عني

كنت هاكتب بوست اعتزالي...كتبته فعلا..وعملتله بابلش..ومسحته
بس هاقتبس منه شوية حاجات
زمان..زمان اوي..مش اوي كده انا لسه صغير..قصدي من قبل ما اعرف يعني ايه نظرية المؤامرة...كنت دايما باحس ان اللي قدامي في بينهم حاجة مش بيني وبين اي حد منهم

يعني مثلا في ال"كيه جي"لما كنا بنلعب...دايما المدرسه ماكنتش بتختارني من الناس اللي بتجري حولين الحلقة..حتي لو كانت اللعبة بالدور..كانت دايما الحصة بتخلص..ده خلاني احس ان المدرسة تقرب لكل العيال التانية..واحتمال تبقي مرات ابويا

كنت شقي اوي وانا صغير..فاكر شكلي من صورة ومن حكايات الناس ليا ومن زكرياتي...تعرفوا الواد الصغير اللي في(باحب السيما)كنت نسخة منه...شكلا وسلوكا
لقيت قريب نضارتي وانا صغير..نضارة بلاستيك شمبرها بني شفاف في ابيض..كعب كباية..كانت كبيرة عليا اوي...كنت كل يوم اقطع البنطلون(محدش يسأل بيتقطع منين)
مرة الدادا مارضيتش تخيطهولي..دخلت علي المديرة المكتب وانا ماسكه في ايدي وقولتلها خيطي

ولما طلعنا ابتدائي وبدأنا نلعب كورة...كانوا دايما يعملوا فريق من العيال اللي مابتعرفش تلعب..ويقوللهم هاتلعبوا الخسران(مش الكسبان)وطبعا الحصة كانت بتخلص من غير ما المس الكورة..كنت باقعد تحت الشجر اللي بين سور المدرسة والحوش..اللي علي جانبيه حاطين الجونين...وابكي...
مش فاكر اي حاجة من تالتة ابتدائي..زي ما اكون اتنقلت من تانية ابتدائي لرابعة..او نطيت من فوقها مثلا..باقول نطيت لان خيالي غريب..باتخيل(لحد النهارده)شكل للسنين الدراسية والسنة العادية..بيبقي في خيالي شكل للسنة بالشهور وشكل للفصول وشكل لايام الاسبوع..مش باعرف اوصفه..بس مثلا لما حد يقول يوم الاتنين قدامي بيجي شكل الاسبوع قدام عيني
فاكر منها بس مادة غريبة(مش ساينس)كنا بننزل في حصصها المعمل لمدرسة بيضة وشبه الستات اللي في الافلام الابيض واسود..وفاكر بنتها اللي لحد ما سيبت المدرسة في تالتة اعدادي كانت لسه في اولي ابتدائي....وهم ولا ايه مش عارف بس هو ده السن اللي اعرفولها..فيه ناس كده تحس انهم مايشدوش..تقليديين..وتحس انهم قداااام
وهايفضلوا علي شكلهم قرون...كل اللي فاكره عن المدرسة ديه اني كنت باكرهها...كنا بنرسم ورقة شجر وخلتني ارسمها كتير جدا وكل مرة ماعندهاش غير(قرف...انت مهمل)
المهم..طلعت رابعة ابتدائي..كنت مستنيها لاني كنت باحضر المجاميع مع اخويا بحجة اني ماروحش لوحدي مع ان بيتنا القديم كان جنب اخر سور المدرسة
كان عندي مدرسة ماث تحس كده انها مش مصرية...مره حد قالي انها شبه الالمان...لحد النهارده لما باشوفها بافتكر الكلمة واضحك...اديتني ماث لمدة سنتين
وفي السنتين كانت مابتعملش حاجة غير انها تحل من ال"ورك بوك"وكنت دايما مضيعه
وكانت دايما بتقولي يا مهمل(برضه)وتوقفني في اخر الفصل..لحد النهارده باكره الماث
كانت بتقعدنا في الفصل مرة كل شهر نمتحن اثناء الفسحة وعمري ما عرفت احل..مع انه كان عن "اريا"ال"سكوير"
فاكر خامسة ابتدائي..ماكنتش اعرف حاجة في البتنجان..كان فيه واحدة اسمها دعاء وصاحبتها محاسن..كنت كل ما اشوفها اقولها يا محاسن الصدف..مرة اتخانقت مع دعاء(امها كانت مدرسة الكومبيوتر)ضربتني بالقلم..ردتهولها اتنين..جابتلي امها وضربتني..ضربتها وجبتلها المديرة...نفختها لانها كانت صاحبة ابويا وقولتليها مافيش حد بيقعد علي الكومبيوتر غير دعاء وصحابها

اولي وتانية اعدادي كنت عادي جدا..تالتة مش عارف ايه الهبل اللي حصلي وبقيت زيي وانا في تانية ابتدائي..شخصيتي كانت ركيييكة..كان فيه بنات قاعدين قدامي دايما بيتلككولي ويقولوا بطل هز في الدسك ويتخانقوا معايا

اولي ثانوي ديه بقه كانت سنة عزاب..بجد ماستفدتش منها اي حاجة غير التعرف علي منجي...كنت باتكلم مع واحدة..وصاحبي(اللي ماكنش صاحبي بس كان بيشتغلني)يوقعني في الكلام ويعرف مني كل حاجة قولناها..وينشرها...وصلت مره لصاحبي(اللي قصته في بوست بنت وولد)اللي رايح علشانه المدرسة واللي كان مخنوق من البنت وقالها احمد بيقول انه مصاحبك..وانا ماقلتش كده..كنت بقول اننا صحاب(مش متصاحبين)وفي مره كنا في رحلة طلعتها علشان خاطر البنت كنت باكلمها فامردتش عليا.
المدرسة كلها بقت ضدي..من تاني يوم بعد الرحلة..هي ديه بجد المؤامره..والواد اللي كان بيشتغلني قال اني اضربت بالقلم من البنت..والمدرسة كلها صدقت..لدرجة اني في فترة حسيت اني بانسي حاجات بتحصل وصدقت ان ده حصل..وبقا قدامي صاحبي ولما يحصل حاجة يقدر يضحك عليا المدرسة بيها..كان بيخسرني يومين وبعدين يصالحني
الكل كان صريح في كرهه ليا الا هو..لحد السنة ديه كان صاحبي..وبعدين قعد يفكرني بالاشاعات اللي طلعت عليا وينشرها في مدرستي اللي انا من الناس ال"بوبليار" اللي فيها علشان يضحك شوية..وكل ما حد يقول احمد عزت..يقول ده كان بيحصله كذا كذا

معلش انا عارف اني عزبتكوا بالقرائة اكتر من التعزيب اللي في الاقسام
بس حبيت لما اتجوز ابقي داخل علي بياض
وهي فاهمة:)
سلام




18 comments:

  1. Anonymous said...

    واااااد يا عربي
    وحشتني يا واد

    حلوة الذكريات والاحلى انك لسه فاكر حاجات بالتفاصيل بتاعتها وده طبعا مش غريب من شاب زيك ذكي وعبقرينو
    ;)

    حلوة مشاركتك لينا بهذه الذكريات التي قد تكون مرت على بعضنا واحسسنا مثل ما احسست من مشاعر لمدرسة ما او من مجموعة من التلاميذ

    فاحببنا المادة من اجل مدرسها او كرهناها لاجل اخر

    حلوة مشاعرك بس ايه الي حتجوزها انت لسة كتكوت يا بني

    ولسه بتقفز اسوار وعايز تخلص سانوية

    يلا الف مبروك وعقبال العيال

    سلام يا مدوبني

    هههههههه  

  2. Lasto-adri *Blue* said...

    احمد
    جواز ايه وبتاع ايه
    خش على اوضتك ذاكر العربى

    :@  

  3. ام العيال said...

    عربي زكرياتك بريئه برائه سنك
    تعتزل ليه لسه بدري
    و جواز ايه يا ولد الي نتتكلم عليه
    عيب كده
    قوم ذاكررررررررررر
    حل الواجب
    ال جواز ال ؟؟  

  4. Mongey said...

    ايه مان الحلاوة ديه بس
    انت عارف هاقوللك علي حاجة انا كمان كنت هاكتب بوستز عن الذكريات
    و كده بس مش دلوقتي السنة القادمة لو
    فضلت عايش بس

    انت عارف انا كنت باتكلم مع هيثم
    قولتلوا انا مستفدش حاجة غير معرفتي ليك و لهيثم

    عامة ركز بس انت في المذاكرة عشان نهايتك
    تبقي كويسة
    سلام
    عايز اشوفك قريب  

  5. Mr.GEMYHOoOD said...

    اعتزال ايه بقة  

  6. Mr.GEMYHOoOD said...

    تعتزل من ايه بالضبط ؟  

  7. 3rby said...

    رشا:
    هو انا اول ما ارجع اكلمك تتريقي عليا
    انا شوفت التعليق وانا باكلمك
    ولسه رادد عليه
    لحقتي تكتبيه ازاي...جرحتي مشاعري..قال كتكوت قال
    انا كنت باشتغلك بحوار الجواز بس انتي شكلك مهيسة

    بلو:
    انا كنت باهزر
    اهم حاجة في اي واحد علمي رياضة انه يكون لماح ويلقطها وهي طايرة
    بس اللي الاشتغالة عشانها ماخدتش بالها
    انتي هاتخدي بالك

    ام العيال:انا بريئ؟
    دانا متشرد اصلا
    والله ماذكرتش اي حاجة في البتنجان النهارده...كان عندي امتحانات ولسه خلصة فقلت اريح يوم

    منجي:انا اتصلت بيك علشان استأذنك اني اكتب بوست علشان انت لسه كاتب بوستك من يومين
    لسه كنت باقول لرشا انا هاكتب بوست عن تهيستنا في المدرسة

    نهايتي ايه يا عم هو انا هاخد النتيجة واموت؟!

    مستر جيمي هود
    كنت هاعتزل التدوين بس خلاص
    هاعتزل الكورة مثلا
    ايه الاسئلة الغريبة ديه  

  8. مصرى said...

    عربي إزيك

    يا عم جواز إيه بس لسة بدري عليك يا راجل
    بكرة تقعد تغني أنا اللي جبت ده كله لنفسي

    معلش إنت كنت في مدرسة من بتوع العيال اللي بيقولوا ساينس و ماث طب بقول لك إيه ماتاخدني رحلة هنالك أصل أنا كنت في مدرسة بروليتالية من اللي مافيهمش مدرسين اساسا  

  9. sherehan84 said...

    جميله الذكريات دي والأجمل انك لسه فاكرها ومحتفظ للماضي بصوره في خيالك أيا كانت الصوره حلوه أو وحشه بس شيء تتمسك بيه .. ايه الكلام اللي أنا بقوله ده ؟!؟!؟! المهم خليك دايما منورنا واوعا تعتزل
    صحيح انت لسه في ثانويه عامه؟؟؟
    يا سكر:)))  

  10. 3rby said...

    مصري:
    مانا دلوقتي في مدرسة باحضر فيها حصة في الاسبوع
    فيه واحد سافر السعودية وماجاش ولا يوم لحد انهارده عاملينله غيابه 11 يوم

    شريهان:
    سكر ! :)
    دانتي اللي عسل
    تعرفي ليه
    علشان ماعلقتيش علي حوار الجواز
    قلت هي فاهمة
    وكله بدا يتريق زي الاهبل  

  11. Egiziana in US said...

    Very cute post. Although as a young man you'd probably object to the word "cute". But hey, consider me like an older sister, webadala3ak! But really, there is a real innocence and honesty in your post. I hope you always stay that way. Just a quick word of advice: don't feel that the world is against you and don't let anyone's bad treatment change your goodness. Sorry itfalseft 3alek showaya, but as I said, I'm like an older sister and I say the same things to my brother!  

  12. Anonymous said...

    وحد الله كده واستخيره الاول.. جواز ايه بس لا قدر الله.. اى مشكله ولها حل ياعربى لكن جواز كده علطول..
    لاحول ولا قوه الا بالله  

  13. 3rby said...

    Egiziana in US:
    thanks...and i wont object on the word"cute"cause it is not for me...its for the post...i guess you didn't realize that although you are the one who wrote it!:)
    and i am really proud of being your brother...and your advice is quick but useful indeed..also i am delighted that you didn't interfere
    like most of the people who wrote comments for me

    المهاجر المصري:
    باهزاااااار  

  14. Anonymous said...

    تحفه
    فطست م الضحك

    مفيش احسن م الذكريات
    هرجع تانى ارد برواقة  

  15. 3rby said...

    ارجعي تاني
    مانتي حرة  

  16. elkamhawi said...

    باشا واحشنى والله بس انا سمعت الحاجات دى قبل كدة بس فى حاجات انتا مقلتهاش يبقى كدة مش على بياض فاهمنى طبعاً والمواضيع دى مينفعش فيها غير الصراحة عشان تعرفوا تعيشوا مع بعض والف مبروك وربنا يتمم بخير بس صارحها  

  17. Reformer1976 said...

    بص يا ابني
    لو جبت سيرة الاعتزال دا تاني انت هننقطع هنا على ناصية البلوج بتاعكو ده
    تعتزل إيه بروح خالتك؟ دا انت الأمل في فريق المدونين تحت تمنتاشر
    إوعى تفكر في الهبل دا تاني

    البوست دا طحن مشاعر اللي جابوني
    الأزمة الحقيقية والجمال بتاع الموضوع إنك مش بتحكي عن القرف دا كله وانت إيدك في المية الباردة واتخرجت مثلا وبتحكي في الطراوة لكن إنت لسة جوة الليلة ومازات تداعيات القرف دا ومؤامرات الرفض واشتغالات شوية المعاقين نفسيا دول مازالت تداعياتها شغالة معاك لكونك لا زلت طالبا ومع نفس الأشكال اللامؤاخذة دي

    واخد بالك إنه حتى لما يبقى واحد محترم وابن ناس وأهله مربيينه كويس برضه الأشكال الزبالة دي - سواء مدرسين أو طلبة - تقدر تطلع دين نفسيته وتبهدل الواحد وتجرَّحه من جوا

    حاجة غريبة يا أخي
    أحييك على جرأتك في الكشف عن مكنونات ذاتك الداخلية في بلوجد العظيم والثري ومبروك النيو لوك بتاع البلوج  

  18. 3rby said...

    ابن عمي:
    خلاص يا عم انت هاتسيحلي

    جرجس افندي:
    لا مانا سيبت المدرسة خلاص بس الواد اللي كنت فاكره صاحبي وواقف معايا وهو اللي كان بيعملي المشاكل كنت لسه اعرفه وناوي اضربه قريبا جدا انشاء الله