مش بالومهم

بصوا انا عاوز اتكلم في حاجة اخويا قالي ماتكتبش فيها بس معلش يا اخويا مش هاقدر اسكت احسن اتشل ولا اي حاجة

كنت قاعد باسمع برنامج اسامة منير علي نجوم اف ام،جبت راديو صغير فبسمع وانا بذاكر،هو البرنامج الوحيد اللي باسمعه في الاذاعة ديه علشان مابسمعش احلي حاجة فيكي ايه وده يبقي ايه ده يبقي برد ياروح امك

المهم انا باقعد اضحك زي الاهبل علي الناس اللي بتتصل

واحدة مرة متصلة تقول انا حبيت واحد واتجوزتوا عرفي علشان افقر مني وبعدين سافرت شارم واهلي وافقوا علشان يخلصوا مني ومن فضيحتي وهناك اتعرفت علي واحد انكليزي استغفر الله العظيم اسلامه عالورق بس ونمت معاه علشان هو اجنبي ومش هاتفرق معاه بالعكس هايحبني اكتر(وانتي مابتفرقش معاكي بدام مابيفرقش معاه)
واتجوزنا وسافرت معه انكلترا بس خايفة ماكنتش حاسة بالامان وعاداتهم مختلفة عننا(وانتي خليتي فيها عادات غير تلوين البيض في شم النسيم)

وواحد تاني باعت اس ام اس اسامة منير قري منه كلمتين وبعدين قعد يستغفر ربنا الكلمتين:"السلام عليكم،انا شاب عندي عشرين سنة وخالتي متجوزة وجوزها مابيخلفش وللاسف."بعديها اسامة منير قعد يستغفر
بيزني وكمان زنا محارم وبيقول السلام عليكم طيب ممكن اقول كلمة مكونة من 3 حروف وهي اختصار ولا عيب؟!

بس ديه ناس عادية

امال مفتي الديار المصرية اللي مرة يقولك البنت تروح تعمل تخييط

وبكرة نلاقي مستشفيات التجمييل عاملة اعلان:خيطي مرتين والتالتة هدية،ولو خيتطي 4 مرات ممكن توفري وتعملي سوستة.

لاء واخر افتكاسة.قال الصحابة كانوا بيشربوا بول الرسول وبيتبركوا بيه.يا حلاوة.والله فعلا البلد فيها امل
ممكن نرجع للوثنية قريب جدا.لما مفتي مصر يقولك الصحابة كانوا بيشربوا بول.امال الكفار كانوا بيشربوا ايه؟بي بي؟
ولما تكون فتوي زي ديه في موقع دار الافتاء

واللي يقولك المفروض الواحدة ماتبينش شعرها قدام زميلها غير لما ترضعه
هو الشعر عورة اكتر ولا اللي بالي بالك يا روح امك

وبعدين نيجي نقول ليه الدنمارك مش بتعاقب جريدة
jolands poston
وليه بيرسموا كاركتير اصلا وليه وليه

انا اللي عاوز اسأل ليه بنزيط علشان دولة في القطب الشمالي وبعيدة جدا وعلاقتنا بيها صغيرة ومش هاتفرق معاها لو اتجننا حتي وبنسكت لما القران يتداس عليه والقدس تتهود والاقصي يتدنس والفساد يوصل لاكبر مؤسسة اسلامية في مصر لدرجة انهم يمسكوا ناس مش فاهمة في الدين مناصب زي ديه

عالعموم انا مش بالوم امريكا عاللي بتعملوا فينا ولا بلوم اسرائيل عالي بتعملوا في الفلسطينيين لما نبقي نحترم ديننا نبقي نقول امريكا بتنزل مصحف في كلام غير القران ولما نبطل نقتل بعض نبقي نقول اسرائيل موتت واسرائيل اصابت

وخلاص مافيش كلام يتقال
لان اي كلام هايتقال هايبقي اي كلام

7 comments:

  1. شــهــروزة said...

    ههههههههههه
    أحلا مقطع
    ان مبقتش تفرق معاها عادات الا عادة تلوين بيض شم النسيم

    وكم من المتناقضات فيكى يا مصر
    وعالهواااء مبااشرة

    يا ابنى الناس دى معروف من زمان أنها تجار دين ومنافع ليس الا
    فقاعات تطلق فى الأجواء وقت حدوث أى خلل للتغطية على هذا الخلل

    واخدلى بالك انت؟؟

    انا عملت قبلك بيوم او يومين كدة بوست طلعت فيه القديم والجديد عليهم

    وقال لما هاجمته من شهرين على فتوى الترقيع...دخللى كام بنى آدم شحورونى علشان مسيت ذاته لاسامية
    المرة دى
    ولا فسل فيهم نطق ولا فتح بقه

    تحياتشى  

  2. صاحب البوابــة said...

    احب ان احييك على مدونتك الجميلة

    استمر يا اخي  

  3. tota said...

    عربى
    فى البداية عايزة اقولك حاجة بجد فعلا حقيقى
    انا بحبك فى الله يا بنى ما تقلقش انا اكتر من ضعف سنك بس كلامك بسيط وعلى الهدف مباشرة
    كل كلمة قلتها حقيقة ومخيفة وتحمل من المعانى اطنان
    احنا فى زمن المفروض المفتيين دول يتهموا بالهرطقة زى زمان ويتم نفيهم من الارض كلها
    اذا جاز التعبير فى عصر فاق فيه العلم احلامنا ما زلنا نتشدق باراء قديمة لا معنى لها ولا اساس من الصحة
    انا فعلا نفسى افهم ايه الغرض من الدخول فى المهاترات دى فى توقيت بتنهار فيه مصر ومفيش اى توجيه لتطويرها غير عبر الاعلانات وبنرجع ميت خطوة لورى
    اللى سمعته عند اسامة منير واقع حقيقى بس اللى متعرفهوش ان الصورة دى ابشع من كده وخاصة فى العشوائيات حيث الحجرة الواحدة يقيم فيها عشرة ولك ان تتخيل النتيجة
    يا عزيزى الخلل ينخر فى عصب الامة حتى لم يبقى شىء وماهى الا سنوات قليلة جدا حتى يتهاوى الصرح المذهب ولا يبقى سوى الهيكل  

  4. 3rby said...

    شهروز:
    منورة يا كبيرة بشعرك اللي بيطير في الهوا ده
    :)
    بالظبط
    يعملوا مشكلة ويغطوا عليها بمشكلة تانية
    حلقة مفرغة


    صاحب البوابة:
    انت تنور يا باشا


    توتا
    :
    يااه فينك
    والله انا كمان باحبك
    بس انتي عارفة الثانوية العامة ام ثه
    مش باعلق بس ساعات باجي
    مبسوط انك هنا بجد

    الغرض المراد هو اللي قالته شهروزة
    غطية علي مهازل قبليها
    وكمان يومين هايغطوا علي ديه بحوار تاني

    مش هنلاقي هيكل ولا حاجة
    السوس بينخر من جوا لبرا مش العكس

    منورة يا كبيرة  

  5. دعاء عادل said...

    برافو عليك يا احمد بجد انت قصرت وجبت من الاخر حقيقى يا احمد البلد دى بقت تقرف وكل حاجه بقت ..........مش لاقيه كلمه توصف اللى الحاله المنيله دى
    يلى ربنا يرحمنا بقى  

  6. هيباتيا said...

    لسة قاري تعليقك عند شهروزة
    لا فض فوك يا بني
    برافوا عليك  

  7. مصري said...

    بس على فكره حكاية الاس ام اس بتاع اسامة منير ده، ده واحد بيتسلى، واسامه منير كمان بيتسلى، مش معقوله هيقراء حاجه على الهواء من غير مايكون قراها قبل كده، طب ايه قولك بقى ان ممكن اسامه منير يبقى هو اللي مالف الحوار ده علشان ناس اكتر تسمعه.

    بتسمع اسامه منير وانت بتذاكر، ركز ياااض مفضلش غير كام يوم، لو بتقراء تعليقي دلوقتي، ودلوقتي ده قبل الامتحانات، قوم ومتكملش قراية التعليك، ولا ترد عليا.

    متقوم يالا، ايه هي لازقه، قوم ذاكر يالا وشد، قوم لجيلك، يالاااااا .

    قشطه، انت الجاني على نفسك، بس متقباش تزعل مني بقه.