقية للناس اللى يستاهلوا بس
    تحياتى  

  16. emz said...

    انا بنت عادية جدا
    بس لينك المدونة اتغير
    http://infinite-grief.blogspot.com  

  17. ذو النون المصري said...

    تشكر يا سيدي
    و كل سنه و انت طيب  

  18. A L A B D E L R H M A N . said...

    اول حاجة كل سنة وانتا طيب ودي اول زيارة ليا عندك ويشرفني كتير
    اعياد مباركة

    .العَبدِالرَحَمن  

  19. Rasha said...

    عربي
    حبيب قلبي كل سنة وانت طيب واعياد سعيدة ليك ولاهلك ولكل الناس الي بتحبهم

    :)

    والسنة الجاية تخلص سانوية..
    ;)وتبقى مهندس قد الدنيا..



    منجي
    انت فين وحشتنا قوي ..
    ووحشتني بصراحة جدا

    كل سنة وانت طيب يا جميل
    ومتفوق دايما

    (F)s

    .: HappY NeW YeAR :.  

  20. Nony said...

    مش ممكن .. كأن انا اللى كاتبة البوست دا
    نفس المرض اللى عندى بالظبط .. يا سبحان الله
    مش عارفة انا هفضل كدا طول عمرى بمليون شخصية و لا بعد كدا لما أكبر شوية هثبت على حاجة
    المشكلة انى فعلا معنتش عارفة نفسى أحيانا هادية اوى و رقيقة و ساعات مجنونة و مببطلش كلام و ساعات رومانسية و حالمة و أحيانا شقية و دلوعة هو أكيد فى مبادىء لشخصيتى مش بتتغير لكن دايما بحس انى مش ثابتة على حاجة معينة .. و فعلا بعامل كل حد بطريقة و بتأزم اوى لو تخيلت هتصرف ازاى لو اتجمع مثلا قرايبى و عيلتى
    حاجة تقرف  

  21. 3rby said...

    كتبت تعليقات كتييييييير وبعدين حصل ايرور
    كنت كاتب لكل واحد بوست
    المهم هاختصر علشان ماتفقعش


    نوران نجفة:
    المشكلة اني مابقتش فاكر الشخصية الاساسية عاملة ازاي علشان اكتشف انهو واحدة اقرب
    منجي مش لاقي حاجة يكتب عنها وكمان معتزل في بيته علشان الفار اللي كان مربيه مات:)

    سمراء:
    تعرفي حسن النية ده عاملي مشاكل كتييييييييييير جدا في البلوجينج وفي حياتي وبازعل من حاجات هبلة جدا وباستغرب لما ازعل حد حتي ولو كانت حاجة صعبة
    بس طبعا ماقدرش ازعل منك يا باشا
    انا اللي خايف لاكون زعلتك مره بحسن نية


    بنت عادية جدا:
    منورة يا قمر
    المشكلة اني مابقتش عارف انهو واحدة هي الاصلية وانهي المغشوشة

    ذو انون:
    كل سنة وانت طيب يا زعيم


    العبد الرحمن:
    كل سنة وانت طيب

    da first lady:
    كل سنة وانتي زي القمر
    منجي مش لاقي حاجة يكتبها فاهيكتب في اجازة نص السنة

    نوني:
    مرض؟!
    :)
    طيب اقري التعليقات وشوفي الحل المناسب
    البلوج بلوجك يا زعيم



    سمراء:  

  22. Nouran said...

    طب بص قلي عيد ميلاده امتى واجبله فار بدل اللي مات هههههه
    يا عم استهدى بالله وانت هتفتكر انت مين بالظبط:))  

  23. elkamhawi said...

    يا شيخ بقى انتا مش عارف ليه العيلة بتقول عليك مجنون يعنى انتا عايز تقولهم بتشوف النملة وهى معدية على حيطة العمارة اللى قدامكو فى الناحية التانية من الشاعر وميقولوش عليك مجنون .
    وعايز تقولهم فى واحد صاحبى مربين حوت فى البانيو بتاعهم وعايز تقولهم بابا واحد صاحبى كان طيار طلع على المعاش فقاموا اولوه طيارة هدية بيركنها فى العمارة .يا شيخ
    وعايز تفضل تقولهم فى نكته باردة لمدة سنتين بمعدل 10مرات فى اليوم وميقولوش عليك مجنون ده المفروض يقولوا عليك كافر  

  24. 3rby said...

    نوران:
    ايوة ايوة انا افتكرت
    انا الخط
    :)

    علاء:
    اول حاجة النكتة قولتها لنوران وماقلتش حاجة
    ثانيا حكاية النملة ديه كانت وانا صغير
    ثالثا الواد اللي بتقول عليه هو اللي كان بيهس وكنت باحكيلكم عليه واضحكوا لكن نعمل ايه اصل كل حاجة في العيلة وراثة
    :)
    سيح سيح ياعم الحج  

  25. empire said...

    بس ايه الصوره الجامده دى  

  26. دعاء عادل said...

    كل سنه وانت طيب يا احمد
    تعرف ان دى احسن حاجه فى الدنيا ان الناس متبقاش فهماك وانت فاهم كل حاجه
    واصلا كلمه مجنون دى مدح مش حاجه وحشه هو اى حد يقدر يبقى مجنون مش اى حد معظم الناس تقليديه وغريبه
    فا استمتع بالحاله دى وتوهم اكتر واستمتع بجنانك وعيش عليهم اكتر
    اوك يامان  

  27. 3rby said...

    empire
    المفروض تبقي
    emperor
    يا عم ولا حلوة ولا حاجة
    عالعموم شكرا


    دعاء:
    المشكلة اني مابقتش فاهم اي حاجة عن نفسي
    وده اهم ليا من اني ابقي فاهم الناس ومش فاهمني
    بس تعرفي اني كده بقيت شبه الناس في حاجة خطيرة
    كلنا مش فاهمني
    اوك يا وومان  

  28. صفصف لادي said...

    واد يا عربي
    انت سبت قطر امتى؟
    حاسة اني شفتك في مول او مطعم مثلا

    مش عارفة ليه وشك من النوع المالوف بالنسبة لي

    يلا سلام و كل سنة و انت طيب  

  29. 3rby said...

    حفصة:
    وانتي عرفتي منين اني كنت في قطر
    فاكراني يا كذابة
    انا سيبت قطر وانا عندي 4 سنين
    الحمد لله اني ماتعلمتش فيها احسن كان زماني عندي تخلف
    ابويا ساب قطر علشان نتعلم في مصر  

  30. أنـــا حـــــــــرة said...

    يااااااااااااه فاهماك اوى يا عربى
    على فكرة وجود شخصيات كتير جوانا ده صح و شئ صحى و طبيعى
    انت مش بتمثل لكن لكل مقام مقال  

  31. 3rby said...

    طلعت واضح زيك يا ياسمين  

  32. empire said...

    لا يا عربى
    empire
    يعنى امبراطوريه
    مش
    emperor  

  33. empire said...

    انتا هتعمل بتاع  

  34. 3rby said...

    يا عم انا فاهم
    المفروض المدونة تبقي
    empire
    وانت تبقي
    emperor  

  35. Anonymous said...

    يا كابتن احمد ...
    بعد التحيه....
    انا لسه سامعه نفس الكلام ده من اخويا امبارح وعلى فكره اسمه احمد زيك وفى نفس عمرك
    علشان تتخلص من الاحساس ده فى رايى انك تحاول تنسى كل الافكار اللى بقت ماليه دماغك عن تفسير الاخرين لشخصيتك ..انسى خالص اكيد انت تعرف قصه جحا اللى علشان حاول يرضى الناس اللى حواليه ويظهر بشكل مناسب لما يعتقدونه صحيح تعب ووصلت انه عمل فى الاخر تصرف اغرب ما يكون وبرده معجبش اللى حواليه
    المهم انا شايفه ان الحل ان الشخص نفسه هو اقدر الناس على تفسير شخصيته ويعرف عيوبها ومميزاتها كمان ويقدر يقيم نفسه قبل الناس ما تقيمه ... ولو الانسان حاول انه يحدد اهدافه فى الحياه وخاصه لو كانت اهداف الكثير يعتقد انها اهداف بجد مهمه على اى مستوى وحاول بوضوح يسعى ليها ....اكيد كل اللى حواليه لازم يحترموا طريقته
    بس لازم الانسان يكون وسط فى كل شىء حتى يشعر باحترامه لذاته اولا يعنى مفيش مانع من انى اهزر بس فى المواقف الجاده اكون جاده ولا انافق ولا اجامل احد على حساب مبادئى واعمل اى شىء انا عاوزه بجراه طالما انه اولا مش بيغضب ربنا وميهمش اى حاجه تانى بعد كده ...انا لن اكون الا نفسى واللى مش عاجبه يشرب من البحر  

  36. 3rby said...

    الحجة انونيموس:
    اول حاجة شكرا عالزيارة
    بقالي زمن ماجليش انونيومس
    كلامك كله حلو ماعدا اخر حتة
    حطيتي قيود عالحرية واني ماهزرش كتير وبعدين اعمل اللي انا عاوزه
    عالعموم انا الحمد لله خلاص خرجت من الحالة ديه
    ونورتينا  

  37. مُزمُز said...

    بص أنا برغم ان الموضوع قديم بس حبيت أعلق عليه يمكن أضيف حاجة

    هو السن بتاعك ده في الغالب كده بيبقى الواحد ليه كذا أسلوب في التعامل مع الناس ولما تفكر مع نفسك تلاقي نفسك مليون حد وفي مليون اعتبار

    بس عادي يعني بعد فترة هتلاقي نفسك شخصية مميزة ليهل أسلوبها وفكرها الخاص وطريقتها في الحياة والتعامل ولحد ما ده يحصل وأكيد قريب مع النضج هيحصل لا زم تحافظ جواك على تلات ثوابت متتغيرش ابدا في أي مكان ومع أي حد عشان تفضل عارف أحمد وماسك الخيط اللي بيجمع بين كل الشخصيات اللي جواك والثوابت التلاتة دي هي الآتي

    واحد اوعى تنافق حد أبدا ولا تقول رأي مرتين ويكون مختلف يعني اوعى تكون ازدواجي سواء كنت أحمد المهيس أو أحمد الصايع أو أحمد الجاد أو أحمد المؤدب بس اوعى تكون بكذا رأي هو نفس الرأي ونفس وجهة النظر متغيرهاش عشان خاطر عيون حد مهما كان

    اتنين تحافظ في كل حالاتك على إنك تكون أحمد الإنسان بالمعنى الحقيقي للإنسانية

    تلاتة تحافظ في كل حالاتك برضه إنك تفرق بين الهزل وبين الجد بسرعة وتحافظ على الشعرة اللي بين الهزار والتهييس وبين العبط والهطل سوري يعني

    متهيألي التلات حاجات دي لو حافظت عليها عمرك ماتلاقي نفسك تايه أو مش لاقي نفسك

    سلام بقى ومعلش على الإطالة ويارب تشوف التعليق ده