للتوضيح بس الواطيين اللي اتكلمت عنهم اتنين او تلاتة بس وهم اكيد حاسيين بوطوهم
انا قلت استني منجي يكتب عشان كان مصمم ننزل بوستاتنا في يوم واحد وانا بوستي
طويل فمش هاينفع قلتلوا طيب استني سنة علي اول بوست ليه بس مش عارف كان مستعجل
المهم بقي، مرت سنة وكام يوم علي اول بوست اي كلام ليا
هاحكي عن التجربة بقي،اولا اسم البلوج احنا مختارينه عشان اغنية ام تي ام(اي كلام في الاحلام)ماكناش لاقيين اسم يعني فقلنا خليها اسم اغنية.
في السنة ديه شخصيتي اتغيرت كتيير،اولا بقيت باعرف اسمع،مابقتش عصبي زي زمان(انا لسه عصبي جدا بس مش زي زمان نوهائيا)
احسن حاجة في التدوين(مش هاقول معرفة الناس لان كتير من اللي عرفتهم شخصيات لا مؤخذة واطية ومنافقة جدا طبعا في ناس سعيد جدا بيهم وهم اللي هاكتب عنهم وفي ناس مش هاجيب سيرتهم)
احسن حاجة في التدوين هي المعارك اللي بتحصل،غيرت رايي في حاجات كتير حاربت عشانها بس طريقة النقاش ديه فعلا بتحسن الشخصية وبتقربك من اللي قدامك وكتير من اللي حوليا حسوا اني اتغيرت عن قبل التدوين للاحسن
.ومن الحاجات الحلوة جدا اني عرفت منجي اكتر وبقينا انتيم بعد ماكنا بنتكلم كل كام شهر،بجد باحبه زي اخويا
اول بوست دايما بيبقا اهبل جدا
يعني اول بوست ليا تحس ان محمد سعد بيتكلم(نحب نقول للناس ديه كفاية بقي)وبعدين قلت كفاية هبل عشان كده البوست خلص احسن بوست كتبتو مع عيوب العربي اللي فيه كان ده
:D
اكتر حاجة كانت بتخوفني ان يتقال عني انا ومنجي مش تمام اصل كانت جاتلي فترة دماغي كده اوي وخصوصا اني لقيت شهروز حاطة لنك علاء ومنال تحتيه عربي ومنجي طبعا هبل يعني
اكتر حاجة كنت باكتبها ودايقتني ان مقالات ابويا مابتعجبنيش مع انها بتعجبني جدا اصل انا عندي زي عقدة مش عاوز حد يقولي انت ابن عزت القمحاوي وعشان كده مش عاوز ابقي صحفي
مسحت بوستين واحد كنت منهار فيه وواحد كنت كاتب حاجة عن المرشد مسحته لما اشتد اضطهاد الاخوان لان مش شئ كويس لما اكتب حاجة زي ديه وهم منفوخين كده
اول حد كنت بادخل عنده كانت زيزي وبعدين بلو وبعدين بلو روز وبعدين بقي فتحت معايا،المدونة فضلت فترة كبيرة تقريبا طول حرب لبنان عاملة زي النشرة وانا كنت اهبااال اجيب صور من عالنت وانشرها
هاكتب بترتيب المعرفة عن ناس حبتها وحاجات لفتت نظري
بنت مصرية:
اول بوست لزيزي:وها هي بنت مصرية تصدر،تحس انك فاتح قناة خليجية
احلي حاجة فيها انها بتكتب وهي هادية وتحس بالراحة في مدونتها،اكتر مدونة تحس انك في بيتك فيها ومرتاح كده مش ضيف،زعلت اوي لما غيرت التصميم اللي كان موجود لما بدات ده كان اكتر تصميم مريح كده،اللي كان فيه قطة فوق،اكتر حاجة زعلتني منها (هي وبلو)لما كانت بتقول التاج للي عاوز يعملو ساعتها كتبتلها تعلييق طويل بس حصل ايرور فكسلت اكتبوا تاني(الكلام ليكي انتي وبلو)اول تاج شوفتوا كنت لسه مابقليش اسبوع تدوين،قلت لنفسي انا باجي كتير يا رب تبعتهولي(علي اساس انو حاجة جديدة عليا بس اصلا طلع رخم) لما بعتوه لناس ماعرفهاش قلت خلاص هي ماتعرفنيش هاتبعتو ليه يعني التاج اللي بعده اتدايقت،فيه واحد بقي بجد كنت حاسس اني هاعيط لو معملتوش وهم الاتنين زي مايكونوا متفقين قالوا اللي عاوز يعملو يعملوا اللي هو علي اساس ان فيه حد هايرضي يعملوا لوحده
اكتر حاجة فرحتني وبجد اثرت فيا لما كنت متنكد من مجموعي وكتبتلي بوست ياه كنت طاير بيه وقعدت اوريه للناس اقولهم بصوا ديه بنت
،مصرية كاتبالي بوست
المدونة الوحيدة اللي بجد مابقدرش اشيل الابتسامة وانا عندها،بتقول كلام غريب بس عسل غالبا بيبقي في اول البوست بداية كده فريدة(مين فريدة ؟)من امثال(احم)او قلي يا حضرت دايما بتكتب حاجتها هي ورايها هي زي انها عاوزة تطير طيارة
مش بابقي باضحك عليها بابقي مرتاح ومبتسم بجد انتي اختي يا زيزي
بلو:اللي زعلت منك فيه كاتبو فوق اهو بس ياه بجد باحب مدونتك،في رمضان مرة كنت فاتح كذا تاب ولقيت موسيقي اشتغلت ومش شايف عند مين من صوتها عرفت ان ديه اكيد بلو،التصميم والموسيقي شبهك يا ريت ترجعيها تاني دايما بتكتب حاجت شبهها،في بوست مش قادر انساه من كلمتين معبر اوي هي مسحته(دايما بافرح بحاجات صغيرة والحلو فيها انها حاجاتي)مش هانسي بوست فرحتها باول لبس تشتريه لوحدها.انا كاتب بوستات غريبة وفيه حاجت كتير عندك انتي وزيزي احلي بس دول اللي علقوا في دماغي لانهم شبهكوا.
باكسل اوي اطلع فوق عشان اعلق بعد الموضوع وعلي فكرة التولبار لما كان عالجنب كان احلي اول بوست برضو زي الكل فصحي وبتاع
اروي الطويل:بتعجبني نرفزتك اوي ووالله من اكتر المدونين اللي ليهم معزة خاصة صحيح عمرنا ماتفقنا بس باحس كده انك اختي وكنت بازعل اوي لما كنتي بتزعلي مني،باحبك زي اختي يمكن عشان احنا الاتنين لاسعين زي بعض ونفسي اطلب منك حاجة ياريت ماتغيريش المدونة تاني عشان الارشيف.انا علي فكرة متابعك بس مش باعلق عشان كل شوية الجهاز يخرب او اخرج من الدي اس ال انا دلوقتي باكتب من نت كافيه عشان لسه الدي اس ال اللي لينا لوحدنا مادخلش بس انشاء الله هابقي اعرفك لما اجي.فاكر بوستك عن الكرتون(قريب)باحس ببوستات غريبا انا عارف بس حلو وخلاني ابتسم
شهرووووووووووز:
شهروزة من المدونين اللي باحبهم اوي ومابزهقش من الكلام معاها ولوني خدت علي قفايا كذا مرة ايام الامتحانات لانها بتنام في نص الكلام
واقعد اقول سلام وهي في العسل بس باحس كده انها اختي الكبيرة اللي بتحبني اوي
شهروزة ليها حاجات كده لوحديها زي الضحكة اللي داياما نفسها تحس كده انها بتعمل كوبي وبيست نياهاهااااا او مثلا حكاية الالف معاها بتخليك تنطق الكلام وتحس انها بتتكلم مش بتكتب بتخليك تنطق الكلام زي ماهي عاوزاه
اول بوست تقول فيه:انا من اكتر المخلوقات،كان شهروزة مخلوق غير البشر
في الشات بتلاقيها رغاية اوي بس ماتزهقش منها ودايما بتخليك تتكلم وتجبرك ماتكلمش حد غيرها وهي اونلاين
سيزر:
فاكر لما ماقدرتش تستحمل رخامتي بس اصلي لما شوفتك طلعت غير الصورة اللي في ددماغي.اصل انا باعمل صورة لكل مدون لحد ما اشوفه وانت طلعت اهدي من ما كنت اتصور.كنت فاكرك شاب ميتال بقي وكدهزبس كده احلي
من اكتر المدونين اللي اثروا فينا بافكارهم
رشا:
اتاخرتي عن مكانك بس انا كاتب بالترتيب
رشا الانسانة من احسن الناس اللي قابلتهم،باحبك حب خاص جدا،تعرفيني اكتر من نفسي وبتفهميني منغير ماتكلم،نفسي ترجعي المدونة تاني عشان كده ماينفعش بجد
رشا من اقر الناس ليا ومن اكتر المدوينين اللي باحبهم،دايما بتسمع حتي لاوقات طويلة جدا وبتستحمل رخامتي حتي في التعليقات الهبلة اللي باكتبها والترخيم عالناس اللي بتعلق
بس انا كده اللي باحبهم باعمل حاجات هبلة بابقي شايف انها حلوة وقتها
البوستات اللي في الاول كنت باحس انك مستعجلة كده وانتي بتكتبيها في الاخر باحس ان الموضوع ماخلصش بس انتي لسه هاتكلمي تاني يمكن قمتي عشان الشغل تلاقي البوست اربع خمس سطور،او يمكن عشان مابزهقش من كلامك.اكتر حاجة فاكرها في بوست ليكي(كان بودني احط لنك بس انتي خربتيها)لما فرحتي بالالوان اللي جاتلك
هو البوست كده طول بس انا هاكمل
اكتر حد كان غامض بس محبوب بالنسبالي هو زنزانة:البنت ديه دايما كان بيحصل حاجة لما اجي ادخلها فقعدت شهور مادخلش وبعدين قريت شوية من بوست شهروزة اللي عنها بس كنت في الامتحانات فمكملتوش كلمتها الاول عالمزنجر وعبرت عن اعجابه ;D
تحس كده انها اسكندرنية من روحها اللي بتضحك دايما.بوستاتها اللي مش اخبار بتبقي مسخرة.مش عارف اقول ايه كمان بس باحبك اوي يا راندا والله
ايبيتاف:
-برضو من الناس اللي طلعتي مش شبه الصورة اللي كنت راسمهالها- اظاهر مابعرفش ارسم
بتعقديني بالانجليزي بتاعك(ماشاء الله) مع اني في مدرسة لغات
باحب مدونتك اوي اوي اوي
عيلاء ابن عمي:
المدونة بتاعتك بجد مسخرة
مابقدرش ابطل ضحك عالتعليقات اللي من كلمة زي اشطه او جامد عشان تبقي علقت يعني ومضيت الحضور
بتكتب بوستات غريبة زي ان برة حلوين عشان بيشربوا خمرا وبياكلوا خنزير
سمراء النيل:من اجدع المدونين علي عكس ناس كتير واطية ماتكلمتش عنهم لما بيتشهروا بيبطلو يعدوا او يسالوا وباحب اوي اوي شعرك بكسر المش عارف ايه
نوران:كانت جدعنة جامدة منك السؤال في الامتحانات كل بوست.بيعجبني اوي تهيسك في النشرات
اصل ذو النون من اجمد الناس اللي عرفتهم في التدوين وتحبه كده بس لو يبطل فصحي مرة يبقي اشطه
من اكتر الناس اللي زعلت علي انقطاعهم عن التدوين المزاجنجي ومصطفي اسماعيل
كان نفسي اكتب عن كل اللي حاتطلهم لنكات والله بس اانا في نت وكده هافلس بقالي ساعات كنت هاكتب عن الواطيين بس بعدين عشان مايستهلوش ازود وقت
بس الجدير بالذكر ان دعاء اتجوزت يا جدعان محتاجة بوست بس ماحصلش نصيب قريبا جدا انشاء اله الف مبروك يا دعاء
علي فكرة اللي عاوز يعلق لما يدخل عالكومنتس هايلاقي مكتوب بخط نمنم خالص لو عاوز تعلق مش عارف اللي عملو منجي ده بس اشطه يعني
سلام
الاول قولي مين اللي صمم البلوج دة
عشان ابطحه باي حاجة في وشه
يا ابني انا نظري راح
دة سهاري يا حبيبي
المهم بقي كويس اوي اني طلعت من الناس اللي مش واطين
اقولك علي حاجة
فاكر زمان لما كنت بتعلق عندي وساتعها عرفت انك عصبي اوووي
اقدر اقولك فعلا انك اتغيرت والعصبية قلت عندك
المهم انا والله فرحانة اوي اني كتبتني
واديني اهو اول تعليق
وثانيا يا اعم احنا لا مشهورين ولا نيلة
احنا بنمشي جنب الحيط
واللي مش عارف ايه دة هبقي اقولك ليه بعدين
:)))))
طمني عليك يا عمنا
وابقي اسال انت وبطل وطينة
اه نسيت اقول الف مبروك لدعاااء
هروح اباركلها
اولا
بلييييييييييييز يعني لو ثمحت كبر الخط انا لبسة نظارة مش طالبة هي يعني نظري يضيع ومستقبلي معاه
بس هو اللوك جامد بس عايز يتظبط كتييير يعني
بس ايه يا ابني البوست ده جامد
وانا اسمي اتقال يا بشر لولولوللولولوللي وحد قال كلام كويس ع النشرة لولوولولولولوللي
وبالمناسبة ديه انا هعملك تهنئة ف النشرة اللي جاية ديه
يا ابني سيبك من الناس اللي مضايقينك كبرلهم علشان تعيش
وكل سنة وانت طيب يا باشا وعقبال السنة اللي اية واللي بعديها :)
شكل الكمبتوتر لسه بايظ ربنا معاك :)
والف مبرووك لدعاء :) وعقبالك
ايه الثيمات الجادة دي
حلو التصميم الجديد مبروك ع الحيطان
وميرسي ع الكلمتين اللذاذ دول،مش عارفة ليه حاسة انى هموت قريب يا احمد،اصل كذا حد فى وقت قريب بيتكتب عني كلام حلو
بس قولي والنبي،يعني ايه انا زي قناة خليجية؟ دي حاجة حجلوة وللا حاجة وحشة
انا ضحكت اوي لما قريتها بس مافهمتهاش
:)
وكل سنة وانت طيب
انجي:
انانفسي اعرف ايه اللي كونلك فكرة العصبية دي مع اني بابقي هادي عندك ومفرفش ولا كاني مسطبح
مش كل اللي اعرفهم وماكتبتش عنهم واطيين هم حوالي اتنين تلاتة ولنكاتهم لسه موجودة عشان منجي مش عشاني
انا والله علي طول عندك بس الكومبيوتر اتصلح ماتهنتش بالنت غير يوم وبعدين العيال عملوا استفتاء وخرجوني فبنزل نت كافيه
نوران:
الكومبيوتر اتصلح وزي ما قلت عملو انتخابات وخرجوني
منورة
زيزي:
تموتي ايه بس فال الله ولا فالك
ديه م مجاملة علي فكرة اللي كتبت عنهم هم اقرب ناس ليا في التدوين
بس زي قناة خليجية ديه مش وحشة ولا حلوة ولوني بكره الخليجيين هي نفس الطريقة بحلتها الجديدة وكده
بالنسبة للحيطان بقي ماتفرحيش اصل الجهلة طلعوا كتير مايعرفوش الموزيلا زي الاخت اللي فوقك مجانية التعليم بقي فهانغيره لان الكلام بيبقي نازل في الانترنت اكسبلورر
كل سنة وانتو طيبين متزعلش منى ياحمد اما اقبلك هبقى اشرحلك كلمنى شكراً
تصدق بالله؟
بقالى ربع ساعة بأفصص المدونة علشان ألاقى كلمة لوعاوز تعلق بتاعتكم وأدخل منها
لحد ما احوليت
حتى شوف؟؟؟
(وش بعيون حولة)
===================
مبروك السنة وكل سنة وانتوا طيبين انت ومنجى
وعقبال مية سنة على بلوجر
ومدونتكم تبقا أحسن وأحسن مما هى كدة كمان
متتصورش أد اية حسيت انى فرحانة لما انت افتكرتنى وسط الناس
والله فرحت جداااا
وانت عارف انا بحبك أد اية يا واد يا عربيلااا وبأحب شقاوتك وقفشاتك
بس بذمتك
أنا بأسكك على قفاك فى وسط الكلام؟؟؟؟
بذمتك يا مفترى؟؟
ماهو أغلب الوقت بأكون واقعة من الشبكة
أو جاللى انذار من البيت بأن فيه طوارىء تحتاجنى ومش بيبطلوا ينادونى طول ما انا فى البيت
لكن والله كا بأقصد ابدااااا انى أزحلقك
انا رغاية يا رخم؟؟؟؟؟؟
ماشى
لما اشوفك بس
أجمل حاجة فيك بقا
أنك بالفعل بقيت تتعلم من طريقة نقاشك مع الناس
بقيت تستعمل عقلك قبل لسانك دلوقتى
بطلت اندفاع زى ما كنت داخل بصدرك كدة فى البداية
وانا فاكرة كويس انك من اكتر المدونات اللى بازورها
وجميل جدا انك اعترفت ان التدوين وحرية الكلام فيه غيرت من طريقة تفكيرك وعملت لك تيير فى حياتك
ناس كتير بتتغير فعلا للأحسن يمكن لكن بتكابر انها تعترف بكدة
كل سنة وانت و منجى طيبين
يا دزمة
انا اتعميت م الخط
وفضلت ساعة ادور اعلق فين؟
واستنجدت بالنجدة
ودا يؤكد اني مش سكندرية وانما صعيدية اصيلة
................
وانا كمان بحبك يا دزمة جداااااا ونفسي اشوفك
واذا بقي لي ابن متأكدة انه هيبقي زيك دزمة و مسخرة ومشاغب ومدوخ كل البنات
ولما شوفت تعليقك اول مرة عملت مولد
بس طبعااان انا اعرفك من قبلها وكنت بنم عليك مع شهروزة كل ما تكون كاتب حاجة كدا ولا كدا
مش بعلق كتير بس اوعي تفتكر دا تنطيط يا دزمة
كل الحكاية ساعات بتكون قافل البوستات بالضبة والمفتاح ومبحبش الكلام اياه بتاع اسعدتنا ونورتنا
وفرحت جداااااااا يا دزمة لما رغينا سوا ع الماسنجر خصوصا انك فتحت قلبك ع الاخر
فين الجاتوه والبيبسي اللي وعدتني به؟
خللي بالك انا بحب جاتوه الشيكولاتة
واوعي تنسي البيبسي
يا دزمة
(انا بحب اشتم اللي بحبهم اوعي تزعل من كلمة دزمة)
:)
كل سنة وانت طيب يا عربي
و عقبال التدوينة رقم 967687567575 :)
وايه ده
انا اسمي مكتوب؟؟؟؟
:D
شهروز:
غيرنا التصميم عشان خاطرك يا كبير اهو
لو مافتكرتش شهروزة افتكر مين يعني
اه برضو ميت الف
اكدب يعني؟
:)
وانتي طيبة يا قمر
رانداز:
حلوة رانداز ديه
كده ولا كده ازاي يعني
بس انا عارف انك من المعجبين من زمان يعني وبتنمي عليا وبتاع
;D
انا برض عاوز اشوفك انتي وشهروزة بس قالتلي لما تنزل مصر هاتكلمني
ايبي:
والله يا ابي انا اسف بس التايم كان خلص فمعرفتش اتكلم عنك كفاية فكروتت اناس اللي في الاخر
بس والله باحبك انتي ومدونتك ولوني باتشائم من اسمك بس عسل يعني عشان اسمك
وسوري انا مش باعلق عشان ابويا قلب جهازي فبنزل ادخل من نت كافيه
اخر وحده بس :))
انت عارف انا قولتلك ايه بجد مبسوطة فيك وفي منجي اوي وبحب ناس كتير اتعرفت عليهم من هنا
وشكرا على الكلام الجميل الي كتبته احرجتني يا بني
:))
انا قفلت نظرة الى الداخل مؤقت لحد ما احس اني قادرة اكتب حاجه بس عندي من اوراقي يعني ابقو زوروني :))
سلام يا جميل
انا اول مرة اشوف البلوج بتاعك وعجبني اوي البوست عشان حسيت فيه انك بتتكلم مع نفسك وبتكتب الكلام ده
ولو اني مش بفخم في التاج والكلام ده وعندي مشكلة في التواصل مع البلوجرز التانين عشان بدش الكلام واطرش الكلمتين اللي جوايا
لو عندك ساعتدك وقت ممكن ياخوي والله وبحسن نية تقولي ايه موضوع التاج ده
( سلملي على منجي ومتخفش مش فاهمك غلط ولا حاجة بس ساعات كده في كلمات ممكن توحي بمعاني تانية ) سلام