النهاردة كان يوم جميل، بالرغم من الدعاية الانتخابية برة مدرسة عبد الله النديم في مدينة نصر، وقفت اكتر من ساعتين في الطابور، كان فيه دعاية لمستقلين وللجبهة والحرية والعدالة
جمال ابو العزايم مَرّ يسلّم عالناخبين، عاتبته على اليفط، وكان رده ان كل مرشح دافع 1000 جنيه للحيّ علشان يشيلوا اليفط، وانه مش بيحاول يأثر عليّ-بدأ يتكلم بشكل عام على نسبة المشاركة ولما سألته عن فرصته كان هايتكلم عن نفسه وبعدين قال انا احترمتك في وعيك او حاجة زي ده، وسلّم ومشي-
فيه ترابيزة قدام باب اللجنة لحزب الحرية والعدالة، عليها لابتوب بيشوفوا فيه اماكن الناس اللي بتسألهم، وبانر كبير فوق الترابيزة عليه بادج الحزب، وفيه كروت عليها دعاية للحزب واعتقد انها من الناحية التانية عليها نتيجة برضو بس مش بتتوزع، متسابة للي عاوز ياخدها
:D
لما سألت امين الشرطة عالباب قال انه ده عادي، وظباط الجيش والشرطة كانوا واقفين عادي، انا الحقيقة مش عارف مدى شرعية ده او مدى خرقه للقانون
لما صورتهم اكتر من صورة اكتر من شخص من حملته جه اتكلم معايا، فضلنا نتكلم تقريبا عن الاخوان فكرياً وعن مصر وعن الثورة لاكتر من ساعتين
النهاردة يوم جميل، انا مبسوط لبلدنا اوي
توقعاتي بقى : اعادة بين عصام مختار وعمرو عوده عالعمال، اعادة بين محمد يسري ومصطفى النجار في الفئات، قوائم الثورة مستمرة والكتلة المصرية والتحالف الديمقراطي والعدل فرصتهم كويسة، بالذات الثورة مستمرة مع ان مافيش اي دعاية تقريبا في مدينة نصر
http://b4mp3r.deviantart.com/
نظر إليّ بحنو مفتعل قائلاً:
"عاوز انططك"-
وعندما رفضت مبرراً بأنني أزدري من يمارسون الجنس بلا مشاعر، رد حاسماً
"حظاً موفقاً مع العادة السرية"-
بدأها قبلي بسنوات طوال، أو ربما بدأت أنا متأخراً قليلاً، أو كثيراً، يختلف التوقيت بين ساعتينا البيولجيتين باختلاف تجاربنا، غيّرنا الموضوع ليكلمني عن تجربته في المعهد الهندسي، أو "خبرته" كما يحب أن يسميها:
" أحد عشر عاماً وثلاث معاهد، لم أشعر بيدي إلا وهي تصفع الدكتور لتعادل صفعة زميلي على الخد الآخر بعد أن وبخنا في المعمل على كسر انبوب اختبار تافه، ثلاثة أعوام مرت عليّ في نفس السنة الدراسية عقاباً لي على تلك الصفعة، كانت كفيلة بإقناعي بترك المعهد، نقلت أوراقي لآخر لكنني تركته لبُعده عن مسكني، أما الأخير فقد كان جنون مطلق، مليء بالأطفال، أكبرهم كان يصغرني بأربعة أعوام"
كل تلك "الخبرة" لم تردعه عن مجادلتي بأننا نستطيع رفع قدرة البطارية بإستخدام محوّل بسيط، فأوقفته بعصبية
-"لما نفوق يا معلم لينا كلام تاني"
مرر لي سيجارة الحشيش المشتعلة، واستكمل كلامه عن تجربته الدسمة: "هؤلاء الأطفال لا يفهمون شيئاً على الإطلاق، وأنا كنت أريد أن أريح دماغي أثناء الدراسة، دخل أحدهم علىّ في قاعة المحاضرات سائلاً عن السنة الدراسية، أجبته بعمري: 26 سنة، حاول مداعبتي فسألته، عندك كام سنة يا بني؟ تعالى واقعد هنا"
وأشار إلى مستوى أقل ارتفاعاً، ضحكت لتلك الإشارة، تصوّر نفسه ملكاً لفرط غبائه
أشعل سيجارة وأخذ يحدثني عن "خراء الحياة"، فقد ضاجع زميلة له أثناء الدراسة، حملت منه فعرف أهلها، وأجبروه على الزواج منها، اضطر أن يتزوجها، وهو الذي ضاجعها على مضض بعد أن ضاجعت هي جميع الزملاء، لم يبتسم له القدر ليستمتع أثناء القذف، بل ضحك متهكما بعد أن انقطع الواقي الرديء
كان يهرب من مدرسته البالية ليلعب "بولينج" مع أبناء في حي قريب من ضاحيته، وفي رمضان يشرب البيرة في السحور حتى يحس باختلاف اليوم اللاحق عن بقية أيام السنة، جوع وسُكر أفضل من جوع فقط، يشرح، يتجول في المجمعات التجارية ويدقق في الأرداف المحشوة في البناطيل حشواً ، يتعلق بالاوتوبيس الأخير في الخط ليسهر في أحد العوامات الجهنمية، أو أمام أحد نوافذها بالأحرى، صحيح أنه لم يعرف أبداً الفرق بين الرفع والنصب في كتب النحو، لكنه يعرف تماماً الفرق في الحياة، أحدهما أقل عنفاً، كليهما سيوفران المال الكافي لدخول العوامة بدلاً من أن يتلصص حتى نهاية العمر
استأذن وقام ليودعني، فهو سيستيقذ مبكراً ليلحق بكتيبته، سيستفيد الجيش من "خبرته"، وهو يرغب في الموت، و لا يكترث إن كان أحدهم سيستخدم تضحياته لخلع بزته العسكرية وإجبار البلد على ارتدائها، فنحن نحتاج لرجل عسكري كما يرى... نحن شعب قليل الأدب، وأنا أحتاج الشهادة، بل أشتهيها كما اشتهيت زميلتى تلك، الفارق أن في الجيش لا يوجد واق صيني، حين تخلع بزتك سيهرب الجميع، تُنزِل في وجه الشمس وسيصفق لك الشعب، قليل الأدب
تابعت احداث السلب و النهب الاخيرة في انجلترا و كان ليا اكتر من ملاحظة و فيه افكار كتير دارت في دماغي, انا شايف انه الاحداث ديه مش بتنفصل عن كل الي بيحصل في العالم و خاصة في العالم العربي, فيه رابط بس الرابط مش موجود في صورة المظاهرات او اعمال الشغب و لكن في صورة ضرورة اظهار الغضب في صورة حقيقية و تأثير شبكات التواصل الاجتماعي في المجتمعات المختلفة او في طريقة تواصل البشر و تعاملهم مع المعلومات و طريقة اجتماع البشر الي بقت اسهل و اكثر وصولا لعدد اكبر من البشر.
الوسائل ديه خلت التعامل بين البشر في رأيي في كتير من الاوقات اكتر سطحية و مش بيعتمد كتير علي الاقناع بقدر ما بيعتمد علي ايصال المعلومة, الناس مع الانترنت بقي وصول عدد كبير من المعلومات بيخلي تعاملهم مع المعلومة اسواء من الاول و الشخص مبقاش عنده القدرة علي التحليل و التفكير المعلومة بتوصل اسرع و بتدي فرصة لرد فعل اقوي و اسرع من الاشخاص ده بيأدي لحشد اعداد اكبر في تجمعات او تظاهرات.
تأثير القطيع بقي اسهل لانه المعلومة بتوصل اسرع و رد الفعل بيبقي اسرع و مباشر و غاضب اكتر, ده كله بيضاف عليه تأثير غير مباشر للتليفزيون و الي ناس بتشوفه و ازاي بشكل ما الاحتجاجات العربية ممكن تكون اثرت في الشاب الانجليزي الغاضب الي مش لاقي حاجة يعملها و مبهور بالاحتجاج و عنده شحنة غضب علي اوضاعه الاجتماعية و عنده فراغ و مفيش سلطة تقيده و كل ده ادي في النهاية لحدوث اعمال السلب و النهب.
السلطة جزئية مهمة تحلل المجتمع من اي سلطه تقيده او تحده من استخدام حريته بشكل يؤدي لاضرار المجتمع لعب دور كبير, عدم وجود سلطة اسرية او اخلاقية او دينية تردع الشخص من ارتكاب الاحداث ديه من سلب و نهب ادي لده.
ان المجتمعات عموما تحكمها قيم الاستهلاك و المنافسة الرأسمالية بالشكل الموجود حاليا, بيؤدي لاهتمام الناس و اعلائهم لقيمة الاستهلاك و قمية المنتج و مش بس قيمة المنتج في القيمة المادية لكن كمان القيمة المعنوية الموجودة من قيمة مجتمعية بيكتسبها الي بيلبس نوع معين من الملابس و بيستخدم منتج معين اصبح المنتج ده مش بس ذو قيمة استهلاكية و مادية كمان قيمة معنوية بيتم فرضها من خلال الدعاية و التلفيزيون ووسائل الاتصالات و القيمة الثقافية الي بتكتسب من خلال ارتباط النوع ده بطبقة معينة من الاثريا و المشاهير.
يعني بعيدا عن الشكليات كلها تأثير وسائل التواصل الاجتماعي تحلل المجتمع و قيم الاستهلاكية هي بشكل ما الدوافع الي ادت لنوع من اعمال السلب و النهب و العنف في انجلترا.
ما ستقرأ الآن هو رأيى فى السلفية كتيار وليس كمنهج، ليس لأنى لا أمتلك حق نقده، ولكن لأننى لم أدرس أصول الفقه التى تؤهلنى لمناقشة تعقيدات المناهج والمذاهب، أردت أن أكتب عن السلفية لسببين: أولاً لأن اللغط المثار بين أصدقائى فى الموضوع كثر، وكما تعرفون فليس للمرء إلا.... مرارة واحدة، والإطناب فى موضوع واحد قد يفقع.... مرارتك، وثانياً أننى خسرت أشخاص من قبل أن أقابلهم، وأنا أكره خسارة الأصدقاء المحتملين وإن كنت أرحب بخسارة من أعرفهم ممن ينتمون لتيار المجاهدين الجدد، وهو موضوع يستفزنى كثيرا وأريد أن أكتب عنه، ولكن أريد أن أوضح هنا أننى لست فى موقع الدفاع عن نفسى أو عن أفكارى، أنا فقط أوضح أرائى حتى لا أُفهَم بشكل يخالف أفكارى التى أؤمن بها.
دعونا أولا نتفق على عدة أشياء: أولا أن الإسلام جاء لعدة أشياء منها هدم السلطة الدينية للأشخاص "ما أنا إلا بشر مثلكم" وأنه "كل يؤخَذ منه ويرد إلا رسول الله" وانه حدث أن "أصابت امرأة وأخطأ عمر"، وأن "القرآن حمّال أوجه"، وفى رأيى فإن هذا حدث لهدم الإستبداد الدينى، الذى هو أخطر أنواع الإستبداد-طبائع الإستبداد ومصارع الإستعباد- فالناس جميعا سواسية تحت تلك المظلة، فـ"إن أكرمكم عند الله اتقاكم, وليس لعربي على أعجمي فضل إلا بالتقوى"، من حقك أن تختلف معى حول أشخاص، لكن أن تضع أشخاص بعينهم فوق النقد فهذا هو الشرك بعينه، ثانيا أننى إذا قررت أن أتجاوز فى نقد أحدهم فإن هذا يجعلنى "قليل الأدب"، لكنه لا يخرجنى من الملة! وأنا سأحاول فعلا تقليل قلة الأدب وإعارتهم إهتماماً من الأساس للأسباب التى ستلى ولأننى أنتقد أشخاص أصبحوا مقدسين لموحّدين تربوا على أن الدين هو جلباب أبيض ولحية، ومهما كان اختلافى مع هؤلاء فأنا لا أرضى أن أكسر صورة رموز لهم، وإن كنت أحتفظ بهذا الحق
حجم السلفيين
السلفيون ظلّوا تحت الأرض لعقود طويلة، خفت القبضة فى الثمانينات ثم عادت لتزيد فى التسعينات، فخفت مجددا لمواجهة الإخوان، وإن كانت قد خفت فى أحيان، فالقبضة ظلت دائما محكمة بشكل ما، ما جعلهم "البعبع" المثالى للمصريين، أن صوتهم مرتفع، وهو ما قد يدفعك لإعتقاد انهم أقوياء، متجهمين فى معظم الأوقات، وهم غامضون نتيجة القمع، ولأن أجهزة الأمن تعرف أنهم فئة صغيرة وأن معظم المصريين وسطيين يعملون العقل كما فعلوا لقرون طويلة حين تبنت مصر المنهج الأشعرى، فقد خوفونا منهم فى ذروة الثورة، نفس الشيء حاصل الآن فى سوريا إلى حد تصويرهم كعصابات مسلحة، أستطيع أن أنعتهم بالتشدد، لكن ليس بالإرهاب، هناك فارق كبير بين السلفية والسلفية الجهادية، لكن لماذا فعل النظامان المصرى والسورى ذلك؟ لأن المصريين والسوريين شعوب منفتحة على العالم، مجددة، نشأت بها ديانات عدة وخفتت أخرى، خرج منها علماء مجددون فى الإسلام، وقديسون لدى المسيحيين، المفارقة أن ما حدث فى اليمن كان العكس تماماً، حين حاول على عبدالله صالح تخويف اليمنيين فى الثورة حذرهم من الإختلاط، لأن اليمن مجتمع محافظ ومنغلق جدا، قبلى، إن حصل ذلك فى مصر أو سوريا لمات المتظاهرون من الضحك
ميزة مصر الكبرى كما وصفها جمال حمدان فى "شخصية مصر" هى الموقع والموضع، مصر تقع فى وسط العالم، لكن كونها ممر لم يحولها إلى دولة سائلة بلا هوية، لأن تضاريسها جعلتها محمية من الاختلاط بشكل كبير بالغزاة والمارين عبرها، هى إذا كخلاط كبير، لكنه ليس مفتوح ليخلط أى شيء وينتج شعب مائع بلا هوية واضحة، تضاف إليه مكونات تحافظ على تطوره لكن ببطء، فليبرالية مصطفى النحاس وسعد زغلول لم تكن الليبرالية التى تسمح بالشذوذ والإستنساخ والإجهاض، الخلاط طرد كل من حاول إقصاء الآخر، فالمذهب الشيعى-كما أعرف على الأقل- لم يتغلغل فى مصر فى عهد الدولة الفاطمية، الخلاط لم يدع للفرنسيين الالتصاق بالنسيج المصرى، وإن كان قد أخذ العناصر المفيدة فقط فى سنوات قليلة، اما اليمن فهى تقع على ناصية واحد من أهم مضايق العالم، لكن جبالها عزلتها ومنعتها من الاختلاط،
المشكلة الأساسية للسلفيين، والتى تستفزهم كثيرا، هى أنهم يدركون تماما أنهم زلطة لا تُخلَط بالنسيج المصرى، الذى احتضن حضارات كثيرة، حين جائت إلى مصر نعمت، فمسلمى مصر ليسوا كمسلمى الجزيرة-التى انطلقت منها رؤيتهم، كانوا انعم، يهود مصر ليسوا كيهود اليمن-قبل خروجهم، حين جاء الإسكندر أدرك أن عليه دخول الخلاط، فذهب إلى كهنة أمون فى سيوة، إذ اننا مختلفون عن مصدر السلفية من حيث الظروف، التى تخرج الرؤى.
التعاطف الظاهرى-كما أزعم- مع السلفيين مبنى على غزو ثقافى قوى من أمريكا والغرب عموماً، بدأ مع فتح السوق المصرية فى عهد السادات ووصل ذروته مع ذروة المحافظين الجدد فى أمريكا، يكافح المصريون هذا الغزو بتشدد ظاهرى لم ينغرس فى النسيج المصرى، يلجأ المصريون إلى التشدد الظاهرى لمقاومة الإذلال الذى تعرضو له لعقود، ولضعف أصاب الأزهر بسبب التبعية الظاهرة لمبارك، لكنه أثبت أنه شعب متمدن فى الثورة، حتى إسلاميوه كانوا وسطيين، يصرخون مع علمانيوه وحتى مع ملحدوه "مدنية"-تذكر الشاب الملتحى الذى يصرخ فى أحد تغطيات الجزيرة بالإنكليزية: إن كنت مسلما، مسيحيا، أو حتى ملحدا-لم يستخدم لفظ كافر- فستقف هنا وتقول لا
إذا فهم ضعاف، والنظام كان يفهم هذا جيدا، ويستخدم بعضهم لتخويفنا
(http://www.shorouknews.com/ContentData.aspx?id=322076)
نهاية الحقبة السعودية
هم يدركون هذا الضعف، وهذا هو سبب ارتفاع صوتهم، وهذا الضعف يزداد مع الوقت، وهو ما يفسر زيادة الإعتذارات عن الإهانات التى وجهت فى المساجد-حازم شومان ويعقوب- وميل البعض الأخر الى تخفيف الصوت لإعادة طمأنة الجماهير التى بدأت تنفض من حولهم-كمحمد حسان الذى لم يعد قادر على استفزازى كما كان يفعل، حتى السلفيين الجهاديين، الجماعة الإسلامية التى روّعت المصريين لسنوات طويلة، عقدت مؤتمرا داخل "مقام أحد الأولياء" بالقرب من الكرنك.. أصنام!
الخلاط توصّل إلى تأسيس دولة مدنية تطورت على مدى أكثر من مائتى عام، وهو بأى حال من الأحوال غير قابل لإعادة المكونات لشكلها الأولّى، إذا الدولة المدنية أصبحت شيء لا رجعة عنه عند المصريين، خصوصا مع إضفاء صبغة دينية على مبدأ الدولة المدنية فى عصر المجددين، محمد عبده والكواكبى(سورى) والطهطاوى ومع كتابات كبار كعلى عبد الرازق، ومع ثورة 19 ومع إجبار النحاس باشا الملك فاروق على حلف القسم أمام البرلمان وليس أمام شيخ الأزهر.
مع إنتهاء الحقبة السعودية
http://www.shorouknews.com/Columns/Column.aspx?id=428242
فَهِمَ من حصلوا على سلطة ليست من الإسلام فى شيء، وإن كانت من الإسلام فهى ليست بالتأكيد إلا لمن درسه، فهموا أن الخلاط على وشك طرد أفكارهم، ليعود للتفسيرات المعتدلة لدينه، لذا فهم يقاومون بشراسة من يدافع عن حياته، ويشغلوننا عن قيام الديموقراطية، وأنا لا أشكك فى نوايا الجميع، لكن النقاش حول شيء بديهى كمدنية الدولة، وأشياء لا معقولة ك"غزوة الصناديق" وإقتحام مسجد النور أكثر من مرة ورفع الأسلحة البيضاء على إمامه، إنما هى محاولة لإعادتنا إلى الوراء، لنبدأ من الصفر، لا لأن نلتفت إلى الديموقراطية الناشئة
http://www.shorouknews.com/Columns/Column.aspx?id=435286
وهو أحد الأساليب التى اتبعتها السعودية لمقاومة موجة الثورات العربية فى الخمسينات والستينات ضد الملكيات والمحتل، ولأن النظام السعودى هش، والقبيلة ضعيفة، فالإعتماد على الوهابيين الجدد، وعلى مقاومة الثورة هنا، فى مصر، قبل أن تذهب إلى هناك-تطمينات شرف فى الخليج لم تكن تتمحور حول الأمن، ولكن حول أن مصر لن تصدّر ثورتها، إذا فكلمات كـ"الناس اختارت الدين واحنا بقى بتوع الدين" لا يمكن أن تفيد إلا النظام السعودى
لكن التاريخ يقول أن أفكارهم لن تبقى طويلا وستتطور مصر وتلفظ من هادنوا النظام، وسيتطور خطاب المتدينين ليناسب العصر، وستضمهم احزاب وحركات اسلامية مجددة كالاخوان والعمل والوسط، وسيرتفع الدين بترفّع رجاله عن السياسة
أعتذر عن أى أخطاء إملائية وأعتذر عن أى ضيق سببته لأى شخص بتهجمى على من يعتبرهم رموز فى الأيام الماضية، وإن كنت أحتفظ بحقى فى نقدهم البنّاء وفى عدم إعتبارى لهم رموزا
شاركت حركة ثوار الجامعة الألمانية المسيحيين فى جمعة الآلام بقرية صول بأطفيح، فى كنيسة الشهيدين بعد أن أُعيد بنائها، وكنت من بين 16 عضوا من الحركة تحركوا من مسجد السلام بمدينة نصر لكنيسة الشهيدين(مارمينا ومارجرجس)، لنؤكد على وحدة المصدر ووحدة المصير، حين ذهبنا إلى هناك لم نستطع التفريق بين مسلمى القرية ومسيحييها، فالسيدات جميعا تلبسن الجلاليب والطُرح، والرجال جميعا يلبسون الجلاليب، سُمر البشرة من العمل فى الغيطان وفى مصنع الطوب القريب من القرية، وحسب كلام من قابلناهم من اهل القرية فالتعليم منتشر فتى القرية، وما فهمناه ان المشكلة مبنية على الشائعات، وعدم الوعى، تعجبنا من ما حدث، كيف ينشغل الناس بالطائفية فى قرية بسيطة، كان البعض ينظر بتعجب إلى الحافلة التى كانت تقلنا(كنا قد ألصقنا عليها "بوسترات" تدعوا إلى الوحدة") والبعض الآخر كان ينظر بترحيب(ولم يكن هذا على اساس الدين، فقد قابلت مسيحى بداخل الكنيسة كان ينظر لنا بتحفز شديد)، بعد أن ركنّا الحافلة ونزلنا، تجمع الاطفال، تهافتوا على الحصول على اوراق كنا نوزعها عليها هلالاً وصليبا تدعوا للوحدة، وما أن يحصلوا عليها حتى يمزقوها، أحد الرجال بدأ معى حديثا، حدثّنى عن ضرورة انهاء الفتنة والمطالبات الفئوية، وأخبرنى ان النفوس صافية ولا شيء بين المسلمين والمسيحيين، فأثنيت على حديثه، واعتذرت عما ظننته من جهل بالقرية لما سمعته بأن أحد اسباب الفتنة هى اشاعة السحر المنتشر فى القرية بين المسيحيين، فقال لى "لأ فيه سحر.. ده واقع يا باشمهندز!"
عند باب الشارع الكائنة به الكنيسة، وجدت حاجز عنده بعض جنود القوات المسلحة وعساكر من الشرطة، سمعت عسكرى شرطة يقول: "هم دول اللى بيولعوا" فرجعت له وسألته مبتسما ولكن متحفزا" احنا برضوا اللى بنولّع؟" وأتذكّر اننى أشرت إلى تاريخ الشرطة وما فعلته على مدار 30 عاما
بادرنى طفل لا يتجاوز الخمس سنوات بالسؤال "انتوا جيتوا هنا عشان النصارى؟" فأجبته بنعم، "انتوا مابتحبوش المسيحيين؟" فقال لى "من زمان واحنا مابنحبهمش"
حين دخلنا إلى الكنيسة وجلسنا مع اثنين من القساوسة، جلبوا لنا ما نشرب، وقدموا الواجب، لكن الكلام لم يتجاوز الترحيب، شعرت باننى اسمع صوت قوى يتردد فى المكان: "خليكوا فى حالكوا"(قوبلنا بترحاب ولكنى شعرت بعدم الرغبة فى فتح الحديث، شعرت بأننى مبارك يزور كنيسة ليُضايَف ويتبادل التهانى والقبل والابتسامات) باستثناء أحد الخدام الذى توسمت فيه ثقافة عالية هو وصديقه، وأنوى أن اقابله مرات اخرى، عرفت منه انه ترك القرية بسبب الطائفية وأنه لا يرجع إليها إلا فى الأعياد والمواسم، أمر القس أحد الخدام ليُرينا الكنيسة، شاهدنا المذبح وعرفنا الفرق بين الأيقونة والصورة، ومعنى التدشين، وأشياء من هذا النوع كنت أعرفها منذ سنوات عدة، همس فى أذنى أحدهم "طبعا هو بيوريكوا كده عشان فيه ناس بتقول اننا بنخبى حاجات فى الكنيسة"، التقتط كتاب لترانيم جمعة الآلام، مكتوب بالقبطية والعربية، فأخبرنى صديقى الخادم بأن الكتابة القبطية هى سر الإشاعة، حيث يعتقد مسلمو القرية أن القبطية هى رسومات سحرية
انسحبت لأخبر منسق الحركة "داود" عن فكرتى بالتنمية البشرية والاقتصادية فى القرية للتقريب بين الناس، وأن نحدّث الناس فى أحد الدواوين-لها اسماء اخرى فى محافظات اخرى، وهى قاعات كبيرة يجرى فيها الصلح والعزاء واحيانا والغداء الذى يقدم حين يتوفى أحدهم- فاصطحبنى لاقابل أحد الضباط، الذى يدعى "هيثم البحيرى" وهو ضابط مباحث برتبة مقدم كما أتذكر، وهو من أنقذ أحد القساوسة حين أُحرِقت الكنيسة، أخبرنى أن ديوان العائلة مفتوح، ولكن الكلام مع أهل القرية عما حدث سيعيد الكلام عن السحر والطائفية، وهو ما لمسته قبل أن أصل إلى الكنيسة، وهذا سيفسد الجو فى اليوم التالى-ليلة العيد- حين تستضيف الكنيسة مسلمى القرية لتقديم وليمة بمناسبة العيد، فعدلت عن رأيى ورأى الحركة فى التوعية بشكل مباشر
وقررنا العمل على التنمية بدلا من التوعية كحل مبدأى لتقريب الناس بعضهم ببعض، فالعمل من أجل القرية سيقرب حتما بين الناس، فالعمل التطوعى من أجل قضية وإن كانت محلية جدا-على مستوى القرية- كفيلة بجمع الناس، وهذا العمل قادر على محو الكثير من اسباب الطائفية المبنية بالأساس على الإشاعات وعدم الاختلاط بين المسلمين والمسيحيين. وبعدها يأتى دور التوعية
أتمنى أن يرسل الأزهر أحدهم، لأن شيوخ القرية كما فهمت ليسوا على العلم والوسطية الكافية، كما أن أحد الشباب المتشدد تكلم عن علاقة السياسة بالمسيحية فى الكنيسة قبل ان نصل، وهو ما يتناقض حتى مع مباديء المسيحية
زيارة المشايخ والقساوسة والفنانين لا تكفى لمحو أثار عهد مبارك التى امتدت لتضرب النسيج المصرى، جذور المشكلة مازالت موجودة وتحتاج إلى حل، حتى وإن اختفت النتيجة-هدم الكنيسة- فمصر تحتاج منا أكثر من التنظير فى البرامج الحوارية بعد العشاء، تدمع عيناى كلما فكرت فيما رأيت تحت الابتسامات والمجاملات فى هذه القرية، الجمر ما زال يشتعل تحت الرماد، والناس خائفة من كشف الجرح لتطهيره
هذا هو انطباعى الشخصى وليس بيانا عن الحركة
بى اس: يسرا هى من طلبت رؤية بقية أجزاء الكنيسة فامر القس أحد الخدام باصطحابنا فى جولة داخل الكنيسة
كان عندي امتحان، رجعت منه كلت ونزلت علي عاصمة جهنم، مقر مباحث أمن الدولة بمدينة نصر
الطريق بيقف تقريبا من اول تقاطع الطيران مع مصطفي النحاس، الناس كسرت بوابة المعتقل اللي قدام المسجد، ورحت عالمقر الرئيسي، هناك النشطاء السياسيين كانوا قليلين جداً، معظم المتواجدين كانوا سلفيين، لأنهم اكتر ناس اتنفخت في الجهاز ده
قدرنا ندخل من شارع جانبي، من خلال قطاع الاتصالات في الداخلية المجاور لامن الدولة، كان فيه سلم طويل وفي اخره باب حديد بين القطاعين، شباب وشرطة عسكرية منعونا من الدخول، جيت انزل من عالسلم لانه كان علي والناس بتتدافع بغباوة وسوره قصير، نزلت لقيت شاب طول بعرض بيفتش اللي بينزل وبيمنع اجنبي من الدخول، رحت عليه وقلتله-علي شاب- الواد ده شكله زي عساكر امن الدولة، قاللي لأ احنا مش لاقينهم، بصيتله بصة انا مش فاهمك يا عمو، قاللي انا ظابط في الداخلية تبع قطاع الاتصالات، المهم الناس زاحمت والشرطة العسكرية اتشغلت في حاجة تانية فدخلنا، 3اتوبيسات من بتاعة الجيش مليانة ورق مفروم و سليم، وجت النيابة العامة والناس حيتهم، اخويا ومنجي نزلوا الزنازين اللي تحت الارض، الزنزانة ضيقة جدا، مافيش شباك، وفيه حمام بلدي في الزنزانة وحنفية، بس كده
كان فيه عربية جيب سودا واقفة، واحنا واقفين بنصوّر، حوالي 10 قاعدين عليها وواقفين علي كواتشاتها واكصدامها، حاولت انزلهم "يا جماعة حرام عليكوا الناس بتشوف شغلها واحنا نبوظلهم عربيتهم" الكل نزل ماعدا واد عامل نص دوجلاس كده :
-"مش هاتبوظ"
لأ الكاوتش هايهوّهي -
-انا عاوز اصوّر
-مانا واقف باصوّر عالارض، الثورة مش معناها نبوظ للناس عربيتها
-ماتخفش.. معاهم فلوس كتير
قالها بغل وبصوت فيه حشرجة وحقد ابن وسخة
بعد شوية طلعت صور تعذيب، من بعيد كنت شايفها لعراة، وبدأت اصور الجهاز من قريب، ومخرجة افلام قصيرة بدأت تصوّر في فيلمها التسجيلي، الناس افتكرتها مذيعة والسلفيين اللي لقوا الجهاز بدأوا يحكوا عن بشاعات اللي حصلّهم جوا
ولقيت نفس الشخص بيسأل اللي ماسك الجهاز: اتصنع فين ده يا أخ؟
-المانيا
-الماني؟ المانيا؟ هاه؟ المانيا يا اخ؟ الماني بتقول؟ هاندمـــــــــــــــــرها المانيا(بصوت فيه غضب وعنف مخيف)
بدأت اصرخ فيه:
تدمرها ايه؟ احنا اتفشخنا 18 يوم في التحرير ماشفتش واحد منكوا، جايين تنطوا عالثورة وتشوهوها؟ هي ناقصة ارهاب وخرا؟
بعد شوية جم شباب كده شكلهم مثقفين: يا جماعة المستشار زكريا جه
وواحد بيسخّن الناس بشكل غريب: مش ماشيين مش ماشيين هاتوا جميع المعتقلين
(الحمد لله اخويا ومنجي لما نزلوا الزنازين لقوها فاضية، ممكن اللي بيسخن ده عاوز يطلع واحد ارهابي، امن الدولة ماكنتش بتطارد النشطاء بس)
بدأت انا اتكلم، واقلوهم يا جماعة المستشار زكريا امين عليها
لقيت واحد طلعلي ب"ترنك" وبيتكلم بعصبيا جدا، ومعاه طفلين، مسك ايدي بعصبية وهو بيزعق: عاوزينّا نمشي ليـــــــــــــــه؟
انا باقول نستأمن المستشار زكريا عبد العزيز( كان في زهني انه ممكن ملفات متعلقة بالامن القومي تتسرب)
زكريا ميـــــــــــــــن، مش زكريا "عزمي" ده هو اللي فضل اسبوع يفرم ورق؟
نزّل ايدك-زقيته وكنت علي وشك اضربه لانه كان بينفضني وهو بيتكلم بس سبته عشان عياله-
باقولك زكريا عبد العزيز من تيار استقلال القضاء، مش عارف احداث نادي القضاة؟
لقيت واحد تاني سلفي بيكلمني بعصبية وماسكني من كتفي، زقيته وصرخت في كل اللي حوليّ-حسيت بالخطر لانهم كانوا يعرفوا بعض وانا ماعرفش دول طلعوا من جوة ولا ايه ظروفهم، بالذات ان التعذيب والعنف بيخلق عندهم عنف مضاد، حتي لو كان دخل بريء فهو هايطلع عنيف- اتكلموا بتحضر، ماحدش يمد ايده، وطوا صوتكوا، اللي هايمد ايده هاقطعهاله
اخويا وصحابي شدوني من وصتهم، مشيت من المكان وانا باكلم حد كان هايقابلني في التليفون وباشتم بعصبية، كنت خايف اوي علي مصر، بالذات بعد الحوار ده
اقلية بس لازم بسرعة احزاب بمرجعية دينية مؤمنة بالمدنية عشان الناس ديه تختفي، مع استقلال الازهر، وعالمدي الطويل قضاء عالفقر والجهل، احنا في اكتر مرحلة حساسة في تاريخ مصر الحديث
لو سيبنا الاخوان يشتغلوا سياسة بشكل شرعي هايقضوا عليهم، تقدر تتناقش مع الاخوان بس دول مستحيل، بعد الغضب اللي شفته امبارح انا مش عاوز فترة انتقالية قبل 6 شهور، وشايف انه جهاز امن الدولة يتحل وكل العاملين فيه يتسرحوا، بس ينشأ جهاز جديد لمكافحة الارهاب من المباحث الجنائية والامن القومي
زي مابيقول منجي المرحلة مرحلة حرب افكار، احنا لازم نوعي كل الناس يعني ايه سياسة، لأن التيار السلفي بينط عالثورة بشكل بدأ يقلقني
بقية الصور هاتلاقوها هنا
http://www.facebook.com/album.php?aid=281798&id=604150587
الثورة صنعت في الشارع بينما كان الانبا شنودة يخوّف منها في الكاتدرائية، الفتنة خُطط لها في وزارة الداخلية بينما كان الأنبا شنودة يخوّف من الاخوان في الكاتدرائية، الدستور يُعَدّل بينما الأنبا شنودة يخوّف من اللجنة المُعَدِلة في الكاتدرائية، مصر بلد فريد من نوعه، الشرطة فيها بتحدف المتظاهرين بالطوب، والأقلية الدينية -المطالبة بالعلمانية- بتمارس السياسة جوة الكنيسة
(الكلام عن الانبا شنودة بما انه بابا اكبر كنيسة في مصر ورمزها، بس كنائس كتير تانية عملت نفس الشيء)
توحيد رأي المسيحيين تحت رؤية الكنيسة هايضر الوجود المسيحي في الشارع المصري اللي بيشكّل المستقبل وانا باكتب السطور ديه، زي ما الثورة نجحت لعدم وجود قيادة تتحدث باسمها، فالتواجد المسيحي في الشارع هايستفاد اكتر لو كل مسيحي قال رأيه، لما تتكلم عن-مع- ملايين المسيحيين احسن كتير-بالنسبة لمصر كدولة مدنية- من انك تتكلم مع شخص او مجموعة اشخاص متخصصين اساسا في الدين(هنا انا مش باقول رأي الكنيسة صح او غلط، مايهمنيش لأني مسلم) لازم كل مصري يقول رأيه، هو عاوز مصر ازاي، مش هو واثق في رأي مين اللي عاوز مصر كده او كده
عاوزين مكرم عبيد و فخري عبد النور و القمص سرجيوس وويصا واصف وجورج خياط ومرقص حنا وواصف بطرس غالي جداد... ببساطة نجيب جبرائيل مالوش اي وزن في الشارع، لازم كل مسيحي يحدد اتجاهه السياسي وينضم لحزب سياسي نضيف او حزب قذر ويساهم في تنضيفه، والا في لحظة تحوّل تاريخية زي ديه احوال الاقباط هاتزيد سوء، العلمانيين اللي زي حالاتي في البلد ديه مش كتير، ولا الاسلاميين الوسطيين امثال الاخوان وحزب الوسط، معظم الاسلاميين-المؤثرين في الشارع بحكم الجهل والطابع المتدين للشعب المصري- هم السلفيين اللي حاربوا الثورة، ودلوقتي بيرفعوا شعار اسلامية في مؤتمر في طنطا ومظاهرة في الهرم، واسلامية هنا مصطلح فضفاض جدا وغيرو اضح ومانعرفش هايودينا لأي نموذج للدولة الاسلامية المنشودة، انا عن نفسي شايف ان الرؤية السلفية لل"دولة الاسلامية" خطر علي بلدي وعلي ديني، ممكن حد تاني يختلف معايا، وديه الروح اللي عاوزينها، الشعب يقرر هو عاوز ايه، بس الاحسن ان كل الشعب يقرر، مش جزء صغير هايشارك، والباقي يتفرج وبعدين يقول اصل ماحدش عمل حسابي
لازم كل مسيحي ينزل كل جمعة يصلّي في التحرير مع المسيحيين اللي بيصلوا كل جمعة هناك قبل صلاة المسلمين، لازم المسيحيين يشاركوا في السياسة، لما المسيحيين يتكلموا عن الدولة المدنية والتيارات السياسية العلمانية بأنواعها تتكلم عن دولة مدنية صوتنا هايبقي أعلي، الكلام عن اخذ حق شخص غير موجود عادة بيبقي مقبول، بس الشخص ده لو واقف جنبك، بتناضلوا عشان بلدكوا، عقل الشخص اللي اعداء الثورة بيحاولوا يستخدموه في تخويف الغرب من الديمقراطية عن طريق ترديد شعارات راديكلية، عقله مش هايقبل فكرة اقصائك
ارجوكوا فكروا في مصر كبلد ليكوا فيه زي اي شخص من اي ديانة تانية، ارجوكوا اتكلموا بصيغة "احنا" عنّا كمصريين، مش عن "شعب الكنيسة"، ارجوكوا شاركوا النهاردة في تغيير المستقبل، والا اي كلام عن تمييز هايبقي عبثي، ماينفعش حد يفضل ساكت وبعدين يقول اصلهم مادونيش حقي
عن المادة التانية في الدستور، دلوقتي اعداء الثورة من الاعلاميين ورجال الدين ورجال الاعمال بيتكلموا عنها مع انها مش مطروحة للتعديل او الحزف من اللجنة المُشَكّلة، المادة ديه دخلت الدستور في ظرف تاريخي، للأسف اتمررت لأغراض شخصية، بس ده مش وقتها، تغييرها او استمرارها محتاج نقاش مجتمعي بين كل المصريين، مسلميين ومسيحيين، وسطيين وسلفيين وليبراليين وارثوذكس وكاتوليك وبروتستانت وبهائيين، النقاش ده عاوز وقت، وتثقيف عن معني المادة وجدواها والظرف التاريخي اللي اتحط فيه، محتاج استقلال حقيقي للأزهر والكنيسة عن سلطة الدولة لفترة تكفي لاختفاء التيارات الراديكلية داخل كل الاديان والطوائف اللي بتستغل التصاق المؤسسة الدينية بالدولة، محتاجة ان ال30% امية تختفي، معاها هاتختفي الطائفية، انا مصري مسلم ضد الصياغة الحالية بس شايف ان مش وقت النقاش حولها خالص، دلوقتي وقت بناء ديمقراطية سليمة
اطلعوا برة الجيتو وشاركوا في تشكيل وطنكوا كمصريين مسيحيين، مش كمسيحيين مصريين، زي ما مسيحيين كتير شاركوا في الثورة، لازم مسيحيين اكتر يشاركوا في الحياة السياسية
الناهردة كان يوم تاريخي بكل المقاييس، اليوم بدأ باني قابلت صحابي وزمايلي في الجامعة(آينش، طارق الخطيب، دودز، شريف علي، وعبد الله سليمان) الناس ديه عمرها مانزلت مظاهرات، وده كان اول فأل حسن، كسر حاجز الخوف
روحني وسط البلد مع بعض، بس كل 2 عاملين انهم مش عارفين الباقيين، بعدين عرفت ان فيه مظاهرة هاتبدأ في جامعة الدول، وصلنا هناك بدري بساعة، فقعدت في قهوة وشديت حجرين، في الطريق لهناك كان فيه 3 عربيات امن مركزي وبوكس، في تقاطع الطيران مع الاوتوستراد، وفي الجزء اللي شفته من العباسية، والجزء اللي شفته من رمسيس.
بعد كده الناس قالت ان المظاهرة اكبر بكتير في التحرير، فمروحناش مظاهرة جامعة الدول بعد ماستنينا قريب منها حوالي ساعة، وخدنا تاكسيات عشان نوصل التحرير، نزلت في عبد المنعم رياض، واتجهت ناحية ماسبيروا، عشرات عربيات الامن المركزي، مخبرين وعساكر بطول الرصيف من هيلتون رمسيس لحد بعد ماسبيرو ووزارة الخارجية
بعدين رجعنا علي التحرير، في الوقت ده توهنا من بعض، طاطا روّح، وفضلت انا وشريف، اينش وعبد الله كانوا في مصطفي محمود علي حسب علمي، ودودز تاه مننا، بعد كده لما طاطا عرف ان الناس موجودة، واننا كنا بنروح الاماكن بعد ماتتفض، رجع تاني
وصلنا التحرير، ناصية كنتاكي، حوالي 30 متظاهر، معظمهم وجوههم غير معروفة بالمرة، شريف سخّن الناس بالهتاف، وبدأنا نلتحم مع الامن المركزي، بسهولة-الخوف- قدرنا نكسر الحاجز ده، الشارع الممتد لطلعت حرب، كسرنا فيه كردون تاني او اتنين، وفضلنا رايحيين من التحرير لطلعت حرب-رايحيين راجعين-، كنت ماشي قدام الناس بعلم مصر وباهتف زي المجنون وبابكي، لما بصيت ورايا لقيت ال30 بقوا 500
كان فيه ولية مجنونة من ال30 الاولانيين، قالت تحيا تونس قلنا تحيا تونس، قالت تحيا ايران قولنالها لأ، قلتلها اعدموا من يومين 3 من نشطاء الثورة الخضراء، قالتلي لا اعتقلوا عملاء، وبدأت تخبط وتمسك ايدي بعصبية، مارضيتش اقل ادبي عليها عشان ست كبيرة،
جالنا شخص شكله مخبر، وقال فيه مظاهرة تانية في التحرير تعالولنا، ومشينا وراه في شارع مافيهوش كردون، طلعنا منه قدام المتحف المصري، لقينا عدد حوالي 300 متظاهر تانيين، فضلنا نهتفن وفاجئة لقينا الاف بيجروا ناحيتنا، كسروا الحواجز من ميدان مصطفي محمود لحد التحرير، جم من كوبري قصر النيل، الامن حدف قنابل مسيلة للدموع، شيلناها ورميناها عليهم، كعادته اينش بيكلّم نفسه
:P :D
لقيته فاجئة قدامي-المرة الوحيدة اللي شفته فيها في المظاهرة- شايل قنبلة غاز-بتبقي سخنة جدا- وبيقول: مش بتموّت علي فكرة يا جماعة وبيحدفها عليهم، اينش ايده اتحرقت، العساكر تعبوا من القنابل لانهم لازم يفضلوا واقفين مكانهم، فجت عربية مصفحة من اللي بيبقي عليها مدفع مية، مشيت بسرعة جنونية بيننا وهي بترش مية، رجالة قلوبها ميتة نطوا عالعربية، خلعوا المدفع وفككوا ال
pump
وكسروا الازاز ونزلوا الظابط، اتطحن ضرب وطلع يجري، وهنا نلاقي غباء مبارك اللي حوّل الشعب لحرامية وميكانيكية لما اهمل التعليم، العربيات اتفممت وهي ماشية
بدأنا نتقدم، بعد ماكنا واقفين في المنطقة من المتحف المصري لنص التحرير، وصلنا لحد شارع الريحاني، ضربوا غاز تاني، وطوب، وقنابل مسيلة، جسمي تلّج، ماكنتش حاسس ان الناس بتجري، روحت عالمطافي ببرود غريب والمدفع بتاعها عليّ وعساكر كتير بتضربني بطوب كبير، احنا كنا بنحدف طوب صغيّر، هم كانوا بيحدفوا علينا بلاط، ورميت حجر عشان اكسرله الازاز، خدت 7 طوبات في جسمي، وتقدمنا تاني وكنا متحاوطين، امن مركزي علي يميننا وشمالنا وفي وشنا، كسرّنا عربيات امن مركزي، وعربية مطافي، ولاول مرة اشوف عميد واقف بيتحايل عالناس ويقولهم: انا معاكم، اول مرة اشوف الاف العسكر بيجروا، اول مرة اشوف شخص قعيد جاي يتظاهر، وعيال صغيرة، وناس عمرها مانزلت في حياتها، الشرطة كانت بتجري تبعد عنّا في 3 اتجاهات الميدان بتاع تقاطع الريحاني مع شارع مجلس الشعب، قبل مايمشوا فككوا عربية المطافي عشان مانستخدمهاش ضدهم، خدنا خوذ ودروع العساكر، والكردونات الحديد استخدمناها ضدهم
كان فيه راجل لابس جلابية بيضة وملتحي، الاول هتف هتافات وطنية، ولما قلبها هتافات دينية الناس قعدت تقول: عاش الهلال مع الصليب، فاتكسف وسكت، وبعدين هتف معانا
ظباط امن الدولة لما ضرب الطوب من الجانبين اشتغل، هربوا، هم وظباط الامن المركزي، وبقينا احنا والعساكر، كانوا بيرموا علينا طوب بغشامة، لما الناس ماكنتش بتخاف وتقف مكانها وهم بيجروا علينا، او حتي تسصقّف، او تجري في اتجاههم، كانوا بيرجعوا تاني ويجروا، مع ان كتير مننا كان متصاب، اللي مجّبر ايده ومكمّل، واللي واخد 7 غرز في دماغه ومكمّل-زي شريف علي- ، اغمي عليّ لما خدت طوبة في دماغي، رماها متظاهر ملوي مش عارف يحدف عدل، فضلت كل ماقوم اقع تاني لوحدي، وفضلنا في مناوشات، نتراجع ونتقدم، لحد اخر مرة يضربوا فيها قنابل غاز، كنت اول صف، فلما جرينا كنت اخر صف، اترمي حوليّ 5 قنابل عالاقل، واختلف احساس حرقان العين وتهيّج الجلد، لضيق في التنفس، وحول، ثم عمي جزئي، لحد ماوقعت، فضلت اتحرك وانا ساند عالسور الحديد اللي في الميدان، وبعدين كان لازم اوصل الناحية التانية، وقعت في مسافة 7 متر 4 مرات
مع الوقت الناس هديت، الروح كانت جميلة اوي، كل شوية حد يجيب عيش او ساندويتشات، ومية ويوزّع، الناس كانت بتتناقش كأنها اخوات، سمعت قصص غريبة، وقابلت ست كانت مسلمة وبقت مسيحية، هي وبنتها، قعدت تقول هم بيوقعونا في بعض، احنا كلنا واحد، بالمناسبة المظاهرة كان فيها مسيحيين كتير علي الرغم من موقف الكنيسة، قابلت راجل مزارع من الدقهلية جه مع دكاترو جامعة عشان يتظاهر، كان بيكلمني عن الديمقراطية وناصر ونجيب ومبارك، عن العدالة الاجتماعية والدستور.. حسيت انه كلام المثقفين جاب نتيجة، ديه من الحااجت اللي اسعدتني
انا شفت فلاحين وناس رجلهم مبتورة وشاب عنده شلل اطفال
كان فيه قيادة واحدة بس شفتها بعيني، الدكتور اسامة الغزالي حرب، وشفت في التلفزيون عبد الجليل مصطفي، وكان فيه عمرو واكد وخالد ابو النجا
الدروس اللي طلعت بيها من اليوم:
1-الامن المركزي والداخلية بشكل عام زي الصهاينة، جبناء، زي مابيقولوا شمع
2-قنابل الغاز بتبوظ الصدر اكتر من الشيشة والجوزة
3-الناس بجد وطنية، الغل في الهتافات اللي ضد الحكومة، والآسي والحب في النشيد الوطني، والبكي عالبلد، كل ده بيقول ده
4-مهم جدا ان مظاهراتك تبقي قريبة من الجامعة الامريكية.. كان فيه شوية مزز يا جدعان
D:
5-الحكومة مرعوبة، قطعوا الاتصالات عن وسط البلد كلها، وحجبوا مواقع كتير، مرعوبين
الكلام عن المعاناة مش ادعاء بطولة، كلنا كنا ابطال النهاردة، انا بس فخور بالكدمات اللي في جسمي، وحزين اني مامتش النهاردة زي اللي ماتو، الموت عشان مصر عالاقل ليه هدف، احسن من موت ممل في سريري، او اموت في حادثة عربية او بمرض من الامراض اللي وطّنتها الحكومة
تُصبِحون علي وطن
يناير 26
كان لازم اروح الجامعة عشان مشروعي، لما رحت استغليت الموقف وحكيت للدكاترة اللي في العيادة عاللي حصل من الطوبة، اني فضلت اقع اكتر من مرة، شكل الخبطة خلاهم يقولولي اني لازم اعمل اشعة مقطعية لانه في احتمال ارتجاج جزئي، بس انا خفت لان كان فيه اخبار عن ان الناس كان بيتقبض عليها لما تروح، واعراض الارتجاج الجزئي ديه زادت بالليل(تنميل في الجسم وزغللة في العين ودوخة) بس الحمد لله ربنا سترها لما نفذت اللي الدكاترة قالولي عليه
جمعة الغضب 28
أولاً: مبروك للمصريين... حتي لو مبارك ماتشلش لحد دلوقتي، بس مؤكد انه فهم ان الشعب المصري ممكن يثور بعد سنين من الإستكانة، وإن الحل الأمني صفر
ثانياً الأحداث: أصدقاء كتير.. قسّمنا نفسنا تلاتات من يوم 27، شوية مننا باتوا في بيت شريف علي، ودّعنا اهالينا-كان عندنا معلومات من أصدقائنا في الجيش بان فيه حالة تأهب عالية، ومن أهالينا في الامن المركزي بان فيه تفويض بضرب رصاص حي، كلمت امي وسألتها ان كانت متضايقة مني، وبعدين روحت البيت، سلمت علي اهلي، وقلتلهم عالتطورات اللي عرفتها، امي قالتلي اتشاهد، انتوا طالعين تجاهدوا، وبعدين طلعنا علي بيت شريف، شغّلنا قرآن، نمنا لساعات قليلة جداً، صحينا صلّينا وطلعنا، اتحركنا لميدان الجيزة، في الطريق، امام جنينة الحيوانات قابلت الأستاذ عبد الرحمن يوسف والدكتور محمد أبو الغار وصحفية، رفضت أرد علي سؤالها لأن الشوارع كانت ملبّشة، وصلنا قريب من مسجد الإستقامة، صلينا في زوايا مختلفة، الميدان مليان بوليس سرّي كتير، وفاكر انه في مواجهة شيوخ زي الدكتور البرادعي، الدكتور عبد الجليل مصطفي، فاجئة حوالي 100 واحد خرجوا، ناس بسيطة من العشوائيات المحيطة بميدان الجيزة، جايين يصلّوا عشان ربنا ينقذ مصر، وهنا بدأ غباء الأمن، لأنه خلاهم مع الثورة لما ضرب بغباء، لضيق نطاق التظاهر في الميدان المتظاهرين كانوا في التحام تام مع المتفرجين.. ولأن الناس بسيطة، فتقدم المظاهرات شباب الطبقة الوسطي، معظم الناس اللي كانت قدّام متقدمة المظاهرات كنت أعرفهم كويس، فاجئة قنابل الغاز اشتغلت عشان تخوّف الناس، كله رجع، وخراطيم الميّة اتوجهت ناحية الناس، لما البعض رجع والبعض فضل، قوّوا الضغط، افتكرت ان عيني اتقلعت لأني ماشفتش حاجة من الميّة، صديق من مجموعة تانية غير مجموعتي حاول يشدني عشان نرجع ورا، بس انا وقعت ورا من المياه، جريت عالمسجد، وساعدت الناس بالمحلول المضاد للحمض اللي في قنابل الغاز
Sodium bicarbonate
وبعدين رجعت، لقيتنا بقينا حوالي 20، كان فيه ملازم أول وسيم وبشوش، كان متعاطف معانا، مابيردش لما الناس شتمته، ولما بدأنا نستعطفه ونقول "يادي الخيبة يادي العار، الأخ بيضرب أخوه بالنار" لمحت الدموع في عينيه، قربت عليه بحزر وبوست دماغه، كان فيه رائد حقير، كل ماكلم العساكر يقولّي "مالكش دعوة انت، احنا عارفين احنا بنعمل ايه كويس، ارجع ورا" رديت عليه نفس ردّي عالعقيد أو اللواء بتاع ميدان التحرير يوم الثلثاء 25 يناير، "وطّي صوتك وانت بتكلمني، انا مش باخد أوامر منك" قال "ارجعوا ورا" قلناله " ارجع انت، ديه بلدنا" ووصلنا لحل اننا هانرجع وهم هايرجعوا، هو كمان كان مبسوط بالحل ده، لان لما الناس اتفرقت، اللي كانوا في المسجد كانوا اقل من 100 شخص، بس الشباب كانوا بدأوا يتحركوا في الشارع، وبدأوا يزيدوا، وبعد ماكانوا شباب من مدينة نصر والتجمع ومناطق متوسطة وغنية، أعداد أكتر من العشوائيات المحيطة بدأت تنضم، كان فيه عقيد حاول يهدّينا ويقول انه معانا، بس لما فشل معانا انفعل، وشفت منظر زي منظر بارونات المافيا في الأفلام الايطالية، لما حاولت اتكلم معاه وهو ماشي، لقيت في تشكيل اتكون حواليه، زي عساكر الشطرنج حوالين الملك، لقيت اني مش هاقدر انضم للشباب في الشوارع لأننا قليلين ومعظم المسجد كان شيوخ وستات وسياسيين، فقررت أني ادخل المسجد، لميت ازايز البيبسي والخل ومعايا المحلول اللي معايا، وبدأت أساعد الناس
للأسف التغيير السياسي لو حصل هايسيب ناس جاهلة وأنانية لحد بعيد في وقت الزنقة، فيه ناس كانت شايلة البيبسي عشان تشربه، وواحد جاي عاوز بيبسي عشان يروي عطشه ويطلع يهتف في مكان الهتاف فيه عبثي لحد اللحظة ديه، واتقمص زي العيال لما قلتله البيبسي لالتهابات الوش، وواحد شكله أمي عمال يقول للناس اللي بديهم المحلول "ادعك عينك بالمحلول واشرب البيبسي، بيقولوا البيبسي حلو للصحة" كان نفسي أسلم الناس ديه للأمن من كتر الاستفزاز، وناس غلابة، فاضل حوالي 100 مللّي من كل حاجة معايا وبعد ماحطهاله في ايده يدلق منها شوية عالأرض، او يستني لحد ماتتسرب من خلال صوابعه وهو بيقول "بأمانة ربنا مافيهاش حاجة؟"، ولما صلّينا سبت الازايز مع ست، لقيتها سايباها مع الناس، رجعت لقيت الناس برضو مصرة ماتفهمش، شربوا الخل والمحلول وغسلوا عينيهم بالبيبسي، وواحد خد مني 3 مرات من المحلول وكل مرة يوقعه، لحد مانفعلت وقلتله مالكش تاني، وكان فيه 2 دكاترة مستفزين جداً، انا كان عندي معلومات بسيطة عن الكيميا من الهندسة، ومعلومات بسيطة عن الإسعافات الأولية قريتها من الانترنت وعرفتها من أصدقاء في طب وصيدلة، الدكاترة كانوا واقفين مع البرادعي طول الوقت، اللي كان تعبان جداً بالمناسبة من الغاز، علي عكس مالناس فاكرة، البرادعي وعبد الجليل مصطفي وإبراهيم عيسي وأخرين من الجمعية الوطنية كانوا معانا طول الوقت، وتضرروا لأن الناس بتدخل تهرب من الغاز وتسيب أبواب المسجد مفتوحة، وناس تانية عاوزاه يدخل بنفسه في الاشتباكات مع الأمن، عرفت من بنت الدكتور محمد أبو الغار ان والدها مختفي من الصبح مع الأستاذ عبد الرحمن يوسف وصحفية اجنبية، لما الأمن بدأ يفقد السيطرة برة دخل ناس بتموت، ستات كبيرة واطفال وشيوخ، وناس بتطلع في الروح، ومعاناتهم كانت بتزيد بسبب الناس اللي كانت بتفتي، فقدت أعصابي، بدأت أترعش وأبكي من الحرقة عالناس اللي بتموت "أقسم بالله سبولهم الدين في المسجد هناخد ثواب"، قربت مني ست منتقبة "حرام عليك ذنب الدين ايه، ربنا هايجيبلنا حقنا وهاينتقم منهم" قلتلها" بقالكوا 30 سنة بتقولوا ربنا هايجيب حقنا، اسكتوا بقي كفاية، دول منغير ملة، احنا اللي نجيب حقنا"
كان فيه مخبر معانا، واضح جدا انه كان مخبر، فضل طول الوقت جوه المسجد مع ان بنيته قوية ومع انه ماكنش متضرر، ربنا يخلّي لينا السينما، عرفتنا علي شكل المخبرين من ايام الملك فاروق، شخص طويل وعريض، بشنب قذر، وبالطو وجزمة جلد، فيه ناس دخلت والدكاترة عرفتهم بالصدفة بعد ماصرخت عليهم لحد مالقتهم، كان فيه شخص بيموت، ضربات قلبه ضعيفة، وبيفرفر، و2 عساكر أسعفناهم، كان فيه شخص مستفز هايدوس عالناس اللي في الأرض عشان يوصل ليهم ويصورهم، اضطريت اضربه جوا المسجد عشان يبعد، لأنهم كانوا بيتخنقوا وكل مارجّع الناس من حواليهم، يشوفوه واقف هو وصاحبه قريب فيقرّبوا تاني، من وقت لوقت كنت باطلع أبص عالتطورات في الشارع، الأمن اتهزم تماماً عالكوبري، اطارات بتتحرق
معلومة للناس عشان لو المظاهرات استمرت:
البيبسي والمشروبات الغازية عموماً، أو بدرة ال
Sodium bicarbonate
الذائبة في الماء
هي سوائل قلوية
Alkaline
بتعادل الأحماض بتاعة الغاز
Acid
ببتحط عالوش بس، مافيش حاجة بتتحط عالعين، الدموع كفيلة بغسيل الأحماض منها، الخل أو البصل لتسهيل التنفس أو الأفاقة
فاجئة لقينا مئات الألاف جم من الشوارع المحيطة وفوق الكوبري، والأمن فاتح لينا الطريق، اتصورنا مع العساكر والظباط، كنا مئات الالاف عن الميدان، ومع الوقت اتحولنا لملايين بلا مبالغة، مش اقل من 3 5 مليون، المسيرة كانت ممتدة من ميدان الجيزة لكوبري قصر النيل في الزمالك، ظباط المطافي عرضوا علينا ميّة، ستات وبنات نزلوا من الشقق بجرادل الميّة، كان فيه ناس تافهة، زي شباب كتير كان ماشي عكس الاتجاه، ولما قلتلهم تعالوا معانا قالولي "معلش يا برنس متأخرين عالماتش" عدينا قدّام فنادق وبنوك كتير من غير تخريب، الناس كسرت صورة حسني مبارك اللي علي سور الأمانة العامة للحزب الوطني بالجيزة، بس شباب مثقف وقف حول المقر وهتف "سلميّة.. سلميّة"، عند المقر ظهر أشخاص يقولوا "بس اوعوا تجيبوا البرادعي كلب أمريكا" وحاولوا يستغلوا ان الشباب اللي اندسوا وسطهم من طبقة مطحونة، ويجرونا لنقاش، وقتها قلتلهم "انتوا بقالكوا 30 سنة خرفان، لما تيجي انتخابات نبقي نختار، دلوقتي خلينا متفقين اننا نسقط النظام" واختفوا المندسين، وصلنا عند الشيراتون-علي مانا فاكر- وشفت منظر واحد من المتشردين اللي كبروا في السن بس برضو أطفال شوارع، جلده مسود من الطين، ساند علي المبني، وبيهرش في راسه، حسيته مش مصدق وفاكر انه بيحلم.
وصلنا لكوبري قصر النيل، هنا الوضع مختلف، فالجهة المقابلة تابعة لمديرية أمن القاهرة وليس الجيزة.. خراطيش-طلقات كبيرة المفروض انها تضرب في الأرض، فلما "تفرش" او تتوزع ماتعورش، بس كانوا بيضربوها عالناس، شفت ناس كتير بيرجعوا متشالين من الصفوف الاولي بجروح في رقابهم شبه الدبح، وكم كبير مع قنابل الغاز، فاجئة ظهرت 3 مدرعات من الجيش، الناس حيتها وطلعت عليها، سلّموا علي الظباط، في تأثر باللي حصل في تونس، بس الظباط لما قربوا من الكوبري قالولهم انزلوا، الناس افتكرت انهم هايشوطوا في الامن المركزي، الا انهما كانوا عالحياد، الامن المركزي عدّاهم وبعدين كمّل ضرب، مع الوقت بدأ الامن يتراجع، وقنابل الغاز تنزل النيل، ومحاولات من الامن للطويق، اللي عالكوبري تراجعوا للتحرير، وحوالي 20 عربية أمن مركزي من اتجاه ماسبيروا، بتمر تحت كوبري 6 اكتوبر وكوبري قصر النيل-تحت النفق-، حدفنا صخور عالعربيات، كانت بتمشي بسرعة جنونية عشان تحاصرنا من اتجاه ماسبيرو والتحرير والناحية التانية من تقاطع قصر النيل مع الكورنيش، الامن المركزي كان بيضرب خراطيش في الهواء عالناس، حدفنا صناديق وكراسي حديدية سدت المكان.. لما وصلنا للمقر الرئيسي للحزب الوطني اتعاملنا بشكل مختلف عن اللي حصل مع مقر الجيزة.
مشهد ماشفتوش حتي في الافلام، مستندات، ونهب او تكسير أجهزة كومبيوتر، توزيع مشروبات غازية وبسكوت من الكنتين الضخم في الساحة اللي في وسط الحزب، محاولات لحرق عربيات الامن المركزي اللي في الشارع، بس شباب واعي طفاها، الا ان شكل العربية اللي بتتحرق فوق كوبري 6 اكتوبر ألهب المشاعر، حرقوا عربيتين قدام باب الحزب، انفجارات متتابعة، ناس طلعت صورة مبارك ودوسنا عليها بالجزم، صوت يتردد بقوة "شُخوا عليها" للاسف الناس حرقت الحزب الوطني ومافكرتش في المتحف المصري(ملاصق للحزب)، شفت طفل شارع معاه صندوق عيش وكان بيبسي، قلتله جبنالك حقلك، كان بيبكي، ابتسم وقاللي الحمد لله، واحد جه قاللي "شكراً يا شباب علي تعبكوا نردهالكوا في الافراح" بصيت لشريف وقلتله "هو انا جاي اجامله في فرح اخته ولا ايه"، كان لازم امشي، مشيت عالساعة 8 مع شريف علي وشريف عبد التواب، وسيبنا ورانا-بعد مافشلنا اننا نلاقي- طارق الخطيب وأينش وعبد الله سليمان وعبد الرحمن قبيل.
الحرية قادمة
6 & 7 فبراير
شوية حاجات حصلت في الميدان لما بتت فيه، كان من احلي ايام حياتي:
1-اولا دول كانوا الحد والاتنين، ديه ايام المفروض بتبقي قليلة من حيث العدد، بس اليومين دول كان فيه مش اقل من 10 الاف بني ادم
2-وقفت في لجنة عشان نحمي الناس، من كتر مالناس كانت بتيجي، ماقدرتش اقعد لحد بعد بدء الحظر، انا وقف من حوالي 7 لحد حوالي 1، ماقعدتش فيهم خمس دقائق
3-كذب التلفزيون كان بيجبلنا ناس، وده احد اسباب-الي جانب الاستقالات الجماعية- اللي خلت خطابه يبقي اكثر حيادية، فيه ست جت هي وابنها وقالتلنا "انتوا شباب مصر، ربنا يحفظكوا
-ربنا يخليكي يا حجة
-قولّي يابني فين مجمع الجوازات؟
-مجمع التحرير كله مقفول يا حجة
-ايوة مانا عارفة، اصل بيقولوا بيوزعوا بطاطين واكل وفلوس
-انتي بتصدقي الكلام ده يا حجة؟ مافيش حاجة زي كده، احنا بنجيب اكل وبطاطين من فلوسنا ونوزعها علي بعض عشان نبات
-لا اصل ناس جراننا جم وخدوا (بتستذكي عليّ)
-خلاص ادخلي، بس انا باقولك مش هاتعرفي تطلعي بحاجة
-ابنها: عالاقل تغيرولنا علي جرح ايديها
الست ديه وابنها لما صحيت تاني يوم لقيتها باتت معانا لما عرفت ان الاعلام كذاب، واشخاص كتير عدوا عليّ وقالوا كلام مشابه وباتوا معانا برضو
4-فيه ظباط امن قومي وسطنا، بيجمعوا معلومات عن روحنا المعنوية، عن احتمالية وجود خطط، عن حالة الناس في السقعة، واكتشفنا منهم ناس فعلا بس سيبناهم في وسطنا وحتي ماوجهناهمش، حصل اني شكيت في ناس ولقيت ان كذا حد غيري ماعرفوش شاكك فيه
5- الناس البسيطة بقت بتفهم في السياسة، الجو المشرف في التحرير، وامتزاج الطبقات خلّي الكبير يحس بالصغير، وخلّي الفقير يفهم في الدستتور والسياسة
6-الكنتاكي بيتوزع منغير كاتشاب
كنت بايت في الميدان وباتكتك من السقعة، حلمت بحوار وائل غنيم وحوار عمر سليمان، ولما الحوارين اتذاعوا كنت بانطق الأسئلة والأجوبة قبل ماتتقال، وحلمت ب 3 او 4 أشخاص كتير قابلتهم تاني يوم، منهم شخص قابلته مع سلمي عقل، كان شكله يخوّف، ولما اتكلمت معاه اكتشفت ان مظهر التشدد الظاهر عليه بيخفي شخص مثقف ومستنير جدا
الحلم أخره كان زي العاب البي اس، لعبة بتتقلب فيلم، كان عبارة عن ناس بتزحف ناحية قصر الرياسة، بس القصر عبارة عن برج طويل جدا وابيض، بنفس تصميم سيميراميس اللي في ضهر التحرير، وان طنطاوي كان جنبي وكان رافض اللي بنعمله وعاوزه يخرج بهدوء، بس احنا اقنعناه باعدادنا فضرب في مبارك، وده اللي حصل فعلا، طنطاوي كان عالحياد لحد لما لقي كفتنا غالبة، بيان رقم واحد من هيئة عسكرية، اعلي هيئة، معناها انقلاب
http://www.facebook.com/AhmedBeak/posts/125515350853916
يوم الخميس 10 فبراير، وبعد الخطاب، مشينا بالعفوية بالالاف لماسبيرو، هناك الجيش كان بيتعامل معانا منغير اي حميمية وبتوتر شديد، علي غير العادة، عادة ظباط الجيش بيتعاملوا معانا بكل حب، فضلت هناك لحد قرب الفجر تقريبا
رجعت مخنوق بعد الخطاب، بس لما نمت حلمت اني باشرب شامبانيا، انا مش باشرب، بس الشامبانيا مشروب احتفالي، خير يعني
لما تنحي، الناس اللي كانت بتخوننا والناس اللي كانت بتهيننا نزلوا واحتفلوا، قدام القصر في الكوربة جه واحد سيس وخطيبته السيس برضو ووقفوا يتريقوا علي المعتصمين: هم دول بقي اللي عاملين مظاهرات، اول ماتنحي هتفوا: تحيا مصر... الله اكبر
مبروك :)))))))))))))))))))))
مش هاتكلم عن رؤيتي لتفجير القديسين والاحداث اللي بعد كده، الموضوع كله يلخبط، ولحد دلوقتي مش قادر افهم ايه اللي حصل، انا عاوز اتكلم عن قداس ليلة الميلاد في كنيسة العدرا بروض الفرج.
بقالي كتير مانزلتش اي حاجة، من يوم مظاهرة خالد سعيد في الاسكندرية، بس احساس الألم، اسبوع كامل من قلة الراحة في النوم، والبكا، الدموع اللي مانزلتش علي قرايبي اللي مات كتير منهم في ال3 سنين اللي فاتت، مش لانهم مش غاليين عليّ مثلاً، كنت حاسس ان مصر ماتت، مش 21 شهيد، كنت حاسس ان بلد كاملة، ذكريات، وتاريخ مُشرّف، بطولات، شعرا، كتّاب، ومعارك تنوير قريت عنها، موقع مصر وموضعها، كل ده كنت حاسس ان بعديه هاقول: يا خسارة
برغم ان عندي امتحانات كل يوم من الحد للاربع، بس كنت حاسس اني لازم انزل، مش هاقول عشان مصر، ولا هاقول الوحدة الوطنية، كل ده كلام نظري، يعني انا لوحدي لما انزل اقضي العيد في كنيسة في شبرا، ده هايفرق مع مصر في ايه؟ انا نزلت عشان حسيت بجو سلبي، حسيت بألم ماحستوش قبل كده في كتابات واصوات صحابي، وفعلا الألم والخوف ده طلع كان موجود
(http://www.facebook.com/notes/bebo-maged/alywm-ln-akhaf/494053494500)
مش هاقول اني حاسس باحساس المسيحيين في مصر، لأ، انا عمري ماكنت خايف وانا رايح صلاة الجمعة، عمر ماحد شاف معايا مصحف وبصلي بصة مش كويسة، بس حاولت اتخيّل الشعور، في الطريق لوسط البلد ركبت اوتوبيس، اول ماركبت سمعت قرآن، القرآن كان صوته مشوش، السماعات اللي في الميني بص تتجاوز ال12، بولا كلمني عشان يشوف انا فين، قلت للسواق يوطي الصوت، فضل موطيه معظم الطريق، بعد شوية عدّي تاكسي، كان مشغّل القرآن بدرجة صوت أزعجت حتي السواق بتاع العربية اللي انا راكبها، بعدها آذن المغرب، ده كله في اقل من خمس دقايق، الآذان كان من الزاوية اللي في تقاطع عباس العقاد مع مصطفي النحاس، انا ساكن في المنطقة ديه من اول مارجع اهلي لمصر، يعني من حوالي 15 سنة، الزاوية ديه المؤذّن بتاعها بيجاهد في المايك، مع ان صوته وحش جداًن والزاوية صغيرة جداً، بس الصوت مسموع في دايرة واسعة اوي.
وصلت الدمرداش، نزلت لان الطريق كان واقف، خدت المترو، في المترو برضو كان فيه حد مشغّل قرآن علي موبايله، افتكرت قبل اليوم ده بسنة، كنت برضو راكب المترو، سمعت في الاذاعة بتاعة المترو اعلان بيدعو لعدم استخدام الموبايل او اي وسيلة تانية لانه يشغّل اغاني بوت عالي او اي مواد دينية، الاعلان بعد ماخلص شغلّوا قرآن بصوت عالي.. واجبار الانسان علي الاستماع للقرآن شيء مردود عليه علي اي حال، ماكنتش مركّز اوي، كنت باردد اغنية "وتعيشي يا ضحكة مصر"
نزلت محطة روض الفرج، رحت قهوة استني، قابلت بولا ونادين، بولا قاللي، ان صعب مسلمين يدخلو لان ديه تعليمات الامن وبعدين جه هاني جورج وعزة مُغازي، وبعد شوية قابلنا ماريان ونوارة نجم، اتجهنا للكنيسة، بولا قاللي انه خايف واحنا عالقهوة، حاولت الطف الجو، او بمعني اصح انقل الاهتمام لأسئلتي السخيفة، من نوع: الفاتحة عندكوا اسمها ايه، عشان لو منعوني من الدخول؟
وصلنا، بولا كلّم والده، الكاتب ماجد الراهب، قدرنا ندخل بعد ما كشافة الكنيسة اللي كانوا واقفين عالابواب شافوا بولا ووالده قالهم
يدخلونا، جوا قابلت سماح، اتلخبطت اوي لما سماح
(http://www.facebook.com/notes/princess-samah-saad/aldhyn-ahbwa-jda/10150122798910295?ref=notif¬if_t=note_tag) قالتلي شكرا انك جيت القداس قدام اهلها، حسيت اننا اتنين مش واحد،
حسيت ان بعض افراد الكشافة ماكنش مطمن لينا، من النظرات، خدوا بطايقنا، والتعامل كان فيه شوية شك، لحد مالأستاذ ماجد جه وقف معانا تاني، لفت نظري التديّن المصري، الشكلي احيانا، زي لما طلب احد افراد الكشافة من كمال-صديق نادين- انه يرمي اللبانة
طلعنا الدور اللي فوق، واحنا طالعين بولا اتكلم مع "ابونا"-اسف مش عارف ترتيبه الكهنوتي- سأله عن نوارة أحمد فؤاد نجم، وكانت الاجابة ان الامن رفض يدخلها علشان محجبة، كان واضح عليه لما سمع ده انه اتضايق
لما دخلنا لقينا الصف الاول فاضي مع ان الناس واقفة فوق بعض، وبدأ أحد الكهنة في عظته، اللي لفت نظري ان العظة وقصة ذكريا والمسيح ويحي والعذراء، الاختلافات بينها وبين الاسلام تتلخص في نقطة اللاهوت والناسوت، وتجتمع في كم المعجزات، في اجلالهم جميعاً بالرغم من ان بعض الاسماء مختلفة-يحي ويوحنا المعمدان- انا كنت مركّز اوي في القصة، مع اني كنت حاسس ان فيه جو غريب ونظرات ليّ من كل اتجاه، وشي كان محمّر جداً، بالذات كل مابقي انا وحوالي 4 غيري اللي في المكان كله مش بنرسم الصليب وقت ذكر المسيح، بعده طلع كاهن تاني، فهمت انه اقل في الترتيب مع انه اكبر في السن بحوالي 20 سنة عالاقل، قال ان الله دايماً بيقلب المشكلة او الكارثة لنعمة، زي الاطفال اللي استشهدوا في مذبحة بيت لحم، وزي شهداء الاسكندرية، البلد فيها روح حلوة اوي، فيه ناس عمرها ماعترفت، وبقالها كتير ماجتش الكنيسة، طول عمرنا بيجي السيد النائب والسيد عضو المجلس المحلي وبعض ممثلي الاحزاب السياسية، وأحضان وقبلات أصبحت روتينية، ونحن لا نشكك في حبهم، لكن اول مرة أري سيدة مسلمة تحمل صليباً مع المصحف-هنا وقفت ست سبعينية، الحاجة فاطمة- القاعة كلها بدأت في التصفيق، حسيت بمشاعر الريبة والشك بتختفي، كأنها مياه بتتسحب، هنا ماقدرتش احبس دموعي، بكيت، بكيت من التأثر، كل دمعة حسيت انها بتمسح دموع الألم اللي منعتني انام او اذاكر بالشكل المطلوب في اسبوع كامل كان المفروض انه مخصص للمراجعة قبل الامتحانات، وبعدها قال أسامينا(ماريان قالتهالهم، في اللحظة ديه اكتشفت ان الصف الاول كان متفضي لينا زي كبار الزوار)، وحضر أيضاً احمد عزت القمحاوي ونادين أبو شادي وعزة مُغازي وكمال وماريان ناجي، وشكل ماريان كده مسيحية(مش عارف ليه الناس طول اليوم فاكرة ماريان مسلمة، بالرغم من اسمها الا انه ماكنش متأكد، واتفتشت عالباب، وواحنا خارجين قالولها شكراً علي زيارتك) بدأ حد من الكنيسة يصورنا، والناس صقفت لينا، بس انا ماكنتش حاسس بذرة غرور، او احساس كاذب بالبطولة، انا كنت حاسس بروح مصر اللي سمعت عنها بس عمري ماحسيتها، حسيت ان التصقيف لمصر كلها، الروح ديه حسيتها لما عرفت ان بعض اصدقائي اللي عمرهم مانزلوا مظاهرة، او حضروا قداس العيد مع اصدقائهم، عرفت انهم حضروا، زي احمد عامر مثلاً.
هاني عادة مابيروحش الكنيسة بس راح عشان يدخلنا ويبقي معانا، هو كمان كان عنده امتحانات، الروح اللي كانت هناك ماحستهاش قبل كده مع اني بانزل مظاهرات من 10 سنين، من يوم مادخل شارون الحرم الابراهيمي، انا دلوقتي عندي عشرين سنة، انا حسيت باحساس ماعتقدش حد حسه من وقت اخر حرب دخلناها، حسيت كأني في خطاب لعبد الناصر-سيبك من اختلافي مع عبد الناصر- مش في عظة في مكان عبادة لدين انا مش مؤمن بكل اللي فيه(اختلافات اللاهوت)، يعني اعتقد ان عادة لما حد بيبقي في دار عبادة لديانة غير ديانته بيبقي في احساس تاني غير اللي انا حسيته.. كل ابتسامة، كل سلام، والراجل اللي صعبت عليه عشان كنا مزنوقين وواقفين طول الصلاة وقاللي ارتاح مش لازم تقف، والكلام اللي قاله القس عن مصر وعن الجو اللي موجود بعد العملية الارهابية، والحاجة فاطمة اللي كانت عجوزة اوي وفضلت واقفة لوقت طويل من الصلاة.
الايقونات فن جميل جداً، فكرت في اد ايه حد ممكن يبقي مؤمن بحاجة، ومايتعبش من رسم قضيته، الايقونات كلها مخالفة لرؤية ديني عن حاجات كتير، بس لما تبصلها هاتحس بسلام.. فكرت في المصريين، اد ايه شعب متدين، رسومات معابد الالهة المختلفة، من وقت الفراعنة، والكنايسة، وبعد الاسلام الخط العربي، حاجة مرهقة وخطيرة انك تقف علي سلم لحد قبة المسجد او الكنيسة عشان تكتب اسماء الله الحسني وايات قرآنية، او ترسم المسيح في ايقونة، وانك مع الخطورة والتعب ده تقدر تطلع حاجة جميلة كده
طلعنا برة بعد مالصلاة خلصت،بولا وماريان كانوا عاوزين يطلعوا عشان الزحمة، بس المسلمين مننا كنا عاوزين نكمل الصلاة للاخر، الطقوس كانت مبهرة بالنسبة ليّ، حاجات كتير من اللي اتقالت عن المسيح والخير والشر كنت مختلف معاها بحكم ديني، بس كنت متفّهمها، مش بس كده، انا كنت منبهر، من طقوس مصرية في اقدم كنيسة في العالم، الكنيسة القبطية، ماكنتش فاهم اللغة القبطية، بس كنت حاسس بسلام وطمأنينة، وروح ايجابية في المكان زي اللي باحسها في المسجد، كلنا بنعبد خالق الكون، صحيح مختلفين في نظرتنا ليه، بس متفقين علي قيّم الحب والخير والجمال والاخاء، كلنا ولاد ادم وحواء زي ماقال الكاهن
لما طلعنا اكتشفت ان هاني كان في كنيسة غير كنيسته، سألته، فقاللي انا كنيستي عند جامع تاني، في إشارة لعمارة اتحولت لمسجد، مأذنة متخللة كل بلكونات العمارة ال4 ادوار، ومكرفون موجه للكنيسة، زي ماقال هاني (اكيد شايف انه بيهدي الكفار اللي جوا)، انا ابتسمت لهاني وقتها، بس تخيّلت الألم، تخيّل ان كل مكان عبادة لدينك حد يجي يبني جنبه مكان عبادة لدينه ويقولك الوحدة الوطنية
انا دلوقتي حاسس بروح ايجابية، اتطمنت علي مصر، مابقتش ارد بعصبية عالناس، رديت من غير ما انفعل علي حد معلّق عند ماريان علي الستاتوس بتاعتها عن اليوم، لما قاللها بعتي مسيحك وكنيستك بكام
وعاوز كل واحد بيستفز اخوه في الوطن انه يفكر كويس اوي، قبل مايحوّل عمارته لمسجد قدام كنيسة قديمة جداً، قبل مايجبر اللي راكب معاه انه يسمع تعاليم دينه، انا جربت الشعور مرة واحدة لما ركبت مع سواق تاكسي مسيحي وكان مشغّل شريط عن المسيحية، وقتها سكتت، كنت مكسوف اقوله زي مابقول للمسلمين اللي بيعملوا كده، وفهمت شعور كل مسيحي حد بيستفزه في الشارع والشغل وقدام الكنيسة، الارهاب بيستغل الطائفية عشان يولعّها، الهدف مش 21 شهيد وفوق ال90 جريح، الهدف اشعال الفتنة، اللي جدورها انا وانت والشيخ والقسيس والاعلامي والظابط والمدرس، كلنا بنزرعها
http://www.facebook.com/?sk=messages&ref=mb#!/pages/mana-dd-altjart-baldyn/187034484642393
عشان شهداء مصر، عشان تعيش مصر، مش هانستسلم للإرهاب وهانحضر قداس عيد الميلاد يوم 6 يناير في اقرب كنيسة، انا هاحضر القداس في كنيسة العدرا في شبرا
