الذبيحة

قريت كل اللي اتكتب عن صدام اول لما رجعت امبارح من البلد وماجليش نفس اعلق فاهعلق هنا وخلاص
والكل مجمع علي الرسالة المبعثة الينا
الذبيحة اتذبحت بس الذبيحة عكس اول اضحية
بنضحي في ديننا بالخرفان فدائا للبشر علي سنة سيدنا ابراهيم
بس الكفرة دبحوه هو فدائا للخرفان...اتدبح حتي قبل اي خروف هايتاكل
بس الرسالة اللي مافيش حد خد باله منها
وبيتهايئلي هي الاساسية
هي رسالة لو القنوات بينت الصوت في المحاكمة كانت هاتخلي العراق يولع...طيب ماهو والع خلقة من ايااااام الحجاج والتاتار واكيد قبل كده بس انا ماوعاش
لا ده هايشيل العراق من الخريطة ويسيب مكانه خرم في الخريطة
الرسالة موجهة للسنة
يا سنة الشيعة ذبحوا صدام زي الخروف
طبعا الشيعة مايفتخروش باللي حصل وانهم زقوه قبل مايتشاهد
بس هو ده اللي حصل...وهو بينطق الشهادة كان فيه واحد جنبه بيقول
اللهم صلي علي محمد وآل محمد وبكر الصدر
الي الجحيم يا طاغية
مات الطاغية
اللي حصل ده ومن قبله المحاكمة خلاني متعاطف معاه مع اني متاكد من انه كان ظالم زي كل حكام العراق من اول ماكان فيه عراق
شفت فيديوهات اعدام لمعارضيه افظع
شفت عند علاء(القمحاوي)اعدام لمعارضين ليبراليين بالاغام...حطهم في حفرة وحط معاهم قنابل وغطاهم بالرملة لحد راسهم وفجر
بس انه يتحاكم تحت احتلال ديه مصيبة
ويقولك المحكمة عراقية
طب ماهو مع الامريكان...يعني لنفترض جدلا انهم كانوا برأوه تفتكروا الامريكان كانوا هايسلموه للعراقيين؟
وبعدين شهود الادعاء مش بيظهروا قدام الكاميرا ولا الحراس وكمان فارضيين عليهم حماية مشددة اما شهداء الدفاع والهيئة الدفاع مش حامينهم وبيقتلوهم ومش بيوفروا للي عاش منهم فرصة للكلام
جلسات كاملة استماع لشهود الادعاء وبيتلككوا لشهود الدفاع علشان يطردوهم
ويقولك الحكم عادل
والمضحك انه حارب 8 سنين مات الاف ويمكن ملايين بسببه وبايده
ويجوا يحاكموه علي 100 واحد قتلهم لما حصلوا محاولة اغتيل
ماهم مستعجلين علشان العيد جاي وكل واحد عاوز نايبه...ونحاكمه علي ال100 بدل مايفضحنا لو حاكمناه علي غزو الكويت والناس اللي ماتت في الغزو ده
ماهوا احنا مش هاينفع نقص المحاكمة كلها داحنا لما بنقطع دقيقة الدنيا بتقوم ماتقعدش ولو عرضناها اكيد هايسيحلنا علي الملأ
ده اعدائه الاوربيين نددوا بالاعدام علشان المحاكمة غير عادلة
حتي ماسبهوش ينطق الشهادتين يمكن ربنا يتوب عليه
خلينا نعذبه في حياته ويتعذب لما يموت
بس الغباء انهم مايعرفوش ان كل حاجة في الدنيا ممكن تنقلب للعكس
critical
يعني بعد ما كان كل العالم بيكره
وبالذات الناس اللي هدد حياتهم واللي انا منهم حولوه لبطل او علي الاقل اي حد لازم يكون تعاطف معاه


19 comments:

  1. smraa alnil said...

    هيييييييييييييييه
    انا اول واحدة اعلق
    بص بقي
    كفاية اني مستقبلة السنة الجديدة بخنقة ما يعلم بيها الا ربنا
    وشفت طبعا الفيديو بتاع صدام وحسبي الله ونعم الوكيل فيهم
    بس اللي مش يعرفوه انهم كدة خلوا صدام يعتبر شهيد والله اعلم
    دة غير ان هو في نظر الناس بطل مات وهو واقف علي رجله وعينه علي اعين اعداؤه يعني مش خايف ولا مرهوب من موقف موته
    نكدت عليا عربي
    وبالنسبة لتعليقك في البوست اللي فات فتاكد ان انت عمرك ما زعلتني حتي لو بحسن نية
    يلا كل سنة وانت دايما سعيد  

  2. Mongey said...

    hiii!
    Ahmed 3amel aih ya abny
    kol sana we anta tayeb
    we happy new year

    wahshny awy
    oly how anta mesh fel khaira
    wala aih??  

  3. high_staff said...

    هاى عربى هابى نيو يير. وربنا ما يقطع لهم عادة بس لو هتمشى كدة يبقى كل سنة واحد على العيد الكبير والله انا عندى اكتئاب وما عندى اى كلام اقولة انا مفصرة معاك انا عارفة وهابعت لك ايميل بكرة فية كل اللى عاوزة او نتقابل فى الجونينة مش مشكلة هههههههههههههههه وهافهمك معنى اسم مدونتى باى مؤقتا  

  4. دعاء عادل said...

    فعلا حاجه فظيعه مهما كان الواحد بيكره صدام على اللى عمله فى ناس كتير لكن كل الناس اتأثرت بأعدامه بالشكل الغير انسانى ده
    دول بجد استحاله يكونوا بشر حاجه منتهى السفاله ممكن تعادى وتحاكم وتقتص لكن بشرف  

  5. 3rby said...

    انوج:):
    مبروك علي ريادتك في التعليق:)
    وانتي طيبة

    منجي:
    والله قريت التعليق كذا مره علشان افهم القاهرة
    ايوة يا عم جيت تاني يوم العيد بس عالساعة سبعة وكلمتك امبارح مرتين
    كل سنة وانت طيب

    هاي ستاف:
    انتي مابترديش علي التعليقات خالص
    انا عرفت معني الاسم
    مش هي اسم قصيدة لنجم
    بس ممكن اعمل فيها باكستاني لو الحكاية فيها جونينة:)

    دعاء:
    هايجي اليوم وهايتحاكموا
    العراق طول عمره انقلاب وظلم وقهر
    تحسي كده من رتم الاغاني بتاعتهم
    الاغنية بتبقي عاملة زي النواح
    والاغنية الفرايحي بتفشل  

  6. واحد من الناس said...

    لم يحزني في اعدامه اكثر مما سمعته في فيديو الأعدام
    لماذا هذا التنكيل والتشفي
    لماذا يفضح اثناء موته ويصور وهو يلفظ انفاسه معلق بالمشنقه
    حسبي الله ونعم الوكيل  

  7. ذو النون المصري said...

    اهلا عربي كل سنه و انت و كل اسرة التدوين بخير
    معذره لاني لن اعلق علي الموضوع لاني كتبت فيه عندي و عند اخرين ما اود قوله اضافة الي اني لم اعد اعتقد في جدوي ما نقول
    لك مني التحيات و كل سنه و الجميع بخير  

  8. Bent Masreya said...

    كلام موزون
    :)

    انما ايه اخيرا.. زيزي دى.. انت اخدت عليا يا ولد يا عربي
    :P  

  9. Ironcobra said...

    عارف يا عربي رغم ان أنت صغير في السن زي ما فهمت من البروفايل بتاعك أنما كلامك دخل دماغي وواضح أن دماغك موزونة You have a decent head on your shoulders زي مابيقولوا بالأنجليزي و قلت كلام موزون و منطقي و عقلاني مش اي كلام هطل و هرتلة زي ناس كتير أكبر منك في السن و عايشين في دور الثورجية المتحررين الليبرالين .

    ملحوظة : أنا بقالي فترة متابع مدونتك و معجب بطريقتك الناضجة في التفكير السابقة لسنك و التي تدل على ذكاء و ثقافة , بس دي أول مرة أكتب عندك تعليق .  

  10. tota said...

    العزيز عربى

    لاننا لسنا مطالبين على الارض بتحقيق الموت وقطع الرقاب الا من خلال عدالة الموقف

    فيعد اعدام صدام انتهاك لاى عدالة
    بقدر جرائم صدام المعروفة كان اعدامه سيكون امرا طبيعيا واحقاقا للحق لو كانت المحاكمة عادلة ولم تطرد المحامية البنانية اكتر من مرة وكما ذكرت انت الشهود
    المهزلة كانت اكبر من تصديقها

    ربما كان اعدام صدام سوف يمر لو كان التوقيت مخالف

    ربما حالة الامتهان التى اعترت الامة العربية كانت سوف تصبح اقل لو ان الحكم صادر من محكمة عراقية محايدة وتطبيقه ايضا

    ربما الغضب زاد لان تصوير الحكم كان فى منتهى الوحشيةوالاهانة لحرمة الموت

    ربما لو كانت العراق على قوتها الان لكان هناك الف مبرر لعدم غضبنا لكن الغضب يزداد لان اعدام صدام لن يعيد عراق حرة قوية كما كانت
    لكن فقط هى عدالة السماء تأخذ مجراها
    تحياتى  

  11. ahmEd_H said...

    سيذكروه و لسوف ينسوا من شنقوه
    كان معكم احمد ابو نسمه  

  12. صفصف لادي said...

    عربي
    انت جاي تعلق عندي تقلي ازاي المفروض يكون التحديث؟؟؟
    بامارة ايه؟؟
    فيه كتيب اتبعه يعني و لا ايه؟؟؟
    يعني كنت مستنيه اسمع منك تعليق لكن مش تصحيح للشكل النهائي لا حيقدم و لا ياخر بالذات في موضوع مهم زي ده
    ابقى خد بالك لو سمحت المرة الجايه
    سلام  

  13. 3rby said...

    واحد من الناس:
    هو بهدل الشيعة
    بس المفروض انهم خلاص بياخدوا حقهم مش لازم بقي قلة ادب

    ذو النون:
    عندما تصمت الكلمات
    كل سنة وانت طيب يا برنس

    زيزي:
    اجمد حاج انك ماتعرفيش ال
    nicknameبتاعي
    وعمرها ماهتيجي في بالك


    iron copra:
    شكرا اوي وكلامك ده يشرفني
    بس والله في ناس بتفكر زيي وفي سني
    كنت فاكر سني كله هرتلة بس مثلا فيه واحد كنت خارج معاه امبارح كنت فاكره في الباي باي وبيسمع ميتال وبتاع طلع بيفهم المهم الواحد يلاقي مساحة يعبر فيها عن رايه لان لو حد اتكلم عادي في وسط صحابه بيتريقوا وكده

    توتا:
    كل حاجة مترتبة ومتدبرة...اصل امريكا مش بتلعب
    اللي يدايقك اذواجية المعايير اكتر حاجة بتنرفزني وبتحسسني ان اليهود والمحافظين الجدد ماينفعش تتعاملي معاهم لازم تموتيهم

    بس كده كده اعدام صدام مش هايرجع العراق حرة او قوية لان عمرها ما كانت كده
    البلد ديه ملعونة...طول عمرها خراب
    حتي اغانيهم اقرب للنواح والاغنية الفرايحي مش بتكسب
    ومدنهم اساميها موجعة
    زي كربلاء
    اصل تسميتها
    كرب وبلاء


    احمد اتش:
    سلملي علي نسمة:)

    حفصوتشا:
    انتيداخلة فيا شمال ولا ايه
    انا قريت موضوعك وهتميت بيه والله
    بس لو علقت هاقول نفس الكلام اللي هنا
    فمالوش لازمة يعني املالك صفحة التعليقات وانتي تقدري تقريه هنا
    وبعدين اصل انا تعبت طالع نازل
    لكن لما تحطي التحديثات بالترتيب تحت الموضوع الاساسي الواحد يعرف يقرا الكلام في السياق
    وانا اسف لو كنت زعلتك  

  14. sherehan84 said...

    مصعبش عليا وكنت مبسوطه انه اتعدم يللا في داهيه وان شاء الله ربنا هيجازيه على كل اللي عمله في حياته أوفى جزاء.. في داهيه يا صدام  

  15. Ironcobra said...

    أية يا عم عربي بس مالهوم بتوع الميتال , هتغلط لية بس ؟  

  16. 3rby said...

    شريهان:
    طيب بزمتك مش حسيتي بالاهانة
    مهما كان برضوا اسمه رئيس
    ومهما كانت شرعيته معدومة برضوا اكتر من شرعية الاحتلا وعملائه
    واللي حصلوا ده مش مقصود بيه صدام لوحده مقصود بيه العرب
    وانا في قطر وقبل ما اعرف اتكلم كنت مهدد بالقتل
    كان بيهدد بضرب قطر بالكيماوي وابويا وامي كانوا سادين عتبة البيبان والتكيفات والشبابيك بالنيلون
    لو العراقيين هم اللي حاكموه كنت هاطلب باعدامه
    بس امريكا هي اللي اعدمته
    يعني مهما حصل هو اقربلنا من امريكا
    زي بالظبط ساعة حرب لبنان لما الحكام العرب قعدوا يشتغلونة باكذوبة سنة وشيعة مع ان الشيعة اقربلنا من اليهود باميال
    يعني مش المفروض نشتم الشيعة برضو صدام اقربلنا من امريكا


    iron copra
    ماخدتش بالي من انك ايرون
    يعني ميتال
    ايه رايك في الالشة ديه؟  

  17. sherehan84 said...

    بصراحه أنا كل اللي حسيته ناحية صدام هو الفرحه .. الفرحه بعدل ربنا وان قصاصه قريب وزي ما اقتص من صدام بكره يقتص من باقي الحكام العرب ..
    وبعدين ايه يعني لو هو أقربلنا من أمريكا .. أنا لو أخويا هو اللي عمل كده في الناس وجت أمريكا أعدمته هفرح علشان ده عدل ربنا وربنا بيجيبه على ايدين الناس اللي هو عايزهم .. العدل ان صدام يموت كده وده فرحني
    موت الناس ودفنهم أحياء ويتم أطفال ورمل ستات أكيد لازم أفرح لما يعدموه ولو كان الشيطان نفسه هو اللي أعدمه .. أما بالنسبه للاحتلال فأكيد أنا مش موافقه عليه بس هذه نقره وتلك أخرى  

  18. emz said...

    معاك تماما!!
    اللى عملوه ده خلاه قدام الناس بطل
    و موضوع اول يوم العيد دى
    و شنقه قبل ما يخلص الشهاده
    و ثباته ساعتها
    خلاه بطل قدام ناس
    و عند بعضهم شهيد
    و ايميلات بالعبيط على الانبوكس
    صلاة الغائب
    و ادعية
    و رحمك الله يا صدام

    كل ده كان هيبقى مختلف لو الاحداث اللى فوق دى اختلفت شوية  

  19. 3rby said...

    شريهان:
    والله انا معاكي انه ابن ستين...بس خلاص هو في رحمة ربنا وانا ماقدرش اقول غير ربنا يرحمه
    ولو العراق هو اللي اعدمه كنت فرحت من جوايا بس برضو كنت هاقول ربنا يرحمه مطرح ما راح

    emz:
    امز ده جم ام؟
    ماهو الغباء عندهم مالوش حدود