كفاية هبل

حصلي موقف من حوالي اسبوعين وكان نفسي اكتب عنه بس قلت بلاش علشان منجي يكتب
اللي خلاني اكتبه دلوقتي هو خبر اكثر استفزازا عرفته امبارح...هاكتب بالترتيب الزمني

الموقف الاول:كنت طالع من درس عربي وقاعد قدام السنتر مع واحد صاحبي عايش في دور الصايع ولابس سلسلة...انا ضد السلسلة لاني باحس ان اللي لابسها لابسها منظرة...باحس انه مش راجل....بس عمري ما قلت لحد انت لابس سلسلة ليه
المهم واقفين...عدي واحد لابس جلبية قصيرة وتحتيها"سروال"...عدي... السلام عليكم...وعليكم السلام...وفاجئة بص لصاحبي اكنه قتل امه...ورجع لنا....كابتن(ومسكه من السلسلة)ديه هاتوديك في داهية انشاء الله...ليه؟!...اقلك ليه...الرسول ماعملش كده!

مش فاهم النظرية...يعني اكل بايدي زي الخليجين علشان من الف وربعمئة سنة ماكنش فيه معلقة ..ماكلش غير بلح ولاحمة وماشربش غير لبن ومية؟!علشان الرسول ماكنش بياكل مكرونة ماكلهاش...ايه التخلف ده!...اروح الدرس بالناقة مثلا علشان الرسول عمره ماركب عربية...وبعدين اصلا الناس كانت بتلبس فضة...اللي اعرفه ان الدهب والحرير بس هم اللي حرام...بس كل واحد بيفتي لحد مالناس حست ان الدين سجن مع انه اكثر تفتحا من عادتنا.

الموقف التاني:ده مشهور شوية....قال ايه الحجاب تخلف ورجوع للخلف...وان الستات شعرهم حلو واتربينا علي ايادي امهاتنا وكانوا مش محجبات!
قلت لاخويا اللي دايما بيعارض رأيي حتي لو هو مقتنع بيه علشان يبقي مختلف....قالي ده رايه الخاص...يا عم ده وزير يعني ده راي الدولة...مافيش باكلم في حيطة
اولا الحجاب ده امر بيه علشان ماينفعش نعتمد علي النفس البشرية...يعني مثلا لما بابقي ماشي في شارع وواحدة حلوة معدية ماببصش...بس بالاقي الناس كلها بتبص....اللي حصل في وسط البلد مش بيعارض فكرتي...ده بيأكدها...ماينفعش نعتمد علي الشهامة والعادات والرجولة...كان لازم يبقي فيه قانون ودولة تحمي المنتهكات
وبعدين مش عارف مال فاروق حسني ومال الحريم زي ما قلت عاوز يقول رايه الشخصي يسيب الوزارة...راي الوزير هو راي الدولة...ولا هانعمل ديمقراطية متخلفة...زي تركيا كده...لو الشعب اختار حكومة اسلامية الجيش ينزل...يعني امي محجبة...ممكن يمنعوها من دخول المدرسة اللي بتشتغل فيها قبل ما تقلع التخلف!
ده هو ده اللي تخلف بجد...مانسيب لكل واحد حريته العقائدية بقه وكفاية كرهتونا في ديننا



بي اس(علي راي بلو):ماحدش يركب مترو تاني علشان فيه شروخ في النفق...تقريبا كان فيه سرقة في مواد البناء....فيه مية شرخت النفق في اكتر من 3 محطات

36 comments:

  1. sherehan84 said...

    أنا مش فاهمه الناس دي بتحشر نفسها في اللي ملهاش فيه ليه؟  

  2. Anonymous said...

    شوف يا عربي يا حبيب قلبي
    في ناس في الدنيا والي هما بقو كتير الايام دي
    بيفسرو الدين على كيفهم وبيدعو التدين وما خفي كان اعظم ومدي لنفسو صلاحيات بتكفير الناس واصلاح الامة الفاسدة الفاسقة
    وما هو الا انسان سطحي لا يفقه بالدين شيء

    يعني لما يشوف واحدة منقبة دي هي اختو في الاسلام

    لما يشوف واحدة مش محجبه ولابسه عادي
    يديها كلام ويكفرها ووديها نار جهنم

    ومين هو ده حتى يحاسب الناس ؟ ليس كل من لبس التدين هو انسان صالح وينفع يحاسب الناس

    الكل بيفتي والكل بيحرم وبيحلل على كيفه انا كان مسلم او مسيحي الموضوع سواء انا بالنسبه ليا الشيوخ من اي دين كان هما اساس المصيبة في هذا الزمن

    كل واحد عنده عقل ويقدر يميز الطريق الي عايز يمشيه وليس لاي حد الحق انه يكفر العالم او يحاسبهم في ربنا هو الي يحاسب البشر ولا هما احق من ربنا

    عدم تقبل الاخر ده مصيبة في مجتمعاتنا مصيبة كبيرة يعني لما يشوفو اي حد مختلف بسرعة يقوموا حاكمين عليه طب تعرفو كلمتو لا بس عشان هو مختلف

    مجتمع مريض جدا والكل مدي لنفسه الحق انو يكون داعيه ومصلح

    حاجه تقرف

    بوست جامد يا عربي  

  3. smraa alnil said...

    لالالالالالالالالالالا
    سيبك انت من كل الكلام دة بقي انا مش ليا فيه
    بس ايه حكاية المترو دي
    دة انا من كبار زوار المترو
    انت بتهرج ولا ايه
    هههههههههههه
    عامة اهو الرب واحد والعمر واحد
    بالنسبة بقي للي انت قلته قبل كدة فهي دي بلدنا
    وهما دول شيوخنا اللي بيأمروا بما امر الحاكم
    اي كان
    منهم لله
    فعلا كرهونا في دينا
    لا اللي بيصلي بيسلم ويتقال عليه ارهابي واخوانجي
    ولا اللي عاصي بيسلم من الكلام ويتهموه بالكفر وانه زنديق واتي بما نهي عنه الله
    حسبي الله ونعم الوكيل
    بس البلد دي حسيت فيها اني غريبة  

  4. 3rby said...

    شريهان:
    انتي جاية تجاملي ولا ايه؟
    ماتشاركي...باحب اسمعك وانتي ببتكلمي في الحوارات ديه

    رشا:
    عندك حق...المفروض الناس ديه كله..من الجانبين...جانب فاروق حسني وجانب المتخلف اللي بيقول السلسلة حرام ياخدوا علي قفاهم...او ممكن نجيب هتلر يحرقهم
    انا كنت عاوز اتكلم عن حكم النقاب والحجاب وبعدين قلت بلاش لانها حاجة مستفزة وممكن تفرق الاراء اكتر ما تجمعها...كامان انا مش مفتي..مع اني مصري:)
    المفروض ان الواحد يستفتي قلبه في الحاجة اللي مش متأكد منها...بس لنفسه مش لكل البشر..وعدم تقبل الاخر ده من الاسباب اللي خلتنا نتهان في الدول الغربية..ورسومات لسيدنا محمد وسيدنا عيسة مهينة جدا(الغرب اصلا لا ديني)

    سمراء النيل:
    كده اسمك صح؟
    لا مش باهرج..محطة تقريبا اسمها سعد زغلول ومحطتين تانيين
    الخبر اتنشر في المصري اليوم
    http://www.almasry-alyoum.com/article.aspx?ArticleID=37278  

  5. Anonymous said...

    ازيك يا عربى
    انا متفقة تماما مع رشا
    كل واحد بقى يفتى و يصدق نفسه
    الحلال بين و الحرام بين
    بس فعلا فى ناس كتير بيمشوا برأى ان كل حاجة فى زمننا ده بدعة بقى
    ياريت نوسع افقنا شوية سواء الناس اللى مع الدين او اللى ضده
    كتير بحس اننا شعب فاضى لدرجة انه ماسك فى قشريات و لازق فيها و قاعد يفتى

    ----------

    المهم يا اخويا قولى
    مترو ايه
    و سعد زغلول ايه ده انا بعدى عليها كتير

    حتى المترو يافرحة ما تمت
    يعنى نركب ايه بقى امان سيادتك ؟

    عجبنى البوست قوى على فكرة  

  6. مصرى said...

    بالنسبة للجزء الأول للموضوع
    بغض النظر عن فكرة السلسلة في ناس كتير عجيبة

    بالنسبة لموضوع المترو سمعت تصريح لمسئول بيقول إن المية اللي نازلة من سقف المترو مية نضيفة !! يعني لو السقف وقع علينا ماتقلقوش هانكون متنا متغسلين جاهزين

    وحدووووووه  

  7. 3rby said...

    انتي حرة:):
    ازيك انتي
    كويس انك دخلتي لان الهيستوري اتمسح وكنت عاوز ادخل عندك
    تركبي الناقة:)

    مصري:شعب فاضي علي راي اللي قبلك...هو ماكنش قصده كده
    هو قصده ماتخفوش يا حلوين المية نديفة
    مش مهم بقه الموت
    المهم الواحد يبقي عارف ان المية ديه مش ميه كخ  

  8. Anonymous said...

    و الله انا شايفة ان الراجل غلبان
    لاقي نفسه خارج دائرة الضوء قال يمشي حاله شوية
    و يقول كلام يخلي الناس كلها تبص ناحيته و هاتك يا حوارات و يا لقاءات و يبقي حديث المدينة
    و هو بأة سعيد اوي و بيتكلم بلهجة الفاتحين و اللي جابوا الديب من ديله
    بجد صعب عليا و مع ذلك اللي زي دا التجاهل ليه و لرأيه السفيه احسن دوا  

  9. شــهــروزة said...

    هههههههههههههههه
    كنت ناوية اكتب بوست عن حكاية انه مش تمام دى يا عربيلااا
    اصله حط تحت رعاية وزارة الثقافة ارسال ملك جمال الشواذ
    وأكيد هو اللى امتحنه
    وهو اللى اداله الدرجات

    يتكلم فى حجاب اية ابن المهشّكة دة؟؟  

  10. high_staff said...

    ماتنساش يا عربىانالسيدةالاولىمش محجبةدىنقطة.اما النقطةالتانيةان فعلا المفروض كل واحدحر يلبس حجاب يلبس سلسلة اناعن نفسىاتعرضت لضغط جامدجداعلشان الحجاب بحجة ان كل العيلة متحجبة ولما ماوفقتش لفواعليةمن خلال بناتى وبقى شكلىزبالة رحت متحجبةمع العلم ان مافيش واحدةمن اللى ضغطواعلية بتركع ركعةواحدة النقطة التالتة بقى انت اللى نقطتنى بخبر المترو دة مشششكرين منك  

  11. Aladdin said...

    لا تصدق عزيزي عربي كلام الإعلام المصري والعربي ان كلام الوزير هو بالضرورة كلام الدولة .. كلام الوزير "نسخة" مكررة - للأسف - من كلام المثقفين العرب والمصريين واستطيع ان اعمل استطلاع رأي بين المثقفين المصريين سيقولون نفس الكلام وكلامه عن استيراد الحجاب أو دعني اقول غطاء الرأس من "العرب" هوا بس - كوزير وليس كمثقف عادي - رفض "التصريح" انه تأثير وهابي (عشان ما يزعلش السعوديين)!!

    على النقيض الاخوانجية البغضاء - كعادتهم في الصيد في الماء العكر - عملوا من الحبة قبة وطالبوا بإقالته (كنوع من إشهار كارت الإرهاب في وجهه) لكي يكون "عبرة لمن يعتبر"!!!

    اسمح لي أخي عربي أن اختلف معك في أن الحل العلماني حل "متخلف" ... أتفق تماما مع الوزير الـ*** (رغم عدم ثبوت أي شيء يدينه) في أنه يريد لمصر أن تكون "قطعة من أوروبا" كما كانت بعدما أصبحت الآن لا تختلف عن طهران أو الدمام!!! إن كان الحل العلماني قد ثبت فشله في تركيا أو تونس أو حتى لبنان، فقد أثبت نجاحه في دول "أسلامية" غير عربية مثل إندونيسيا وماليزيا وسنغافورة بل في دول فقيرة نامية مثلنا مثل الهند!!

    السبيل الوحيد لتقدمنا أيها العربي عربي هو التنوع في الوحدة (الهند مثلا)، فيعمل المصري السني والشيعي والأرثوزكسي والكاثوليكي والإنجيلي والبهائي والشيوعي والناصري واللاديني والاشتراكي والليبرالي والنوبي والصعيدي والقاهري والساحلي والبدوي على محاولة ان يقدم ابداعه الخاص من خلال "مصريته" في النهاية ومن هنا نعرف "قبول الآخر" فعلا لا قولاً!!  

  12. 3rby said...

    منمنمة:) :
    هههه هه
    لا حلوة
    بس لو معايا الفلوس اللي معاه مش هابقي محتاج ابقي في دائرة الضوء...لاني اقدر ساعتها اعملي دائرة لوحدي

    بس رايك قريب من راي منجي في حتة التجاهل

    شهروزة:
    انبي زغروطة شهروزة اخيرا حنت وعدت
    دا اداله درجات تخلي اول جمهورية

    هاي ستاف:
    منورة والله البلوج
    ده بقه الجهل
    اللي بتتحجب عن غير اقتناع بسبب ضغوط بتحسي من تعاملها انها مش مقتنعة باللي بتعمله
    وده شيئ خطير جدا
    انا عن نفسي اختي مش محجبة
    بس مش باكلمها او اي حاجة
    المهم الاحترام


    علاء الدين والمصباح السحري:
    ابويا مثقف من المثقفين اللي بتقول ومش باحس انه بيقول علي الحجاب تخلف
    ولا حد من صحابه

    وبعدين انا مع اقالته لان دخل فاللي مالهوش فيه...هو مش ست علشان يتكلم في الحجاب...ولا حتها ليه في النسوان...من الشباب الخواجات(مع بعض التغيرات)
    وبعدين الدول اللي انت بتقول عليها ديه ماسمهاش علمانية اسمها ليبرالية...العلمانية مش هي الديمقراطية
    زي تركيا كده...لو الشعب حب الحكم يبقي اسلامي الجيش هاينزل يفشخ الشعب والحكومة ويجيب حكومة علمانية...ديه دكتاتورية...زي الخوض في المسائل الشخصية زي الحجاب كده...عاوزنا نمنع الحجاب من الاماكن العامة زي تونس وفرنسا وهولندا؟
    حاول تفهمني يا ريت  

  13. FrEe.PhArAoH said...

    عربى .. عربىىىىىىىىىىى

    وحد الله يا ريس

    "جانب فاروق حسني وجانب المتخلف اللي بيقول السلسلة حرام ياخدوا علي قفاهم"

    فاروق حسنى ايوا .. شخص زباله

    الراجل اللى بيقول السلسلة حرام دا انسان محترم .. المفروض تسأله انت ليه بيقول حرام .. الناس دى فى منهم المحترم جدا وفى منهم اللى فسر حاجه معينه بشكل غلط .. انما هو مش بيدعوا للرزيله .. وغلط انك تغلط فيهم .. دا عايز سواد الروح الدينيه ف المجتمع .. عيب لما نغلط ف انسان بيقول قال الله وقال الرسول .. يا اخى الرسول قال من علق تميمة فلا اتم الله له ومن علق ودعة فلا ودع الله له وتكلم كتير عن احاديث التشبه .. انت متعرفش ايه هى بالظبط مرجعية الراجل دا .. وحد الله يعنى وبلاش تبينه على انه متخلف
    هو غلط لأنه مقلكش دليلة
    عامة الاعمال بالنيات

    اما فارق حسنى فزباله دا مفروغ منه

    اكيد الاختلاف ف البتاع لا يفسد للبتاع قضية .. ولا ايه

    تحياتى بقا  

  14. 3rby said...

    اصل البتاع لو باظ يا فرعون هاتبقي فضيحة

    انا قلت انه قال ان السلسلة حرام علشان الرسول مالبسش سلسلة
    هاتلي صحيح الاحاديث اللي انت جبتها ديه لان لو اتفرجت علي افلام او مسلسلات بتتكلم عن الصحابة هاتلاقي فيه منهم لابس سلسلة
    ودول طبعا بيبحثوا كتير جدا علشان مايخدوش ذنب...وبعدين الجيش مثلا بيلبسوا سلسلة علشان يتعرفوا علي الجندي...بصراحة انا باحس ان اللي لابس سلسلة مش راجل...بس عمري ماحسيت انه عمل حاجة حرام  

  15. اروى الطويل said...

    وهوه كان قال حاجه غلط السلسه فعلا حرام لانها تشبه بالنساء والرسول قال لعن الله المتشبهين من الرجال بالنساء يعنى الراجل ما غلطش ولا جاب حاجه من عنده  

  16. اروى الطويل said...

    وبعدين المسلسلات دى ما بيهمهمش لا حرام ولا مش حرام هم بيشوهوا صوره الصحابه وخلاص ايه ياعم عربى ما تخف  

  17. Anonymous said...

    بص يا اخ عربى الموضوع جميل وكل حاجة بس فيها انو الراجل بيعوظكم ومفروض انتا مدون تتقبل الرأى التانى بصدر اوسع من كده شوية وبعدين زى ما الاخت اروى قالت ايوا السلسلة حرام

    وبس  

  18. FrEe.PhArAoH said...

    عزيزى العزيز
    حلوه عزيزى العزيز دى :)
    اقلهالك تانى
    عزيزى العزيز / عربى بيه صاحب مدونة اى كلام
    بص ياباشا .. انا من زمان بجد معجب بيك تواجدك وافكارك الكويسة وسنك الصغير نسبيا .. انا مشفتش مدون اصغر ودى نقطة ليك مش عليك
    عشان كدا كلام يعنى من اخ كبير وياريت تقراه بثقه
    اول حاجه المجتمع بتاعك مشكلته انه فاكر انه متدين .. هو مش متدين هو بيميل للتدين .. وفى فرق وسياتك اكيد فاهمه .. شعبك جاهل جدا ف العلوم الشرعيه .. حتى المثقفين .. فى منهم ملهمش علاقه بالدين ودا واقع .. مجرد قشور مهما عرفت ف الدين صدقنى مجرد قشور .. المهم .. الاصل ف السلسلة للنسااااااء .. دا متفق عليه .. الغرض من السلسلة عامة بيكون اما للتجمل واما كتميمة او جلب الحظ
    وحكم التجمل تشبه بالنساء لانهم بيتجملوا بيها وطبعا دا حرام لوجود نصوص صحيحة .. وحكم تعليق الودعة او التميمة او الاعتقاد ف الحظ ممكن توصل لشرك اصغر .. كويس .. وانا قلتلك حديث عن التمائم ف الرد اللى فات
    ففى الحالتين السلسلة مستهجنة .. هتقولى ظهر سلاسل اساسا رجالى و شكلها مش ظريف ع البنات ومتنفعش غير على ولد
    هقلك الرسول قال ايه بين الحق والباطل امور متشابهات فاتقوا الشبهات و دى شبهه .. الرسول امرك تبعد عنها

    اما عن تمثيل الصحابة بسلسلة دا مش دليل .. وكمان هم مش بيبحثوا .. زى منتا متخيل اللى الفكره الطاغية فكرة المؤلف والمخرج مش المعلومات الواقعية .. فاهمنى .. الجو العام ولو الممثل كبير بردو بيحط بصمته
    مثلا مثال مش من الصحابه .. اعرق الاقلام المصرية الناصر صلاح الدين .. كانت ايه ديانة عيسى العوام ؟؟ .. مسيحى صح ... لا
    صدمة ؟؟ .. كانت صدمة ليا فمصداقية افلامنا .. عيسى العوام مسلم
    خد اللينك دا
    http://saaid.net/Doat/Althahabi/17.htm

    ودا

    http://www.majdah.com/vb/showthread.php?t=15145
    ------------------------

    ودور انت واكتشف براحتك


    لسه مصر انهم بيدققوا .. عزيزى لتالت مره .. احنا فبلد وزير ثقافتها بيقول على اركان الدين 4 مش 5 .. متنتظرش من مخرج او مؤلف يدقق فسلاسل .. يمكن البيه الممثل عايز كدا مش اكتر .. شكرا على استضافتك

    خالص مودتى .. اخوك  

  19. 3rby said...

    ايه ده كلكوا عليا ولا ايه

    اروي:
    ايه يا بنتي مش بلوجك كانت اتمسحت باين...اول ماترجعي ترجعي عليا انا؟
    وبعدين انا ماخضتش في حكاية الحرام والحلال ديه اوي لاني مش فقيه ومعرفتي بالدين محدودة
    برضه هو معرفته بالدين محدودة لان رده متخلف واظن اني بينت ده في البوست


    كازانوفا:
    زي ماقلت انا مش هاتناقش اكتر من كده في الحوار ده علشان مافتيش


    "فري فيريوه":
    بص يا اخويا
    اولا شكرا علي المجاملة ديه
    ثانيا:انت عرفت ازاي الرد اللي كنت هاقولهولك؟

    ثالثا:انا حبيت اجيب جانبين من التخلف والتشدد...انتوا كده هاتولغولي جانب...بالراحة شوية


    علي فكرو مش بس كده فاروق حسني اتكلم عن الحجاب وقعد يدافع ويقول يا جماعة صدقوني ده مش من الاركان...طب هو انت كان حد قالك اننا فاكرينها من الاركان  

  20. اروى الطويل said...

    اول حاجه يا كتكوت لما تيجى تكلمنى
    تتكلم با حترامك
    تانى حاجه يا بطه انا غلطانه انى بعبرك واكتبلك حاجه تانى
    تالت حاجه يا بطبوط انا مش داخله ولا معبراك بكومنت تانى اوكيه  

  21. 3rby said...

    بطبوط
    ديه اي كلام مش مجلة ميكي
    بس ايه الحب ده كله
    زي رد عبد الله مفتاح عليا بالظبط
    فكر جديد؟
    ههه ههه
    ايه يا مامتي(مادام بنتي كلمة عيب)ماتخليكي سيريلاكس شوية مش كده انتي صاحبة مرض


    انتي بتتكلمي بجد في الزعل ده ولا ايه...اصلي بصراحة مش فاهملك...زي ساعة بوست بنت وولد بالظبط...افتكرتك قفشتي

    عالعموم ماتزعليش يا بطبوطة:)  

  22. Anonymous said...

    ياعمنا 00انت قلتها 00هبل 00هواالهبل يترد عليه 00؟خلي كل عبيط يتكلم براحته 00إذا نطق السفيه فلا تجبه 00
    يعني أنا شفت مرة واحد مربي دقنه شاف شوية بنات 00الصراحة كان حالهم مايسرش 00لابسين من غير هدوم يعني00تخيل قال ايه ؟:
    شفنا صدوركم 00وبعدين شفنا (00000)حنشوف ايه تااااني؟ 00في ناس فعلا بتحب تتكلم وتصرخ على الفاضي وهما تور الله في برسيمه00 حتى القدوة الصالحةخربوها 00بس مش كلهم كده طبعا 00
    مع تحياتي 00
    والسلام عليكم0  

  23. elkamhawi said...

    اية يا ابنى مش عارف اقولك يا عربى مش واكله معايا خالص عشان اللى يشوفك مش هيقولك عليك عربى خالص امور ابيض عسل إيه ده يا اخواتى عموما البوست حلو بس خلى بالك شوية فى التعبير عشان فى ناس المعلومة مش بتوصل ليهم صح وملكش دعوة باخوك عيب ده الكبير يا حسانـين  

  24. shady said...

    حلو البوست ده يا عربى بس صاحبك غلطان كان ممكن يمسكه من دقنه ويقول له دى ممكن تمسح بيها مؤخرتك

    هو من الواضح ان المتطرفين على الجانبين واللى مش فاهمين عن الجانبين والوسطيه الله يرحمها , وكله مظاهر يا حبيبى ولا أى شئ يعبر عن أى شئ إلا الجهل والمرض والخوف  

  25. 3rby said...

    دظاحمد المصري:
    يا سيادة الدكتور تلاقيهم قالولوا هاتشوف0000اخوتنا

    علاء:
    ازيك يا ابو العلوء
    العربي مش بس بسحنته
    العربي بحبه لوطنه وامته
    انت مش بتكتب بوستات ليه
    كفاية عناويين وادخل في الموضوع:)

    الشاب العاطل:
    كان المفروض انه يقله كده فعلا...بيني وبينك ريحة مؤخرته كانت والضحة

    انهيار الوسطية ده هايخلي المجتمع ينهار
    الوسطية في الدين هي اللي بتبشر بالازدهار زي بالظبط الطبقة الوسطي في المجتمع...والايام ديه بنعيش فترة ما بين التخلف المتمثل في المتشددين دينيا وبين الشربطة(شكلك فاهم يا جاميكا)من جانب الناس اللي زي فاروق حسني واي طرف هايفوز هايؤدي الي انهيار الدولة...وعندنا مثالين لده...انهيار الدولة الاموية وانهيار الدولة العباسية  

  26. Reformer1976 said...

    سيبك من اللي فات دا كله وسيبك م الإخوة المكفرين اللي كفروك يا راجل وانت لا بيك ولا عليك... سيبك من دا كله...

    حكاية مرواح الدرس بالناقة دي خلتني أضحك حتى استلقيت على قفايا.... متخيل منظرك وانت رايح الدرس بالناقة وبتعاكس المزة اللي ع الجمل اللي واقف في الإشارة جنبك... وبعدين ييجي الواد بتاع الفل (راكب على ناقة تانية) فتاخد عقد فل وترميه للمزة فتبتسم لك... ثم تترجل (لأ تترجل مش معناها إنها هتقلب راجل بس معناها إنها نزلت من ع الجمل) وبعدين تركب وراك ع الناقة وتسيب جملها للواد بتاع الفل يركنه ف الباركنج اللي جنب السنتر

    ياااااااه إيه الرومانسية دي... ابقى والنبي يا شيخ سلم لي ع الناقة  

  27. Reformer1976 said...

    ياد يا عربي
    تسدق إنك ندل يااااد؟؟!!

    مش تيجي المدونة عندي تتفرج عليا وانا طالع ف التلفزيون ع الهوا يا ولا

    إخص ع الأخلاق  

  28. 3rby said...

    كوهين:
    اروح مع البت واسيب المدرس بيشرح في الخيمة جوة؟
    انا باجي بس مش باعلق
    انت اصلا بتكتب بوستات طويييلة
    هارد علي ايه ولا ايه؟  

  29. Anonymous said...

    عربي هو منجي فين؟

    سلملي عليه قوي وقوله ان الحكايه مخلصتش
    عاوزين بوست جامد لما يفضى شويه
    هو بياكل الكتب وصابته تخمه ولا ايه؟

    :)

    سلملي بجد عليه قوي  

  30. Epitaph said...

    عربي
    اللي بتقوله ع المترو ده مصيبة
    دي كارثة
    يا نهار ابيض
    ّّ!!!

    ثانيا
    الجزء الخاص بالراجل اللي عامل فيها متدين
    وفاكر ان هو ده الامر بالمعروف و النهي عن المنكر اللي بينادي ليه الدين
    للاسف موقف مخزي جدا
    وهو ده اللي بيؤدي لكلام شخصية زي الوزير بتاع الثقافة ده انه يتكلم كلام مبني علي باطل
    اللي عايزة اقوله
    ان امثال الناس اللي بتستغل الدين سواء من لحية و جلباب او حجاب و خمار و نقاب وتاخده ستار لافكارها السلفية تنشر بيها العداء و فاكرة انها بتطبق الاسلام..او العكس ان الناس دي بتعمل النقيض للدين..من منكر وافعال فادحة لا ينص عليها الاديان
    هو ده يا صديقي العزيز اللي بيؤدي لكلام فارغ من بتاع الوزير

    وطبعا كلنا عارفين ان تصريحات الوزير اللوزعية مبنية علي خطأ
    فاحجاب فرض و مش تخلف


    اما بقي الجزئية اللي برضه ضحكتني
    في كلامك يا عم عربي
    هي برضه اللي عجبت عمك جرجس
    ح تروح الدرس بناقة يا عربي؟؟
    هههههه  

  31. 3rby said...

    بيقول انه مش هايكتب قبل نص السنة
    والله بيفهم
    مش زيي مفضي نفسي للبلوجينج  

  32. 3rby said...

    ايبيتاف
    اول مره تعلقي علي بوست ليا
    ولما باعلق عندك بتنفضيلي
    دانا هاعمل فرح
    اسمه كوهين مش جرجس  

  33. Anonymous said...

    :)

    والله الولد منجي بيفهم
    انت كمان ذاكر كويس
    انا طبعا واثقة في عبقريتك
    وصحيح بشتقلك كتير
    بس مذاكرتك يا عنايا
    اهم من اي حاجه

    بجد عايزاك تفرح قلبي
    عشان لما تيجي تتقدملي
    تدخل كده وانت واثق
    من نفسك يا بشمهندس


    :)
    والله لايقه عليك قوي
    (F)  

  34. مصطفيتش ابن حفصوتشا said...

    تعرف
    انا بعلق وانا بسمع اغنية زياد رحبانى
    شو عدى مابدى
    وبالظبط الجملة اللى هتكون ردى
    ماتركلى شىء
    لاصحة
    ولا وظيفة
    والبيت اللى عندى
    موته بقذيفة

    يعنى احنا مش هنسيب اللى ورانا
    ونقول
    هو ده رأيه ولا رأي الحكومة
    مانشوف الثقافة اللى بوظها
    امبارح كنت فى القلعة وعديت على المتحف
    ايه اللى حاصل ده
    خراب
    وكمان مسارح الثقافة الجماهرية
    والمسرح عموما
    وكل انواع الثقافة
    ياعم بلا كلام فاضى
    اتكلم فى حاجة مفيدة
    سلام  

  35. 3rby said...

    رشا:
    حلوة عليا علشان مب بقك
    او من فاك(علي راي الخليجيين)

    ابو اسماعيل:
    دلوقتي الثقافة بقت الرجل المستحيل والهبل ده
    والله النهارده شربت تريقة علشان كنت باقري في مجموعة قصصية ل"دينو بوتزاتي"
    مافيش حد شاف الكتاب غير وضحك  

  36. أميرة القلم said...

    http://alba7r.al.funpic.de/vb/