بصو الفشخرة ديه في الحكومة وفي الشعب. احنا عندنا مثلا كشعب كمية موبايلات مش موجودة في دولة بحجم مصر وبامكانيات مش موجودة بالكميات ديه في الدول المصنعة نفسها يعني مثلا كان فيه فيلم اسمه
cellular كان البطل الaaتاني موبايل 660 وقت ما نزل الفيلم ده كان البواب بتاعنا معاه الموبايل
بس خلاص مش مهم الناس بتحب تضيع فلوسها في الفاضي بس اهي فلوسها. الدور والباقي علي الدولة وانا هنا مش باتكلم علي عهد مبارك لا انا باتكلم علي من ايام محمد علي، عندنا كمية قصور مش موجودة في الدولة اللي احتلتنا علي مدي تاريخنا. يعني مثلا فرنسا فيها الايليزيه -مش فاكر اسمها- والباقي مفتوح للعامة. انجلترا فيها قصور كتير بس اقل من عندنا وكمان بتتفتح للناس
امريكا اللي هي اقوي دولة في العالم ماحلتهومش غير البيت الابيض اللي هو اقدم بيت فيكي يا امريكا وبيتفتح متحف والناس بتدخل مكتب الرئيس .يعني فعليا القرد اللي بيحكم العالم وبيلطش للرؤساء قاعد في عشة بالنسبة لقصورنا.اما عندنا لو عديت القصور هاتلاقيها لا نهائية. مش بس كده بيتبني جديد والاستراحات بتكبر وتبقي قصور.وراجل ادخل القصر الجمهوري بتاع روكسي ولا راس التين .
لا وحاجات ضخمة واسوار عالية. البيت الابيض بتشوف اللي جواه وده بيدي احساس ان الشوارع واسعة جدا.

طيب بالنسبة للمتاحف. الاثار بتتنهب بقالها سنين من المخازن بمئات القطع. ومش عارفين يبنوا متاحف
فاجئة طلعوا بالمتحف المصري الجديد اللي عند الهرم ده.اللي نقلو رمسيس ليه مش عارف بكام مليون، ماسمعناش انهم نقبوا عن اثار في المنطقة ديه قبل مايبنوا بدل مايدفنوها ولا انهم درسوا البناء ده ممكن يضر الاثار المكتشفة في المنطقة فعلا ولا لأ.ولا حتي عملوا دراسة عن هايجيبوا الفلوس منين. النهارده باتفرج علي "او تي في" لقيت فاروق حسني طالع بيقول انهم عاوزين الناس تتبرع علشان يكملو وبالذات العيال الصغيرة علشان يبقوا ساهموا في بناء تاني اكبر مشروع ثقافي في العالم.

فكرني بمستشفي سرطان الاطفال القزاز ديه قعدوا سنين يشحتوا عليها برضو وبانينها بخامات غالية جدا وماعتقدش انهم هايرضو يدخلو فيها طفل شوارع ولا واحد هدومه مقطعة.يعني الحضور بالملابس الرسمية.

مش بس كده. شوفتو مؤتمر العراق اللي كان في شارم الشيخ السنة اللي فاتت،شفتوا القاعة اد ايه وشوفو قاعة مجلس الامن وشوفوا اتفاقية كامب ديفيد بتاعة مصر وبتاعة عرافات وشوفوا حجم المكان بالنسبة لقوة الدولة.شوفوا الترابيظة بتاعة اجتماعات الحكومة الاسرائلية وحجم ترابيظة حكومتنا مع العلم ان اسرائيل دولة نووية ومصنعة.
دفعتي فيها اكتر من 1000 طالب جايبين 100% في الثانوية العامية متخيلين ان العدد ده ممكن ماتلقهوش علي مستوي اوروبا كلها. احنا دولة متخلفة وعندنا اكبر عدد بيجيب 100% في الثانوية وموازيتها

علشان كده مصر هي بلد الجنون المطلق

4 comments:

  1. دردشه said...

    حاجة طبيعية و مبالع فيها  

  2. مصراوي said...

    ربنا يعين يا رجال حاجة مش طبيعية ابدا  

  3. السعودية said...

    شكرا على المقال الرائع  

  4. دبي said...

    عايزين مصر ترجع زي زمان