خمسة اخوان

بصوا اولا انا اختلطت في الفترة الاخيرة بناس كتير جدا من الاخوان من القطاع الطلابي الي الكوادر الي القادة نفسهم.
مبدئيا ناس محترمة وزي الفل بس ده مش موضوعنا انا هاتكلم عن ايدلوجيتهم.

مبدئيا انا لو عندي ذرة شك في ان الاسلام مش حل ماكنتش بقيت مسلم كنت بقيت اي حاجة تانية ودافعت عن حق اعتقادي بالجزمة، بس يعني ايه الاسلام هو الحل، الدين اولا شيئ شخصي شخصي شخصي (لكم دينكم ولي دين) بين العبد وربه، يعني هو حل للامور علي المستوي الشخصي، ومين قال ان اللي موجودين مش مسلمين، في كمية الحروب الاهلية علي مدار ال1400 سنة اسلام مين قال انا المسلم، انا مشكلتي كلها منحصرة في الالف واللام بتحسسني انهم معرفين كده وكانهم لوحدهم المسلمين، وبعدين زي ما قال سيدنا علي (القرأن حمال أوجه) هاتطبق انهو اسلام، يعني الاسلام دين خاطب المسلم والمؤمن والكافر والمسيحي واليهودي، كمان كل يهودي وكل مسيحي وكل كافر وكل مسلم ليه فهمه ورؤيته الخاصة للاسلام يعني لو المصريين 70 مليون يبقي فيه 70 مليون فهم للاسلام. هانحكم بانهي اسلام من السبعين مليون؟؟!بلاش سبعين مليون قول حاجة وخمسين مليون مسلم برضو فيه اختلافات كبيرة جدا

ولاني مسلم فمقتنع ان الاسلام منصف وزي الفل بس الخوف من اللي هايحكم بيه ورؤيته للاسلام، يعني مش عاوز الاخوان يبقوا زي حماس (ولا فتح يلعن ابو الجوز عالمسا)
فكرة ان ماينفعش رئيس او رئيس وزرا يبقي من دين غير الاسلام عشان حرام فيها عنصرية واجبار الاخر علي تنفيذ نفس الفكرة، يعني كده كده مصر اغلبيتها مسلمين ومش هايجي رئيس مسيحي بس ماحدش يقول انا مش هاختاره عشان مسيحي ماتختروش وانت ساكت وخلاص بدل المشاكل، بس افرض قدامك الظواهري وقدامك حد مسيحي محترم وكفء ونزيه هاتختار الظواهري عشان لا والله المسيحي ده كافر؟

حكاية بقي الغموض فخلاص انتهي لانهم نزلوا برنامج حزبهم.

حاجة كمان الاسلام دين كله حقوق انسان وحريات وزي الفل-ايه حكاية الفل معايا؟-(حسب رؤيتي انا لان زي ماقلنا القرأن حمال اوجه)
يعني لو اقصيت الاسلام تبقي بتقصي الحريات ديه، وطبعا ماحدش عاوز كده، ممكن يترجموا القرأن علي شكل قوانين مع القياس طبعا لان فيه حاجات صعب تتنفذ علي نفس الشكل اللي من1400 سنة، بس مايقوليش ده الاسلام لانه لو قال كده ماحدش هايتكلم ويقول لا انا مش موافق علي القانون ده هايقولوله يا مرتد لومش مسلم هايقولولهوانت مال امك هو ديننا ولا دينك. انا باعمل كده في حياتي بترجم اسلامي لقيم متفق عليها بين كل الناس ومايبقاش فيها نقاش بدل مالخبط نفسي بكمية التفسيرات المهولة للاسلام. شفت في حياتي كمية ناس بتعمل حاجات حرام كتير وبيحللوها لنفسهم بفهم خاطئ للاسلام بس لو كانت قيم او قوانيين كانوا هايبقوا زي الفل، ممكن لو اسلام منغير مايبقي علي شكل قوانيين كل يوم القانون هايتترجم بشكل مختلف سواء من الاخوان او من براهم وده غلط طبعا. مايبقاش قانون يبقي بظرميط
مايقليش ده الاسلام لاننا كده بنلغي الدولة المدنية وبدل ما مجلس الشعب هو اللي يشرع هانلاقي الشيوخ هم اللي بيشرعوا ونرمي بقي مجلس الشعب ومجلس الشوري في الزبالة ونجيب شيوخ هم اللي يشرعوا وتبقي كلمة الله ومافيش كلمة بعد كلمة ربنا يا ولاد الكلب. وتقلب بقي بايران وولاية الفقيه ومدد يا سيدي العباس مدااد.
يعني لو حزبهم من الاخر بقي حزب اسلامي القواعد في نفس الوقت علماني الطريقة زي حزب العدالة والتنمية يبقوا بجد عملوها صح لان بقية الاشكال للحركات الاسلامية اثبتت فشلها في العالم كله

1 comments:

  1. weswes said...

    انت عارف رائ فى الموضوع ده يا احمد
    وتقريبا كده احنا متفقين جدا
    الحزب اللى فى تركيا حدد وجهته من الاسلام
    انما الاخوان
    فلسه فى ضباب كثيف بيحيط بيهم