كنت واقف عالسطح امبارح باصلح الدش،كنت بافك سولتب ابيض بس التراب مخلي اول طبقة لونها بني غامق،تاني طبقة كانت ابيض من التلج،سرحت وقلت لنفسي مصر زي السولتب دلوقتي اسود بس ياتري ممكن بكرة تبقي ابيض في ابيض ولا ديه احلام

التراب اللي هو الناس اللي موسخة شكلنا وشكلها دلوقتي ممكن يمشو ويجي الانضف منهم
فكر كده......كلنا كلنا مش كويسيين..مافيش حد كويس،صحيح في حد احسن من حد،بس ده شئ نسبي،بس مين اللي يحكم ويقول مين احسن من مين؟
طيب بكرة لو جه ناس احنا مقتنعين انهم احسن من اللي موجودين دلوقتي، تفتكروا لو حاولوا يعاقبوا اللي قبليهم هايقدروا يحددوهم؟
لو عملنا قايمة مثلا فيها الناس اللي خربتها وقعدت علي تلها واللي يستاهلوا انهم يتحاكموا ويتعاقبوا..القايمة ديه هاتبقي كام ورقة؟لو فردناهم عالارض الورق ده هايبقي كام متر؟الورق اللي مكتوب فيه اسم سبعين مليون شخص ده يطلع كام
طيب مين اللي يحاكمنا كلنا؟

طيب الحرية اللي كلنا بنحلم بيها ديه شئ موجود ولا زي مابيقول منجي كده حاجة مش موجودة عالارض
يعني شايفين كل الدول اللي بتتمنظر بالديمقراطية والحرية طلعت فشنك وكلو اي كلام
يعني لو غيرنا وجت ناس تحكم ممكن يعملو ديمقراطية وحرية ولا هاتعجبهم السلطة وهايدخلوا اللعبة
في رايي الحكاية محتاجة ان الشعب هو اللي يراقب مش ممثلين عنوا ولا صحفيين ولا نواب ولا قضاة المفروض الشعب كلو
بس اذا كان الشعب نايم في العسل ازاي هايرقبوا الحاكم الجديد وازاي اصلا هايجبوه
طيب يبقي الحكاية مش طالبة وجع دماغ بقي وكلو وحش ومافيش حاجة كاملة
نعمل ايه؟
نستني لما نموت بقي
تفتكروا في الحياة الجاية هانبقي فاضيين للشعارات ديه؟
يعني لو في الجنة اكيد مش هابقي فاضي ولو في النار لو قلت رايي هاخد علي قفايا
لا ممكن في الجنة يبقي ليا راي وكده
طيب لو طلع كل ده مش موجود
مش الجنة والنار انا باتكلم عن كل حاجة
لو طلعنا اصلا مش موجودين او بنحلم اقصد كابوس...مش بالذمة تبقي اوسخ ذنمبة خدناها في حياتنا او في عدم حياتنا؟
اوسخ مقلب اننا جينا او اننا حلمنا والاوسخ اننا لسه عايشين او لسه ماصحيناش
عايشين في عالم مافيهوش كمال كلو فيه غلط
الصدق.....اكبر كذبة
الحرية......لو فكرت فيها هاتلاقيها مش حرية برضو بيحكمها قوانين
الجمال.....بقالي سنتين كل ماشوف شئ جميل باشوف عيوبه في لحظتها وبيبقي في عيني وحش
الخير.....دايما مش لوحده وبيبقي لغاية في ضميراللي بيعمله
بيجيلي حلم بقالي كام سنة عبارة عن شئ ابيض وشكله منتظم وجميل اوي بس فاجئة بيظهر جواه اشكال غامقة ومش منتظمة
ماكنتش عارف ايه ده بس ببساطة...هي ديه الحياة