كنت في اسمعلية، مدينة هادية بس كمان فاضية مافيهاش اي حاجة المهم قلنا ندخل سينما انا وقرايبي يعني
طبعا مالقتش انكليزي وانا حالف من زمان اني مش هادخل اي افلام عربي غير لمخرجين كبار بس مالقتش غير كركر وفرفر فدخلنا تيمور وشفيقة.قلت اكتب لان ماحدش رضي يسمع نقدي للفيلم من قرايبي عشان مبسوطين بيه ومش بيدخلو انكليزي فمخدوش بالهم من النشل في الفيلم
اولا اكتر حاجة دايقتني حتة فكر جديد والشباب هايحكم البلد والحركة السياسية في البلد اللي قعد جميل راتب يقول فيها والله كنت باحب الراجل ده بس احتقرته هو وكل ممثلين الفيلم
وبعدين فيه حتت غريبة جدا في الفيلم
يعني مثلا في اخر الفيلم كده كانت مني زكي وزيرة بفضل الفكر الجديد فراحت مؤتمر في مدينة اوربية(تقريبا فيينا) اتخطفت بسهولة جدا جدا جدا ولما احمد السقا كان عاوز يلحق العربية اللي اتخطفت منها ماكنش لاقي عربية.تخيلو حصل ايه.....جه واحد راكب موتسكل اللي هو بتاع الرالي ده ولابس لبس سباق ده كلو جوا المكان اللي فيه المؤتمر...وقعد يجري وراهم بقي وفاجئة الموتسكل نزل من تحت عربية نقل فلمس الارض بجنبه ومتعرفش ليه انفجر.وبعدين بقي ايه....احمد السقا فضل يجري ورا واحد من الخاطفين قعد يجري وراه وقام قايلوا انا هاخليك تتكلم وراح معلقو كده في الهوا ماسكو في ايده ومنزله برة الدور اللي هو فيه راح واحد جاي ضاربو بالنار(الحتة ديه من فيلم شفتو قبل كده بس مش فاكر اسمه)وقعد يجري ورا الباقيين وهو اتزنق في حيطة وجت عربية تخبطه عشان تعملو بقعة في الحيط مش ينط للجنب بقي زي البني ادمين.لا ازاي ده احمد السقا.نط في الهوا لفوق وقعد يلعب برجله زي السمكة كده ويرتفع ويرتفع زي جيت لي.وفي الاخر دخل مكان موت فيه سبعين دخلو في حوالي خمس دقايق من الفيلم وواضح ان المكان طويل لحد الاودة اللي فيها من زكي.كان فيه دناميت مع مني زكي في الاودة قام هو خطف واحد منهم وقالهم كلكو هاتموتوا وخلي مني زكي تخرج هي وبقية الوزرا وفضل مع اللي خطفوها مثبتهم كده وفي اخر سانية مش في اخر 10 سواني زي الافلام الاجنبي(برضو 10 سواني يبقي هس)
خرج في اخر سانية الحتة الطويلة ديه كلها في سانية مشي حتة تتمشي في خمس دقايق بس الحقيقة طاااار في الهوا من الانفجار وفي عربية الاسعاف قام نفض هدومه
بس اكتر حتة بقي فكرتني باسم"شفيقة وشحلوف"اللي قالها صاحبي في السينما وهو مسطول لبتاعة الحجز هي اخر حتة وهم بيتخانقوا في فرحهم فعلا شكل جسمه ماكنش مدي علي تيمور كان مدي علي شحلوف اكتر
بس بقي اللي شافو هايفهم بس انا ماعرفتش اوضح اكتر من كده

4 comments:

  1. ahmEd_H said...

    دا جزاة اللى يدخل فيلم عربى

    اول حاجة لازم جميل راتب يقول فكر جديد و الحورات مش جمال مبارك هو اللى حيحكمولا انت عايز تقولى انك جمال مش شاب

    و كمان دا فيلم عربى يا عم الحاج


    تانى حاجة انت الواد بتاع الموتسيكل جى فى معياده بالظبط

    حزر فزر ليه
    علشان دابرضه فيلم عربى

    و الموتسيكا انفجر ليه
    برضه فيلم عربى


    و دا جزاة اللى يدخا فيلم عربى  

  2. بنت مصرية said...

    بقولك ايه يا تيمور،يووو قصدى يا احمد :)
    عملت ايه فى الثانوية
    طمني
    جبت كااااام  

  3. 3rby said...

    جبت 91.5 ولسه هاعمل تصحيح لان في مواد حالل فيها كويس وناقص اكتر من اللي مايعرفوش فيها حاجة فممكن اعلي انا السنة اللي فاتت عليت نص درجة فيا رب يعني اعلي السنة ديه بس اصلا مجموعي الحمد لله عالي لان كل دفعتي في رانج 85%
    منورة يا زيزي وشكرا انك قلقانة عليا كده  

  4. ahmed said...

    با راجل حرام عليك دا فيلم زي العسل,بس كلمة الفكر الجديد باين جابتلك ارتيكاريا ففضلت واخد موقب من الفيلم لحد اخره