أولاً: مبروك للمصريين... حتي لو مبارك ماتشلش لحد دلوقتي، بس مؤكد انه فهم ان الشعب المصري ممكن يثور بعد سنين من الإستكانة، وإن الحل الأمني صفر

ثانياً الأحداث: أصدقاء كتير.. قسّمنا نفسنا تلاتات من يوم 27، شوية مننا باتوا في بيت شريف علي، ودّعنا اهالينا-كان عندنا معلومات من أصدقائنا في الجيش بان فيه حالة تأهب عالية، ومن أهالينا في الامن المركزي بان فيه تفويض بضرب رصاص حي، كلمت امي وسألتها ان كانت متضايقة مني، وبعدين روحت البيت، سلمت علي اهلي، وقلتلهم عالتطورات اللي عرفتها، امي قالتلي اتشاهد، انتوا طالعين تجاهدوا، وبعدين طلعنا علي بيت شريف، شغّلنا قرآن، نمنا لساعات قليلة جداً، صحينا صلّينا وطلعنا، اتحركنا لميدان الجيزة، في الطريق، امام جنينة الحيوانات قابلت الأستاذ عبد الرحمن يوسف والدكتور محمد أبو الغار وصحفية، رفضت أرد علي سؤالها لأن الشوارع كانت ملبّشة، وصلنا قريب من مسجد الإستقامة، صلينا في زوايا مختلفة، الميدان مليان بوليس سرّي كتير، وفاكر انه في مواجهة شيوخ زي الدكتور البرادعي، الدكتور عبد الجليل مصطفي، فاجئة حوالي 100 واحد خرجوا، ناس بسيطة من العشوائيات المحيطة بميدان الجيزة، جايين يصلّوا عشان ربنا ينقذ مصر، وهنا بدأ غباء الأمن، لأنه خلاهم مع الثورة لما ضرب بغباء، لضيق نطاق التظاهر في الميدان المتظاهرين كانوا في التحام تام مع المتفرجين.. ولأن الناس بسيطة، فتقدم المظاهرات شباب الطبقة الوسطي، معظم الناس اللي كانت قدّام متقدمة المظاهرات كنت أعرفهم كويس، فاجئة قنابل الغاز اشتغلت عشان تخوّف الناس، كله رجع، وخراطيم الميّة اتوجهت ناحية الناس، لما البعض رجع والبعض فضل، قوّوا الضغط، افتكرت ان عيني اتقلعت لأني ماشفتش حاجة من الميّة، صديق من مجموعة تانية غير مجموعتي حاول يشدني عشان نرجع ورا، بس انا وقعت ورا من المياه، جريت عالمسجد، وساعدت الناس بالمحلول المضاد للحمض اللي في قنابل الغاز

Sodium bicarbonate

وبعدين رجعت، لقيتنا بقينا حوالي 20، كان فيه ملازم أول وسيم وبشوش، كان متعاطف معانا، مابيردش لما الناس شتمته، ولما بدأنا نستعطفه ونقول "يادي الخيبة يادي العار، الأخ بيضرب أخوه بالنار" لمحت الدموع في عينيه، قربت عليه بحزر وبوست دماغه، كان فيه رائد حقير، كل ماكلم العساكر يقولّي "مالكش دعوة انت، احنا عارفين احنا بنعمل ايه كويس، ارجع ورا" رديت عليه نفس ردّي عالعقيد أو اللواء بتاع ميدان التحرير يوم الثلثاء 25 يناير، "وطّي صوتك وانت بتكلمني، انا مش باخد أوامر منك" قال "ارجعوا ورا" قلناله " ارجع انت، ديه بلدنا" ووصلنا لحل اننا هانرجع وهم هايرجعوا، هو كمان كان مبسوط بالحل ده، لان لما الناس اتفرقت، اللي كانوا في المسجد كانوا اقل من 100 شخص، بس الشباب كانوا بدأوا يتحركوا في الشارع، وبدأوا يزيدوا، وبعد ماكانوا شباب من مدينة نصر والتجمع ومناطق متوسطة وغنية، أعداد أكتر من العشوائيات المحيطة بدأت تنضم، كان فيه عقيد حاول يهدّينا ويقول انه معانا، بس لما فشل معانا انفعل، وشفت منظر زي منظر بارونات المافيا في الأفلام الايطالية، لما حاولت اتكلم معاه وهو ماشي، لقيت في تشكيل اتكون حواليه، زي عساكر الشطرنج حوالين الملك، لقيت اني مش هاقدر انضم للشباب في الشوارع لأننا قليلين ومعظم المسجد كان شيوخ وستات وسياسيين، فقررت أني ادخل المسجد، لميت ازايز البيبسي والخل ومعايا المحلول اللي معايا، وبدأت أساعد الناس

للأسف التغيير السياسي لو حصل هايسيب ناس جاهلة وأنانية لحد بعيد في وقت الزنقة، فيه ناس كانت شايلة البيبسي عشان تشربه، وواحد جاي عاوز بيبسي عشان يروي عطشه ويطلع يهتف في مكان الهتاف فيه عبثي لحد اللحظة ديه، واتقمص زي العيال لما قلتله البيبسي لالتهابات الوش، وواحد شكله أمي عمال يقول للناس اللي بديهم المحلول "ادعك عينك بالمحلول واشرب البيبسي، بيقولوا البيبسي حلو للصحة" كان نفسي أسلم الناس ديه للأمن من كتر الاستفزاز، وناس غلابة، فاضل حوالي 100 مللّي من كل حاجة معايا وبعد ماحطهاله في ايده يدلق منها شوية عالأرض، او يستني لحد ماتتسرب من خلال صوابعه وهو بيقول "بأمانة ربنا مافيهاش حاجة؟"، ولما صلّينا سبت الازايز مع ست، لقيتها سايباها مع الناس، رجعت لقيت الناس برضو مصرة ماتفهمش، شربوا الخل والمحلول وغسلوا عينيهم بالبيبسي، وواحد خد مني 3 مرات من المحلول وكل مرة يوقعه، لحد مانفعلت وقلتله مالكش تاني، وكان فيه 2 دكاترة مستفزين جداً، انا كان عندي معلومات بسيطة عن الكيميا من الهندسة، ومعلومات بسيطة عن الإسعافات الأولية قريتها من الانترنت وعرفتها من أصدقاء في طب وصيدلة، الدكاترة كانوا واقفين مع البرادعي طول الوقت، اللي كان تعبان جداً بالمناسبة من الغاز، علي عكس مالناس فاكرة، البرادعي وعبد الجليل مصطفي وإبراهيم عيسي وأخرين من الجمعية الوطنية كانوا معانا طول الوقت، وتضرروا لأن الناس بتدخل تهرب من الغاز وتسيب أبواب المسجد مفتوحة، وناس تانية عاوزاه يدخل بنفسه في الاشتباكات مع الأمن، عرفت من بنت الدكتور محمد أبو الغار ان والدها مختفي من الصبح مع الأستاذ عبد الرحمن يوسف وصحفية اجنبية، لما الأمن بدأ يفقد السيطرة برة دخل ناس بتموت، ستات كبيرة واطفال وشيوخ، وناس بتطلع في الروح، ومعاناتهم كانت بتزيد بسبب الناس اللي كانت بتفتي، فقدت أعصابي، بدأت أترعش وأبكي من الحرقة عالناس اللي بتموت "أقسم بالله سبولهم الدين في المسجد هناخد ثواب"، قربت مني ست منتقبة "حرام عليك ذنب الدين ايه، ربنا هايجيبلنا حقنا وهاينتقم منهم" قلتلها" بقالكوا 30 سنة بتقولوا ربنا هايجيب حقنا، اسكتوا بقي كفاية، دول منغير ملة، احنا اللي نجيب حقنا"

كان فيه مخبر معانا، واضح جدا انه كان مخبر، فضل طول الوقت جوه المسجد مع ان بنيته قوية ومع انه ماكنش متضرر، ربنا يخلّي لينا السينما، عرفتنا علي شكل المخبرين من ايام الملك فاروق، شخص طويل وعريض، بشنب قذر، وبالطو وجزمة جلد، فيه ناس دخلت والدكاترة عرفتهم بالصدفة بعد ماصرخت عليهم لحد مالقتهم، كان فيه شخص بيموت، ضربات قلبه ضعيفة، وبيفرفر، و2 عساكر أسعفناهم، كان فيه شخص مستفز هايدوس عالناس اللي في الأرض عشان يوصل ليهم ويصورهم، اضطريت اضربه جوا المسجد عشان يبعد، لأنهم كانوا بيتخنقوا وكل مارجّع الناس من حواليهم، يشوفوه واقف هو وصاحبه قريب فيقرّبوا تاني، من وقت لوقت كنت باطلع أبص عالتطورات في الشارع، الأمن اتهزم تماماً عالكوبري، اطارات بتتحرق

معلومة للناس عشان لو المظاهرات استمرت:

البيبسي والمشروبات الغازية عموماً، أو بدرة ال

Sodium bicarbonate

الذائبة في الماء

هي سوائل قلوية

Alkaline

بتعادل الأحماض بتاعة الغاز

Acid

ببتحط عالوش بس، مافيش حاجة بتتحط عالعين، الدموع كفيلة بغسيل الأحماض منها، الخل أو البصل لتسهيل التنفس أو الأفاقة

فاجئة لقينا مئات الألاف جم من الشوارع المحيطة وفوق الكوبري، والأمن فاتح لينا الطريق، اتصورنا مع العساكر والظباط، كنا مئات الالاف عن الميدان، ومع الوقت اتحولنا لملايين بلا مبالغة، مش اقل من 3 5 مليون، المسيرة كانت ممتدة من ميدان الجيزة لكوبري قصر النيل في الزمالك، ظباط المطافي عرضوا علينا ميّة، ستات وبنات نزلوا من الشقق بجرادل الميّة، كان فيه ناس تافهة، زي شباب كتير كان ماشي عكس الاتجاه، ولما قلتلهم تعالوا معانا قالولي "معلش يا برنس متأخرين عالماتش" عدينا قدّام فنادق وبنوك كتير من غير تخريب، الناس كسرت صورة حسني مبارك اللي علي سور الأمانة العامة للحزب الوطني بالجيزة، بس شباب مثقف وقف حول المقر وهتف "سلميّة.. سلميّة"، عند المقر ظهر أشخاص يقولوا "بس اوعوا تجيبوا البرادعي كلب أمريكا" وحاولوا يستغلوا ان الشباب اللي اندسوا وسطهم من طبقة مطحونة، ويجرونا لنقاش، وقتها قلتلهم "انتوا بقالكوا 30 سنة خرفان، لما تيجي انتخابات نبقي نختار، دلوقتي خلينا متفقين اننا نسقط النظام" واختفوا المندسين، وصلنا عند الشيراتون-علي مانا فاكر- وشفت منظر واحد من المتشردين اللي كبروا في السن بس برضو أطفال شوارع، جلده مسود من الطين، ساند علي المبني، وبيهرش في راسه، حسيته مش مصدق وفاكر انه بيحلم.

وصلنا لكوبري قصر النيل، هنا الوضع مختلف، فالجهة المقابلة تابعة لمديرية أمن القاهرة وليس الجيزة.. خراطيش-طلقات كبيرة المفروض انها تضرب في الأرض، فلما "تفرش" او تتوزع ماتعورش، بس كانوا بيضربوها عالناس، شفت ناس كتير بيرجعوا متشالين من الصفوف الاولي بجروح في رقابهم شبه الدبح، وكم كبير مع قنابل الغاز، فاجئة ظهرت 3 مدرعات من الجيش، الناس حيتها وطلعت عليها، سلّموا علي الظباط، في تأثر باللي حصل في تونس، بس الظباط لما قربوا من الكوبري قالولهم انزلوا، الناس افتكرت انهم هايشوطوا في الامن المركزي، الا انهما كانوا عالحياد، الامن المركزي عدّاهم وبعدين كمّل ضرب، مع الوقت بدأ الامن يتراجع، وقنابل الغاز تنزل النيل، ومحاولات من الامن للطويق، اللي عالكوبري تراجعوا للتحرير، وحوالي 20 عربية أمن مركزي من اتجاه ماسبيروا، بتمر تحت كوبري 6 اكتوبر وكوبري قصر النيل-تحت النفق-، حدفنا صخور عالعربيات، كانت بتمشي بسرعة جنونية عشان تحاصرنا من اتجاه ماسبيرو والتحرير والناحية التانية من تقاطع قصر النيل مع الكورنيش، الامن المركزي كان بيضرب خراطيش في الهواء عالناس، حدفنا صناديق وكراسي حديدية سدت المكان.. لما وصلنا للمقر الرئيسي للحزب الوطني اتعاملنا بشكل مختلف عن اللي حصل مع مقر الجيزة.

مشهد ماشفتوش حتي في الافلام، مستندات، ونهب او تكسير أجهزة كومبيوتر، توزيع مشروبات غازية وبسكوت من الكنتين الضخم في الساحة اللي في وسط الحزب، محاولات لحرق عربيات الامن المركزي اللي في الشارع، بس شباب واعي طفاها، الا ان شكل العربية اللي بتتحرق فوق كوبري 6 اكتوبر ألهب المشاعر، حرقوا عربيتين قدام باب الحزب، انفجارات متتابعة، ناس طلعت صورة مبارك ودوسنا عليها بالجزم، صوت يتردد بقوة "شُخوا عليها" للاسف الناس حرقت الحزب الوطني ومافكرتش في المتحف المصري(ملاصق للحزب)، شفت طفل شارع معاه صندوق عيش وكان بيبسي، قلتله جبنالك حقلك، كان بيبكي، ابتسم وقاللي الحمد لله، واحد جه قاللي "شكراً يا شباب علي تعبكوا نردهالكوا في الافراح" بصيت لشريف وقلتله "هو انا جاي اجامله في فرح اخته ولا ايه"، كان لازم امشي، مشيت عالساعة 8 مع شريف علي وشريف عبد التواب، وسيبنا ورانا-بعد مافشلنا اننا نلاقي- طارق الخطيب وأينش وعبد الله سليمان وعبد الرحمن قبيل.

الحرية قادمة

6 & 7 فبراير

شوية حاجات حصلت في الميدان لما بتت فيه، كان من احلي ايام حياتي:

1-اولا دول كانوا الحد والاتنين، ديه ايام المفروض بتبقي قليلة من حيث العدد، بس اليومين دول كان فيه مش اقل من 10 الاف بني ادم

2-وقفت في لجنة عشان نحمي الناس، من كتر مالناس كانت بتيجي، ماقدرتش اقعد لحد بعد بدء الحظر، انا وقف من حوالي 7 لحد حوالي 1، ماقعدتش فيهم خمس دقائق

3-كذب التلفزيون كان بيجبلنا ناس، وده احد اسباب-الي جانب الاستقالات الجماعية- اللي خلت خطابه يبقي اكثر حيادية، فيه ست جت هي وابنها وقالتلنا "انتوا شباب مصر، ربنا يحفظكوا

-ربنا يخليكي يا حجة

-قولّي يابني فين مجمع الجوازات؟

-مجمع التحرير كله مقفول يا حجة

-ايوة مانا عارفة، اصل بيقولوا بيوزعوا بطاطين واكل وفلوس

-انتي بتصدقي الكلام ده يا حجة؟ مافيش حاجة زي كده، احنا بنجيب اكل وبطاطين من فلوسنا ونوزعها علي بعض عشان نبات

-لا اصل ناس جراننا جم وخدوا (بتستذكي عليّ)

-خلاص ادخلي، بس انا باقولك مش هاتعرفي تطلعي بحاجة

-ابنها: عالاقل تغيرولنا علي جرح ايديها

الست ديه وابنها لما صحيت تاني يوم لقيتها باتت معانا لما عرفت ان الاعلام كذاب، واشخاص كتير عدوا عليّ وقالوا كلام مشابه وباتوا معانا برضو

4-فيه ظباط امن قومي وسطنا، بيجمعوا معلومات عن روحنا المعنوية، عن احتمالية وجود خطط، عن حالة الناس في السقعة، واكتشفنا منهم ناس فعلا بس سيبناهم في وسطنا وحتي ماوجهناهمش، حصل اني شكيت في ناس ولقيت ان كذا حد غيري ماعرفوش شاكك فيه

5- الناس البسيطة بقت بتفهم في السياسة، الجو المشرف في التحرير، وامتزاج الطبقات خلّي الكبير يحس بالصغير، وخلّي الفقير يفهم في الدستتور والسياسة

6-الكنتاكي بيتوزع منغير كاتشاب

كنت بايت في الميدان وباتكتك من السقعة، حلمت بحوار وائل غنيم وحوار عمر سليمان، ولما الحوارين اتذاعوا كنت بانطق الأسئلة والأجوبة قبل ماتتقال، وحلمت ب 3 او 4 أشخاص كتير قابلتهم تاني يوم، منهم شخص قابلته مع سلمي عقل، كان شكله يخوّف، ولما اتكلمت معاه اكتشفت ان مظهر التشدد الظاهر عليه بيخفي شخص مثقف ومستنير جدا

الحلم أخره كان زي العاب البي اس، لعبة بتتقلب فيلم، كان عبارة عن ناس بتزحف ناحية قصر الرياسة، بس القصر عبارة عن برج طويل جدا وابيض، بنفس تصميم سيميراميس اللي في ضهر التحرير، وان طنطاوي كان جنبي وكان رافض اللي بنعمله وعاوزه يخرج بهدوء، بس احنا اقنعناه باعدادنا فضرب في مبارك، وده اللي حصل فعلا، طنطاوي كان عالحياد لحد لما لقي كفتنا غالبة، بيان رقم واحد من هيئة عسكرية، اعلي هيئة، معناها انقلاب

http://www.facebook.com/AhmedBeak/posts/125515350853916

يوم الخميس 10 فبراير، وبعد الخطاب، مشينا بالعفوية بالالاف لماسبيرو، هناك الجيش كان بيتعامل معانا منغير اي حميمية وبتوتر شديد، علي غير العادة، عادة ظباط الجيش بيتعاملوا معانا بكل حب، فضلت هناك لحد قرب الفجر تقريبا

رجعت مخنوق بعد الخطاب، بس لما نمت حلمت اني باشرب شامبانيا، انا مش باشرب، بس الشامبانيا مشروب احتفالي، خير يعني

لما تنحي، الناس اللي كانت بتخوننا والناس اللي كانت بتهيننا نزلوا واحتفلوا، قدام القصر في الكوربة جه واحد سيس وخطيبته السيس برضو ووقفوا يتريقوا علي المعتصمين: هم دول بقي اللي عاملين مظاهرات، اول ماتنحي هتفوا: تحيا مصر... الله اكبر

مبروك :)))))))))))))))))))))