فيه كام حاجة حصلت كده عاوز اتكلم عنهم:
1- كان فيه واحد بدقن ومراته المنقبة فاتحين صيدلية جنبينا فكنا بنجيب منهم، لما اقلهم صباح الخير يقولولي وعليكم السلام(وكأني قلت عم صباحك)، لو نزلت بشورت يبصولي بصة مش كويسة، وبينصحوا الغير محجبات بالحجاب وبيسألوا اذا كانوا مسلمات ولا لأ، المهم طلع ان الراجل ده مهندس والصيدلية باسم اخوه الصيدلي اللي عايش بره، وعربيته المازدا متأجرة، ومادفعش فلوس متأخرة عليه لشركات أدوية، والأدوية مش هاينفع ترجع عشان باظت من سوء التخزين، وابن الوسخة بيتكلم عن الدين وكأنه بتاع امه

2- واحد اسمه لؤي معايا في الجامعة، كان بيشبه مسيحيين مصر بالصليبيين، وبيقول علي نفسه اخوان(وهو اهبل ومش فاهم يعني ايه اخوان اصلا) وبيشتم واحد عشان كاتب في الفيسبوك ان سيدنا عيسي في قلبه، وعشان مشترك في جروب اسمه السيدة مريم خير نساء الأرض

3-قوانين الجامعة بتمنع الشعارات الدينية او السياسية، علمانية الجامعة معمولة عشان الجامعة مكان علم، وانا احترمت الموضوع ده عشان ماينفعش يبقي فيها سياسة(لان الطلبة منهم اللي اهاليهم حزب وطني ومنهم اللي اهاليهم معارضة ولو اتفتحت للسياسة الناس هاتولع في بعض بالذات لان ماحدش في الجامعة عنده وعي سياسي)، بس الشق التاني ده بقي مظلوم اوي، يعني لوكرات الجامعة مليانة شعارات اسلامية من نوع فداك ابي وأمي يا رسول الله"" و"لا اله الا الله"، و"الحجاب طهارة وعفاف"، ماشي الكلام ده انا مش مختلف معاه بصفتي مسلم، بس مش المفروض القوانين تتطبق؟ يعني الجامعة فيها نسبة مسيحية كبيرة، وفيها داكترة المان يهود، لو واحد حط صليب هايتقطع من ناس زي لؤي، ولو حد حط نجمة داوود الناس هاتفتكرها علم اسرائيل ويقطعوها، وتحصل فتنة زي اللي حصلت في هندسة عين شمس السنة اللي فاتت، رحت اتكلمت مع العميد واقنعته، وقلتله انا مش ضد الاسلام لا سمح الله، انا عامل فيلم بارد بيه علي فيلم فتنة وقضيت وقت كبير باناقش الاجانب عن الاسلام، ماحدش من اللي معلقين "فداك ابي وامي يا رسول الله" عمل حاجة زي كده، اقنعته وقاللي فعلا القوانين لازم تطبق عالكل، وماعملش حاجة، بعديها باسبوعين بدات اشيل بنفسي، ماعرفتش اشيلهم من زمايلي، واحد يقلي اضحك عليا وشيلهم بعد مانزل، والتاني يزقني ويقولي "مش انت علماني، خليهم ينفعوك لما تموت"، واظن انه افتكر قوله تعالي " سَوَاءٌ عَلَيْهِمْ أَسْتَغْفَرْتَ لَهُمْ أَمْ لَمْ تَسْتَغْفِرْ لَهُمْ لَنْ يَغْفِرَ اللَّهُ لَهُمْ إِنَّ اللَّهَ لا يَهْدِي الْقَوْمَ الْفَاسِقِينَ" بعد ماقالي كده
لما حكيت لناس تانية، واحد قالي "وانت ايه اللي مدايقك، ماهو ده ديننا، يعني كده احنا مستفيدين" وكأن العالم مكسب وخسارة، مش ده بيتناقض مع الاسلام؟ لما نبقي كل همنا بنكسب ولا بنخسر بغض النظر عن هل ده بيتعارض مع القانون ولا لأ، عموما بعد الميدترمات انا هاعلق بانار كفاية علي اللوكر بتاعي، عشان الناس بتقلي كل واحد حر في لوكره، ولو مسيحي او يهودي او بهائي او اي حد علق شعار ديني علي اللوكر بتاعه وحد شالهوله هاسحل اللي شاله.

اللي بيحصل في مصر من قمع للاقليات وللمرأة طبيعي جدا، لان الاغلبية مطحونة زي بقية الشعب، فبتحاول تبهدل الاضعف علي قدر الامكان، فتركب مواصلات تسمع قرأن بيتقري بطريقة سعودية وصوت عالي يخرملك ودانك، والراجل يروح البيت العصر يضرب مراته، بس مثلا طلبة جامعتي كلهم "ميسورين"، بيعملوا كده ليه؟ هل هم لما علقوا"فداك ابي وامي يا رسول الله" فهموا الغرب ان الرسول مهم بالنسبة لينا؟ وهل قوانين الجامعة معمولة عشان تنتهك؟ او زي ماقالي صديق "ك# ام القانون"؟




4- دكتور الفيزيا، طالع عليه اشاعة انه يهودي عشان اخر اسمه فيه "مان"، وايه يعني لو يهودي؟ فيه يهود اشرف من عرب كتير اوي(نعوم تشومسكي، سميحا فلابان، وبني موريس)

5-المواصلات كلها متعلق فيها شعارات دينية مع ان السواقين بيعملوا مليون حاجة حرام في اليوم، مش بس اسلامية، اسلامية ومسيحية(بس المسيحية بتبقي في التكسيات بس)، يعني انا زنبي ايه لما اركب تاكسي اسمع قسيس بيتكلم عن حاجة في المسيحية، وليه لما اركب لو السواق عرف اني مسلم بيعلي وبيطلب مني فلوس زيادة عن المعقول بكتير ويكشرلي(نفس الحاكية بتحصل من السواقين المسلمين)

يمكن الناس شايفة ان العلمانية كفر، او زي ماقال صديق "ممكن في اخرها توصلنا للكفر، بس هي في حد ذاتها لو زي مانت بتقول مش كفر"، بجد الشعب ده رايح في داهية ان شاء الله


5 comments:

  1. Mohamed Hamdy said...

    بتقول رايح فى داهيه ان شاء الله ؟ لا احب اصحح معلوماتك ان الشعب خلاص راح فى داهيه

    تحياتى ليك .. انا موافقك على معظم تصرفاتك فى البوست وبحييك كمان على دقه ملاحظتك لكل الهراء الى بيحصل فى البلد

    سلام  

  2. karakib said...

    :)) تدوينة جميلة  

  3. hexagram13 said...

    للاسف العيب فى التشدد الدينى, الناس الدين لحسن دماغك
    و مع احترامى لديانتك انما الاسلام لا يسمح بتعدد الديانات و مبيفكرش بفكره حط نفسك مكان الاخر
    و مبدا حب لغيرك ما تحبه لنفسك على الكافر للفيلسوف كنفوشيس

    و المسيحين برده بيعلموهم فى الكنيسه انك متصاحبش المسلم ابعد عن المسلمين
    بالاضافه لسلبيتهم فى اخذ خقوقهم و ده عيب فى تعاليم الانجيل
    انا كنت مسيحى و عارف

    فعلا البلد فى داهيه انصح اى واحد عنده عقل و حاسس ان امه جابته بلد غلط يهاجر الى اى دوله  

  4. ذو النون المصري said...

    زي ما انت قلت
    رايحين في داهيه ان شاء الله  

  5. 3rby said...

    hexagram 13:
    للاسف انت بتتكلم زي المتشددين
    الاسلام من اكتر الديانات اللي كفلت حرية العقيدة

    "ولو شاء ربك لأمن من في الأرض كلهم جميعا أفأنت تكره الناس حتي يكونوا مؤمنين"(يونس 99)

    "ولو شاء الله لجعلكم أمة واحدة ولكن ليبلوكم في ما ءاتكم فاستبقوا الخيرات إلي الله مرجعكم جميعا فينبئكم بما كنتم فيه تختلفون"(المائدة 48)

    "ربكم أعلم بكم إن يشأ يرحمكم أو إن يشأ يعذبكم وم أرسلناك عليهم وكيلا"
    (الإسراء54)

    "لا إكراه في الدين قد تبين الرشد من الغي"(البقرة 256)

    "وقل الحق من ربكم فمن شاء فليؤمن ومن شاء فليكفر"(الكهف29)

    "قل الله اعبد مخلصا له ديني فاعبدوا ما شئتم من دونه"(الزمر 14،15)

    وسورة الكافرون بحالها بتكفل حرية العقيدة وعدم التدخل فيها
    "لكم دينكم ولي دين"

    كل الايات اللي فاتت بتشترك في ان غير متبع الاسلام كافر، بس ليه الحرية الكاملة في الاختيار

    كان فيه مرة يهودي ليه نزاع مع علي رضي الله عنه والقاضي نصر اليهودي علي الامير

    فكرة المساواة بين المسلمين وغيرهم جوا المجتمعات من اهم الحاجات اللي خلت الاسلام يعيش وينتشر والناس ترضي بحكمه

    بس في الكنيسة وفي البيت(مسلمين ومسيحيين) العيال بتتعلم ان متبع الدين التاني ده نجس، ومن اول الاسالة اللي العيال بتسالها لبعض في الكي جي والابتدائي هي هو انت مسيحي ولا مسلم

    وانا متفق مع حكاية سلبية المسيحيين في اخد حقوقهم، زي كل المصريين ماهم حاطين ايديهم علي خدودهم