قريت مقال ابويا في القدس العربي.... فكرت في حاجة ...وهي علاقة الحالة الاقتصادية والاجتماعية للشعب بالحالة السياسية للدولة.
كنت فاكر ان لما الدولة تبقي ديموقراطية الحالة الاقتصادية والاجتماعية بتتحسن..وده كان دايما بيفسرلي ليه بلدنا بلد فقرانة...بس بعد ماقريت المقالة واللي بتتكلم عن الاسعار وفرقها بين مصر وايطاليا وهو حكالي عن ناس كان يعرفهم من زماان قبل مايجي القاهرة وشافهم في اطاليا وبعد ماكنت(استغفر الله العظيم)تتخض لما تشوفهم بقوا عاديين او اجمل من الشخص العادي في القاهرة.
فكرت في شكل الناس...ليه في الزمالك والمعادي البنات بيبقوا حلويين(مش عينيهم خضرا وشعرهم اصفر...بس الوش بيبقا حلو)وليه تروح قرية تلاقي الوش مثير للشفقة.وليه واحد زي شعبان عبد الرحيم تخين وواحد زي عمر دياب جسمه حلو..وبعيدا عن الجينات والرياضة هاقولكم السبب...السبب ان الفول وعيش الجمعية مثلا بيعمل كرش بس من غير مايتخن بقية الجسم اما الاكلات الغنية مابتعملش كده.
علشان كده ممكن تشوف شخص وتقول هو ساكن في عمارة في مدينة نصر ولا ساكن في مسقط عمارة في مدينة نصر.
علشان كده برضه في بلدنا الناس اجسامها مش حلوة في حين ان في ايطاليا الناس موديلز
ابويا وصف ايطاليا بالجمال الموجع...هو فعلا موجع
الواحد لما يبقي متوسط دخله 700 جنيه في بلد زي مصر وبيجيب الفرخة بخمس اضعافها في اطاليا مع ان متوسط دخل الفرد فيها بيوصل ل2000 يورو(واحسبها انت)لما يبقي واحد زي سواريس بيبيع الخمس دقايق دولي في شركته في اطياليا بثمن دقيقة المحمول في بلدنا...يبقي اكيد الواحد هايفضل يلف في الساقية طول عمره...وعمره ماهيقدر يقلع غماه وعمره ماهيقدر يرفض يلف علشان يعيّش التيران الصغيرة(ولاده يعني)..ده برضه بيفسر ليه القضاة والصحفيين والمحامين هم اللي ناشطين سياسيا وليه لما قللوا مرتب القضاة القضاة سكتوا وليه الغلابة اللي بيموتوا في عبارات وقطرات ساكتين.مش ثقافة بقه لان اللي بيحصل ده مش محتاج فهم.اللي عاوز اقوله ان الحالة الاجتماعية زي ما بتغير في الوشوش كمان بتغير في الامخاخ
هم مستافدين من حالة الركود الاقتصادي مش بس بالفلوس اللي بتدخل كروشهم(صحيح اغنيا والمفروض مايبقوش مكرشين بس خايفين من اللي هايجرالهم بكره فابيخدوا اللي يقدروا ياخدوه)كمان بالصمت المطبق علي البلد.
يعني هي فعلا حلقة مفرغة...علشان كده وحتي لو اتوفرت الفلوس عمر ما مبارك هينفذ برنامجه الانتخابي لانه مستفيد من فقر الشعب.
اللي عاوز اقوله ان الفقر بيجيب سمسرة والسمسرة بتجيب فقر
والغني بيجيب ديمقراطية والديمقراطية بتجيب غني

26 comments:

  1. مصطفيتش ابن حفصوتشا said...

    عندك حق
    البنات فى الحتت النضيفة يبقى شكلهم بنات ناس
    وفى الفقر ولو حتى البنت جميلة بتبان وحشة
    على رأى عم فؤاد قاعود
    نوجا للى فى مترو الزوات
    بناتكم سنيورات
    وبنتى مقشفة

    كويس انك قدرت توصل للنتيجة دى
    مبروك

    قبل مانسى
    ابقى ابعتلى ايميلك
    علشان الاندساس  

  2. HANY said...

    أخى الكريم:

    مش فقر الماده هو اللى بيجيب ده , وانما فقر العقول , فقر العقول فى رأيى اشد واخطر , وده السبب الرئيسى للى احنا فيه فى مصر  

  3. elkamhawi said...

    البوست حلو بس اية كل مرة تقول مشدنيش المقال مهو نفس الفكرة مع اختلاف الاسلوب ده عمى وانا اعرفة فلو سمحت متقلش مشدنيش الموضوع تانى او متكتبش عن اللى هو بيكتب عنه  

  4. 3rby said...

    ابو اسماعيل مافهمنيش بالكامل بس وافقني علي نقطة فرعية وهاني فهمني وماتفقش معايا وابن عمي داخل يتبلطج

    ابو اسماعيل:
    بالظبط
    بس النقطة الاساسية ان زي مالاكل بينضف شكل البنات كمان بينضف مخ الشعوب
    يعني البنات ديه-وديه حاجه غريبة-في الغالب تفهه...مع انهم بياكلوا نفس الاكل اللي معلي الدماغ الاجنبية وبيناموا نفس نومتهم

    هاني:
    فقر الماده بيجيب فقر العقول
    ولكل قاعدة شواذ


    ابن عمي:
    لا بابا ماكتبش عن اللي انا كاتبته بابا كتب عن حته صغيرة وهي الفرق في الاسعار...اقري المقال في القدس والمصري اليوم
    حاطتلهم لينكات بره  

  5. ام العيال said...

    as u said they are using the poor people to kill the rich people not by nife or guns all the time but sometimes with haiting them cause they are poor from every thing money ,food,even knowledg
    empty mind and poket  

  6. 3rby said...

    لا
    انا قلت
    u can always use half the poor to kill the other half

    يعني الفقرا...اللي هم عساكر الامن المركذي علشان يموتونا احنا
    انا وانتي واي حد من المدونين يعتبر فقير بالنسبة للاغنية اللي بيقولوا كده
    واضح ان افكاري مشتتة في البوست ده وماحدش فاهمني  

  7. Mongey said...

    علي فكرة البوست ده كان اتحط في موقع جلوبال فويسيز

    في اللنك ده
    http://www.globalvoicesonline.org/2006/12/04/arabisc-asian-games-democracy-and-models/#more-18282

    ده زي فييد كده مترجم منه جزء كده
    In Egypt, 3rby writes about the impact of democracy on the socio-economic standard of people  

  8. 3rby said...

    فينك يا رشا كنتي زغرتيلي
    بس الحته اللي مترجمة مش مبينة الفكرة الاساسية  

  9. Mongey said...

    انت قريته؟
    رشا عندها عيد ميلاد مش فاضيالك  

  10. Anonymous said...

    و الله يا عربي باحس أحيانا باللي بتقوله ده لما بنزل القرى فعلا تلاقي معظم الناس وشوهم من النوع المنحوت الملئ بالتفاصيل
    و علامات السنين
    لكن لما بروح المناطق إياها بلاقي وشوش ملونة مجرد ملونة
    أنا باعترف أنا من النوع الأول الكفحتجيةالمصريين
    و بصراحة مابحبش أتكلم كتير مع النوع التاني مابلاقيش حاجة تشدني في كلامهم  

  11. Anonymous said...

    هو كل كتاباتك بتوع كده
    معندكش نكت يا عم

    فعلا انا متفقة مع هانى ان فقر العقول اخطر و فقر العقول بيصب فى ملى البطون


    فى نقطة فرعية مش متفقة معاك فيها
    يا باشا بنات الريف
    الريف الأصلى يعنى المفروض أحلى من بنات المدينة
    لانهم معندهومش كمية التلوث دى و بياكلو عسا و فطير و خضرة بقى
    مش كده
    و للا ده فى الأفلام
    " طبعا انا بتكلم عن فئة معينة هناك "
    و حتى لو فقير هناك بس تحس البنت مشكلتها الفقر مش الشكل اللى هو الدم اللى فى وشها يعنى
    يعنى انت بس ركز معاها و تستريح من المجهود البدنى اللى بتبذله و تلاقيها نورت


    شكلى بخرف
    سلامى لعمو
    باباك يعنى  

  12. 3rby said...

    مصري:
    اللي اقصده ان الاكل زي ما بيأثر في الشكل بيأثر في الدماغ
    طبعا الفانكشن ديه كريتيكال
    يعني النظرية ديه سارية لحد دجة معينة من الغني وبعد كده الاشكال بس بتبقي حلوة لكن الامخاخ فاااضية
    يعني انا وانت بنفهم في السياسة ولا الغني بغباء والفقير جدا؟


    ياسمين:
    انا اصلا من الشرقية
    ولحد قريب كنت باعيد في قرية
    وصدقيني كلام افلام
    في المنصورة الناس حلوة علشان الفرنسويين ارتكبوا فيها الفاحشة
    في الشرقية في القري الفقيرة اللي فيها البنات بيفلحوا بتحسي انهم جمال بس جمالهم ده مدفون جوة اجياااال
    لكن لو نزلتي المراكز او العاصمة(الزقازيق)مزز
    ممكن زي ما بتقولي
    بس ايه ضمني اني لما اريحها تنور؟
    يوصل  

  13. ذو النون المصري said...

    كلامك صحيح يا عربي فعلا الغلب و الشقا بينحت في وجوه الناس علامات و خطوط بتدل دلاله واضحه علي نوعية اعمالهم احيانا
    و نوع الطعام ممكن يسهم في تشكيل ملامح الناس للدرجه التي يمكن معها تحديد طبقته الاجتماعيه من مظهره طبعا ليس في كل الاحوال
    و ربنا قال في القران (تعرف في وجوههم نضرة النعيم)و معناها واضح ان النعيم يعطي للوجه نضره
    ربنا يكون في عون الفقراء
    لكن فيه نقطه هي ان الجمال في الفقراء بيكون موجود ايضا لكن في نواحي اخري غير المظهر
    تحياتي لك في اول زياره
    سلام  

  14. ذو النون المصري said...

    فين ايام ما كان المصري هو نموزج الجمال في العالم القديم؟  

  15. واحـــد مـــــن الـنـــاس said...

    بقولك يا عربي
    انا عايز اعرف ميعاد المظاهرة بتاعة كفاية امتى
    عشان ناوي احضرها
    انا من المنصورة بس مستعد اسافر

    رد عليا بسرعة الله يخلييك وقولي المكان والزمان
    انا مش مخبر والله :)  

  16. 3rby said...

    ذو النون المصري:
    انت من الاسماء الخمسة
    ههه
    عندك حق
    انا كنت عاوز اقول ان زي مالاكل بيأثر في الوشوش كمان بيأثر في المخاخ

    واحد من الناس:
    المظاهرة يوم 12\12
    الساعة 2
    امام دار القضاء العالي
    لازقة في نقابة الصحفيين ونقابة المحامين
    بس لو مش اد الضرب ماتجيش  

  17. 3rby said...

    علي فكرة يا ذو النون انا علقت عندك بس انت عامل الاوبشن بتاع لازم انك توافق علي التعليقات وانت مش عارف باين عليك
    لو تحب اساعدك اوك  

  18. ayman said...

    انا عايز اعرف حاجة
    لما فقر الجيوب بيجيب فقر العقول طب ليه واحدة زي جي كي رولينج (مؤلفة سلسلة هاري بوتر) مابطلتش تفكر لما انطردت من بيتها واتشردت هيا وبنتها ولفت على دور النشر عشان ينشرولها أي حاجة لحد ما أحد الناشرين وافق ونشر أول جزء من السلسلة واللى انتشر بشكل مرعب وألفت أجزاء تانية لحد ما بقت من أثرى أثرياء العالم!
    أنا بس بديك مثال لواحدة كانت عايشة على حافة الحياة وفي نفس الوقت كانت بتبدع بل بتخترع
    تحياتي  

  19. Mongey said...

    الوضع مختلف اعتقدان المجتمع افكارة مختلفة
    غير كدة وكدة الفقر هنا غير هناك
    الفقر هنا مقصود بيه ان في ناس مش لاقيها تاكل مش قادرة تبطل شغل علشان تلاقي الكل

    هيفكروا امتي و بعدين اكيد جي كي رولينج اتعلمت انما دول ماتعلموش حاجة و لو اتعلموا اخرهم القراية و الكتابة  

  20. 3rby said...

    ayman:
    زي ما منجي قالك
    انا مش باقول ان الفقرا اغبياء لا سمح الله
    انا باقول ان الفقير يادوب بياكل وماعندوش وقت للسياسة
    اغبياء سياسيا
    مش نسبة ذكائهم قليلة
    او بلاش غباء خالص
    هم مش فاضيين يقلعوا غماهم ولا يكسروا التروس ولا حتي يتفوا
    يعني بيشتغلوا باديهم وسنانهم
    :)  

  21. ayman said...

    مش فاهم برضه إزاي الفقر هنا مش زي الفقر برة .. معاك طبعا إن الوضع مختلف من الناحية الحضارية والبيئة المحيطة لكن مش قانون يعني إن الواحد علميا مينفعش يفكر من غير ما ياكل أنا شخصيا ممكن انتج عمل فكري في اوقات الصيام أو أوقات ما قبل تناول الغذاء مثلا .. ثم الناس عندنا مبتفكرش مش عشان مفيش أكل زي ما بتقول لأ ده "عدم التفكير" في حد ذاته بقى نمط تفكير .. يعني لما يقوموك من قدام الكمبيوتر عشان تذاكر و تتخرج وتشتغل عشان تاكل ده اسمه زحف على الرغيف مش قلة موارد زي ما المجتمع بيروج لكدة .. في حين انك لو قعدت على الكمبيوتر وقريت رواية أو شفت فيلم ده في نظري أهم بكتير من كل الخراء اللي بيقولوك عليه ، تخيل بقى لما تكتشف ان اهلك مش بس هما اللي كدة وتخرج مع صاحبك يحكيلك نفس الكلام عن أهله وتفتح التليفزيون تلاقي مليون أسرة واقفين قدام مكتب التنسيق وهيموتوا عشان يدخلوا ولادهم كليات ،وليه.. عشان يتخرجوا ويشتغلوا و"ياكلوا" ! وفي سبيل هذه الهواية ينفق المصريون أكثر من 18 مليار جنيه في السنة على الدروس الخصوصية في حين ان انتا مش مجبر (على الأقل قانونيا) انك تدفع مليم واحد عشان يطبعوا على قفا ابنك بادج "شاب مثقف"
    انتا بتعمل كدة بكامل حريتك وبتدفع لابنك 2000 جنيه في السنة دروس خصوصية مع انه ممكن بربع هذا المبلغ يشتري كتب (غير دراسية) ويعلم نفسه بنفسه !
    يعني المجتمع الفقير الغلبان في ايديه يطور نفسه بس هوا بيستهبل !
    ده مجرد مثال واحد وفي نماذج لا تعد ولا تحصى لأوجه هذا الإستهبال اقرا مثلا تقرير التنمية البشرية لعام 2005 واقرا في بند الإقتصاد كيف يؤسس المصريون ل"فن الإستهبال" خذ مثلا:
    - ينفق المصريون 6 مليار جنيه سنويا على رسائل الموبايل .
    - ينفق المصريون 250 مليون جنيه سنويا على الدجل والشعوذة واخراج العفاريت !
    وغيره وغيره
    ثم مش معقول يعني يبقى المجتمع كله غلبان و مش لاقي ياكل (وبالتالي يبقى غبى) أكيد في شوية ناس لسه بياكلوا وبيروحوا ماكدونلز وهارديز ومع ذلك ما بنشوفش ناس بتفكر .. مفيش غير البهايم (لا مؤاخذة) اللي بيطلعوا يتحرشوا بالبنات في الشوارع واللي بيفتحوا مدونات مخصوص عشان يتفوا على الحكومة والريس !
    معلش طولت عليك
    تحياتي  

  22. واحـــد مـــــن الـنـــاس said...

    يا عم عربي نخاف من الضرب ايه بس
    هيا اول مرة
    دنا رحت مظاهرات تأييد القضاة
    فاكرها ؟؟؟
    ايوة بتاعة ازمة القضاة
    ونص الناس اللي رحت معاهم اعتقلو

    ده غير مظاهرات المنصورة
    وامن مركزي المنصورة
    اللي يعتبر هركليز بالنسبة للامن المركزي بتاعكم

    ان شاء الله هتلاقيني موجود ياباشا
    بس قولي بعد ما اطلع من موقف عبود واركب المترو
    اروح محطة ايه
    واروح فين بعدها  

  23. واحـــد مـــــن الـنـــاس said...

    وقولي صحيح
    هتبقى يوم اربع ولا خميس ؟؟  

  24. 3rby said...

    الظاهر كده يا عم ايمن(حلوة عم ديه اتعودت عليك اوي مش كده)
    سعيد بزيارتك
    بس الظاهر اني رجعت للتهبيل زي اول ماعملت البلوج ده ومابقتش اعرف اعبر عن فكرتي...انا اصلا كتبت البوست ده بعد 28 ساعة صحيان

    انا مش قصدي ان الاكل بيزود نسبة الزكاء
    ديه حاجات بتحكمها جينات
    انا قصدي ان الشخص لما بيبقي مرتاح اقتصاديا واجتماعيا بيبدأ يبص للسياسة
    وزي ما قلت الفانكشن ديه كريتيكال
    يعني لو عملتلها جراف هاتلاقي ان القاعدة ديه بتطبق لحد الناس اللي فوق الطبقة الوسطي...بعد كده عدم الاهتمام بالسياسة او علي الاقل عدم الرغبة او الخوف من التعبير عن الراي بيرجع تاني
    علشان كده القضاة والصحفيين هم اللي بيتحركوا
    ولما حبوا يكتموا الصيادلة والقضاة عملوا ايه؟
    لو قريت البوست اللي فات هاتعرف انهم لما حبوا يكتموهم لعبوا في المام
    يعني قللوا دخلهم...القضاة شالولهم الحوافز والبدلات وبعد ما كان بيقبض 7 تلاف جنيه بقا بياخد الف ونص الفين
    تخيل دخلك نزل بنسبة 400%في المية فاجئة هاتبص للبلد؟
    علي فكرة الدروس مش الفين جنيه في السنة
    انا باخد بحوالي 1000 جنيه دروس في الشهر
    وده مش هايتعدل بيا لواحدي
    وماتقوليش ابدا بنفسك لاني كده اضيع
    المفروض يضربوا مرتب المدرس في 10
    ويسبتوا الاسعار
    ساعتها المدرس مش هايدي دروس
    المدرس يا قما ياكل ولاده يا اما يشوفهم
    وهو مش غاوي ينفصل عنهم



    علي:
    ماشي يا عم الجامد
    هاتبقي يوم ثلثاء
    بيتهايئلي تنزل محطة التحرير وبعد كده تتمشاها
    هي حته مش كبيرة  

  25. Mongey said...

    http://www.bigsound.org/gvozh/?p=272

    اتنشر بالصيني هنا
    يلا يا عم  

  26. Anonymous said...

    مواضيعك جملية جدا
    تسمح لى اضيف لينك المدونة بتاعتك عندى فى المدونة


    بيجاسوس المصرى