كنت لسه باتكلم مع منجي عن البروباجندا، فكرتي عنها عندي من زمان بس كسلت اكتبها في البلوج
بس قريت نووت عبد الرحمن عياش عن الاخوة وغيرهم من اللي بيقولوا السينما حرام
فاستفزني وقلت لازم اكتب البوست، بالذات لانه قال علي لسان احد ال"ملتزمين"انها سر بلاء الشعوب!!!
شوفوا، اقوي دولة في العالم دلوقتي تعتبر امريكا، مين عمل امريكا؟
البروباجندا عملت امريكا
شركات السجاير اللي غزت العالم بصورة راعي البقر ابو سجارة في بؤه، والظابط اللي بيطلع دين ام عصابة من 100 وغد حقير لوحده، واصلا ظباطهم مابيخشوش مناطق معينة بالليل، والجندي اللي بيحاول يدمر الدبابة بالرصاص!، ماركات الهدوم، التكنولوجيا، وكتييييير
الاهم بقي، هولي وود،، هولي وود خلتني وخلت ناس كتير تفتكر ان امريكا كسبت الحرب العالمية التانية وكانت بتحارب لوحدها، ويحسسك ان اوماها بيتش كانت اقوي معركة عالاطلاق، مع ان روزفلت دخل امريكا الحرب في اخرها، رمت قنبلتين زريتين في اليابان، وعملت انزال في فرنسا، وبح، ماخسرتش ملايين المدنيين زي انكلترا وفرنسا، ولا 8 مليون عسكري زي الاتحاد السوفيتي و20 مليون مدني، دخلت في الاخر وخدت نص الكعكة، وكل الناس لحد سنر المراهقة كانت فاكرة انها حاربت لوحدها، حتي لما بتعرف الحقيقة برضو ترسبات الانبهار بالعسكري الامريكي اللي هو اصلا فرفور بتفضل عندك

تقريبا الفيلم الوحيد اللي حسسني ان امريكا اتسحلت في فيتنام كان "فورست جامب"
بقية الافلام بتجيب معركة ولا اتنين اللي كسبت فيهم امريكا
ماحدش بيجيب ان امريكا دخلت تلحق كرامة انجلترا وفرنسا اللي اتبعترت، واتبعترت كرامتها هي كمان

البروباجندا ديه تحسسك ان امريكا اقوي دولة في العالم، حتي قبل ماتبقي كده، البروباجندا خلتنا حتي نفقد ثقتنا في نفسنا ونصدق اننا شوية بدو همجيين زي ماصورتنا في افلام كتير(فيه جزء من جيمس بوند جايب مصر كانها عثمانية)

فيه شركات بتوصل نسبة راس المال الموجه للبروباجندا ل30%
وفيه شركات بتقع بسبب عدم اهتمامها بالبروباجندا، وده من الاسباب ان الشركات في مصر والعالم العربي عموما بتكبر بسرعة في اولها بسبب الاهتمام بالاعلام، واول ماتكبر بيفتكروا الناس هاتفضل تشتري للابد منغير مايفكروهم

امريكا عمل قناة الحرة عشان تغير عقول 200 مليون عربي، وقنوات زيها كتير في اماكن متفرقة، لما بيجي يتعمل فيلم عن الجيش الامريكي امريكا بتدي الفيلم دبابات وطيارات وهلمة، بس عشان تحسس العالم انها الاقوي، مع ان فيه توازن قوة عسكرية من اول ما اتعمل السلاح النووي، الدول التانية اضعف اقتصاديا وده مش بسبب التكنولوجيا، ده بسبب البروباجندا، البروباجندا امركت شعب كامل
انا باقري كتاب عاوز ابقي اعرضه اسمه "الخطيئة الاولي لاسرائيل" الكتاب بيعرض كتب مؤرخين اسرائيليين ضد الصهيونية
المهم فيه جزء منه بيقول ان اللي خلي بريطانيا تسيب سفن المهاجرين مع انها كانت بتمنعهم
فيلم سينما عن سفينة اسمها اكسودس رجعوها وخلوها تلف علي مية مينا ونزلوا منها المهاجرين اليهود الالمان بالقوة، يعني اسرائيل قامت بفيلم، وقالك سبب تخلف الامم
فلما يجي حد يقلي ديه سر تخلف الشعوب، يبقي لازم اعرف انه كان بيشوف حاجة عقيمة جابتله هو تخلف،

1 comments:

  1. ذو النون المصري said...

    صحيح كلامك عن البرباجندا
    كفايه فيها فعلا انها ممكن تغير عقليات الناس من الشيء الي نقيده و كفايه انها ممكن تشوه الصور الحسنه و تحسن الصور الشائهه
    اي فيلم عن فيتنام لابد ان يكون الفيتنامي قذر في شكله و الامريكي ذاهب كي يعلمه
    اكاذيب طبعا
    و العرب ايضا و كذلك الكوبيين
    اي عدو لامريكا هو في السينما قذر و متخلف
    و هذه الصور صدقناها عن كثير من الشعوب و غيرنا صدقها عننا